Cit atir i jami ma tye

Cit atir ka ma nyuto lok ma tye iye

Lucaden pa Jehovah

Yer leb Acholi

DUL ME APAR WI ARYO

Kwo i Yo ma Yomo Cwiny Lubanga

Kwo i Yo ma Yomo Cwiny Lubanga

In itwero doko larem Lubanga nining?

Pyem pa Catan-ni mako kadi wa in nining?

Kit tim ango ma pe yomo cwiny Jehovah?

Itwero kwo i yo ma yomo cwiny Lubanga nining?

KIT dano ango mono ma imito ni obed laremi? Polle imito jo ma ginywako tammi, mitini, ki kit me kwo ma in inongo ni ber. Cwinyi bene bimito jo ma gitye ki kit mabeco calo gene ki kica.

2 Cakke wa i tekwaro pa dano, Lubanga obedo ka yero dano mogo me bedo lureme macok. Me labolle, Jehovah olwongo Abraim ni obedo lareme. (Icaya 41:8; Yakobo 2:23) Lubanga olwongo Daudi ni, “laco ma yomo cwinya” pien en obedo dano ma Jehovah maro. (Tic pa Lukwena 13:22) Jehovah otero Daniel calo ‘dano me amara mada.’—Daniel 9:23.

3 Tyen lok ango ma omiyo Jehovah oyero Abraim, Daudi, ki Daniel me bedo lureme? Ada, en owaco bot Abraim ni: “Pien ityeko woro doga.” (Acakki 22:18) Jehovah nyiko cok bot jo ma gitimo jami ma en mito ni gutim ki mwolo. En owaco bot jo Icrael ni, ‘myero wuwiny lokka, wek abed Lubangawu, wek wun wubed jona.’ (Jeremia 7:23) Ka in iwinyo dog Jehovah, ci in bene ibedo lareme!

JEHOVAH MIYO TEKO KI LUREME

4 Tam kong jami mabeco ma bedo larem ki Lubanga kelo. Baibul owaco ni En tye ka yenyo kare me “nyuto tekke bot jo ma gibedo ki lengic i kome.” (2 Tekwaro 16:9) Jehovah twero nyuto tekone piri nining? Kinyuto yo mukwongo i Jabuli 32:8, ka ma wakwano ni: “An [Jehovah] abipwonyi dok abicimmi yo ma myero ilubi; abimiyi ryeko dok abineni.”

5 Man obedo yo maber adada me gwok pa Jehovah! En binyuti yo ma mitte me aluba dok gwoki ka nongo itye ka lubone. Lubanga mito konyi me kato ki i abita ki atematema mapol. (Jabuli 55:22) Ada ka itiyo bot Jehovah ki cwinyi ducu, ibibedo ki nwang cwiny calo pa laco Jabuli ma owaco ni: “Kare ducu angeyo ni Rwot tye kweda; pe gibidira woko cen, pien en tye yo tung cinga ma lacuc.” (Jabuli 16:8; 63:8) Adada, Jehovah gire twero konyi wek ikwo i yo ma miye yomcwiny. Ento, kit ma ingeyo kwede, tye lamone pa Lubanga ma pe mito ni in itim man.

PYEM PA CATAN

6Dul me 11 me buk man, tito kit ma Catan Larac opyem kwede i kom loc mamalo twal pa Lubanga. Catan odoto Lubanga ni en obedo lagoba pien lokke nyuto ni Jehovah otimo rac pe me miyo ni Adam gin ki Kawa gumok tamgi pi gin maber ki marac gin kikomgi. I kare ma Adam gin ki Kawa gubalo dok lutinogi gucako nya i lobo, Catan okelo lok ni dano mere tiyo pi rwot ineka keken. Catan okelo adot ni: ‘Dano pe tiyo pi Lubanga pien ni gimaro Lubanga, mina kare, ci abiloko dano ducu me kwero Lubanga woko.’ Lok ma kitito i kom laco ma nyinge Yubu-ni nyuto ni man aye gin ma Catan otamo. Yubu kono obedo anga, dok pyem pa Catan-ni kono ocako gudo wa en nining?

7 Yubu okwo i kine ka mwaki 3,600 ma okato angec. En obedo laco ma kite ber, pien Jehovah oloko i kome ni: “Pe tye ngat mo macalo en i wi lobo, dano ma pe ki bal mo, dano ma cwinye atir, ma lworo Lubanga, dok dag tim marac.” (Yubu 1:8) Yubu onongo yomo cwiny Lubanga.

8 Catan owaco ni Yubu tiyo pi Lubanga pi rwot ineka keken. Larac-ci owaco bot Jehovah ni “Pe in aye irumo kome [Yubu] ki cel, ki ode, ki gin ducu ma en tye kwede, tungi ki tungi? In imiyo gum i kom tic me cinge, limme bene omedde i lobo. Ento tugi keto cingi cut koni, igud gin ducu ma en tye kwede, ci en yeti ki i nyimi.”—Yubu 1:10, 11.

9 Pi meno Catan opyem ni Yubu tiyo bot Lubanga pi jami mabeco ducu ma en onongo ki bot Lubanga. Larac-ci opyem bene ni ka kiketo atematema i kom Yubu ci en bikwero Lubanga woko. Jehovah kono odok i pyem pa Catan-ni nining? Kit macalo kop man omako cwiny ma Yubu onongo tye kwede, Jehovah oye ni Catan otem Yubu. I yo ma kit meno, mar pa Yubu i kom Lubanga onongo binyute kamaleng.

KITEMO YUBU

10 Cut cut Catan otugi temo Yubu i yo mapol mapat pat. Lim makwo pa Yubu mukene kikwalo, mukene kinekogi woko, dok kineko wa luticce bene. Meno okelle can lim madit. Peko mukene malit atika dok opoto i kare ma lutino pa Yubu apar guto i yamo magwar. Kadi bed ni jami maraco magi otimme, “Yubu pe obalo, pe owaco ni Lubanga otimo rac.”—Yubu 1:22.

Yubu onongo mot pi gwoko genne

Yubu onongo mot pi gwoko genne

11 Catan pe ogik kenyo keken. En gwok otamo ni ka Yubu odiyo cwinye pi rwenyo jamine, luticce, ki lutinone, ka two malit opoto i kom Yubu ci bilokke kwero Lubanga cut. Jehovah gire oye ni Catan obol two malit atika i kom Yubu. Ento kadi bed kit meno, Yubu pe oturo genne i kom Lubanga. Ma ka meno, en oloko ki nwang cwiny ni: “Nio wang ma ato, ento pud abiwacci ni cwinya leng.”—Yubu 27:5.

12 Yubu onongo pe ngeyo ni Catan aye tye ka miye peko. Pien Yubu pe obedo ki ngec muromo i kom pyem pa Larac-ci, en obedo ki lworo ni Lubanga aye onongo tye ka miye lwak peko magi. (Yubu 6:4; 16:11-14) Kadi bed kit meno, Yubu omedde ki gwoko genne i kom Jehovah. Gwoko gene pa Yubu-ni onyuto kamaleng ni lok ma Catan okelo ni Yubu tiyo pi Lubanga pi rwot ineka keken-ni obedo goba!

13 Gene pa Yubu-ni omiyo lagam ma ocwiny bot Jehovah me gamo pyem me cac pa Catan-ni. Yubu gire onongo obedo larem Jehovah ada, dok Lubanga omiyo mot pi genne-ni.—Yubu 42:12-17.

KIT MA LOK MAN MAKO KWEDE IN BENE

14 Kop ma mako gen i kom Lubanga ma Catan okelo-ni pe obedo gin ma omako Yubu kene. In bene itye iye. Kinyuto lok man ka maleng i Carolok 27:11, ka ma Lok pa Jehovah waco ni: “Latinna, bed ryek, wek iyom cwinya, wek anong lagam ma myero adok iye i lok ki ngat ma yeta.” Lok magi, ma kicoyo mwaki miya mapol inge to pa Yubu-ni, nyuto ni Catan pud tye ka yeto Lubanga dok doto wa Luticce. Ka wakwo i yo ma yomo cwiny Jehovah, ci wakonyo me miyo lagam i kom adot me goba pa Catan-ni, man miyo wayomo cwiny Lubanga. In iwinyo ningo i kom lok man? Mono pe obedo gin ma mwonya mada me bedo i kin jo ma gitye ka miyo lagam i kom lok goba pa Larac-ni, kadi bed ni mitte ni omyero ilok yo me kwoni mogo?

15 Niang ni Catan owaco ni: ‘Gin ducu ma dano tye kwede en bimiyo pi kwone.’ (Yubu 2:4) Pi waco ni “dano” Catan onyuto atir ni adote-ni pe tye i kom Yubu keken ento mako dano ducu. Meno obedo lok ma pire tek adada. Catan okelo akalakala i kom gen ma megi i kom Lubanga. Larac-ci mito neno ni pe iwinyo dog Lubanga dok i kwero lubo yo me kit ma atir ka peko mo obino. I yo ma nining ma Catan twero temme me timo man?

16 Kit ma kinyammo kwede i Dul me 10, Catan tiyo ki yo mapat pat me temme me loko dano woko ki bot Lubanga. I kine mukene, en lwenyo “macalo labwor ma kok, kun yenyo dano me amwoda.” (1 Petero 5:8) Pi meno, Catan twero dwoyo tam pa luremi, wadini nyo dano mukene me nyuto adage i yelleni me kwano Baibul ki keto jami ma ikwano i tic.* (Jon 15:19, 20) Ki tungcel, Catan bene “lokke nen macalo lamalaika ma menyo piny.” (2 Jo Korint 11:14) Larac-ci twero tic ki yo me ryeko mukane me bwoli ki ywayo tammi woko cen ki i kom Lubanga. En bene twero tic ki tur pa cwiny, ni wek icak winyo ni pe iromo yomo cwiny Lubanga. (Carolok 24:10) Kadi bed Catan obino macalo “labwor ma kok” nyo oloko kite macalo “lamalaika ma menyo piny,” pud nongo pyemme-ni gak en acel-li: En waco ni ka itye i atematema nyo abita mo, ci in ibiweko tic pi Lubanga woko. In itwero dok i pyemme-ni ki dok nyuto ni in igwoko genne-ni bot Lubanga kit ma Yubu otimo-ni nining?

BEDO KA LUBO CIK PA JEHOVAH

17 In itwero miyo lagam i kom pyem pa Catan-ni i yo ma yomo cwiny Lubanga ki kit ma i kwo kwede. Man mito gin ango? Baibul gamo ni: “Mar Rwot Lubangani ki cwinyi ducu, ki tiponi ducu ki tekki ducu.” (Nwoyo Cik 6:5) Ma nongo marri i kom Lubanga woto ki dongo, ibibedo ki mitti me timo jami ma en mito ni itim. Lakwena Jon ocoyo ni “Pien maro Lubanga en aye gwoko cikke.” Ka imaro Jehovah ki cwinyi ducu, ibinongo bene ni “cikke pe nurowa.”—1 Jon 5:3.

18 Cik pa Jehovah kono gubedo ngo? Cikke mukene mako kit me kwo mogo ma myero pe walubgi. Me laporre, nen bok ma wi lokke waco ni “Wek Timo Jami ma Jehovah Dagi.” Kunnu ibinongo kiryeyo kit me kwo mogo ma Baibul waco atir ni raco. Ka pud ineno anena, ibitamo ni kit tim ma kiryeyogi-ni mogo nen calo pe rac. Ento ka ibedo ka lwodo ginacoya ma kinyuto kunnu-ni, ci ibiniang ryeko ma tye i cik pa Jehovah. Loko kiti twero bedo gin matek loyo i kwoni. Ento kwo i yo ma yomo cwiny Lubanga kelo yengo ki yomcwiny madit atika. (Icaya 48:17, 18) Dok obedo gin ma in bene itwero nongone. Dong kono wacako ngeyo meno nining?

WEK TIMO JAMI MA JEHOVAH DAGI

Lutim maraco aryo
Jo munyomme ma gitye ka mato kongo ki taa
Dako ma tye ka kwalo kwo
  • Neko nek.—Nia 20:13; 21:22, 23.
  • Tim me tarwang.—Lulevi 20:10, 13, 15, 16; Jo Roma 1:24, 26, 27, 32; 1 Jo Korint 6:9, 10.
  • Tim Tyet.—Nwoyo Cik 18:9-13; 1 Jo Korint 10:21, 22; Jo Galatia 5:20.
  • Woro Cal Apaya.—1 Jo Korint 10:14.
  • Mero Kongo.—1 Jo Korint 5:11.
  • Kwalo Kwo.—Lulevi 6:2, 4; Jo Epeco 4:28.
  • Goba.—Carolok 6:16, 19; Jo Kolocai 3:9; Niyabo 22:15.
  • Woro me jami.—1 Jo Korint 5:11.
  • Tim gero.—Jabuli 11:5; Carolok 22:24, 25; Malaki 2:16; Jo Galatia 5:20.
  • Tic ki leb macilo.—Lulevi 19:16; Jo Epeco 5:4; Jo Kolocai 3:8.
  • Tic ki remo i yo ma pe oporre.—Acakki 9:4; Tic pa Lukwena 15:20, 28, 29.
  • Kwero miyo jami ma mitte bot jo ma i odi.—1 Temceo 5:8.
  • Donyo i lweny ki anyobanyoba me wibye me lobo-ni.—Icaya 2:4; Jon 6:15; 17:16.
  • Mato taa nyo Yadi mogo calo jayigi-ni.—Marako 15:23; 2 Jo Korint 7:1.

19 Jehovah pe mito ni watim jami ma timone kato kerowa woko. (Nwoyo Cik 30:11-14) En ngeyo kero kacel ki goro ma watye kwede maber loyo. (Jabuli 103:14) Medo i kom meno, Jehovah twero miyo botwa teko me winyo doge. Lakwena Paulo ocoyo ni: ‘Pe tye atematema mo ma makowu ma pe mako dano ducu; Lubanga genne, pe biye ni gitemwu matek makato ma wuromo cirone.’ (1 Jo Korint 10:13) Jehovah twero mini ‘teko ma a ki bote’ wek ikany atematema. (2 Jo Korint 4:7) Inge ciro atematema mapol, Paulo owaco ni: “Atwero jami ducu liweng pi Kricito ma miya teko.”—Jo Pilipi 4:13.

DONGO KIT PA LUBANGA

20 Adada, jami mapol mitte pi yomo cwiny Jehovah ma kato bedo ka gwokke ki i jami ma en okwerogi keken. Mitte ni in bene myero i mar jami ma en maro. (Jo Roma 12:9) In mono pe iwinyo ni omyero ibed ki wat macok ki jo ma ginywako tammi, mittini ki kit me kwo ma in inongo ni ber? Jehovah bene timo kit meno. Pi meno, pwonye me maro jami ma Jehovah maro. Kitito pi jami mukene magi i Jabuli 15:1-5, ka ma wakwano lok i kom jo ma dong Lubanga nenogi macalo lureme. Lurem Jehovah ginyuto kit mogo ma Baibul lwongo ni, “nyig ma nyak pi cwiny maleng.” Ma tye iye “mar, yomcwiny, kuc, diyo cwiny, kica, ber, gen, mwolo, gwokke-ken.”—Jo Galatia 5:22, 23.

21 Bedo ka kwano Baibul jwi bikonyi me dongo kit pa Lubanga. Nongo pwonye i jami ma Lubanga mito bikonyi me ribo tammi ki yo pa Lubanga. (Icaya 30:20, 21) Ka ibedo ka medde ki dongo marri pi Jehovah, ibinongo ni mitini me kwo i yo ma yomo cwiny Lubanga bidongo matut.

22 Ka wamito yomo cwiny Jehovah omyero wayelle matek me timo jami ma yomo cwinye. Baibul poro loko kit me kwo macon ki bongo ma ilunyo macone woko ka dok iruko mukene manyenne. (Jo Kolocai 3:9, 10) Dong ma make ki cik pa Jehovah, laco Jabuli ocoyo ni: “Ngat ma ogwoko cikki limo mot madit.” (Jabuli 19:11) In bene ibinongo ni kwo i yo ma yomo cwiny Lubanga kelo mot madit atika. Ka itimo kit meno, ci ibimiyo lagam i kom pyem pa Catan-ni, dok ikelo yomcwiny madit atika bot Jehovah!

GIN MA BAIBUL PWONYO

  • Itwero doko larem Lubanga ka iwinyo doge.—Yakobo 2:23.
  • Catan okelo pyem i kom gene pa dano ducu.—Yubu 1:8, 10, 11; 2:4; Proverbs 27:11.
  • Omyero wawek tim ma pe yomo cwiny Lubanga.—1 Jo Korint 6:9, 10.
  • Watwero yomo cwiny Jehovah ki dago jami ma en dagi ki dok maro jami ma en maro.—Jo Roma 12:9.

*  Man kono pe tyen lokke ni jo ma gikweri-ni nongo Catan aye tye ka tic kwedgi. Ento Catan gire aye lubanga me yub me kare man, dok lobo-ni ducu tye i te locce. (2 Jo Korint 4:4; 1 Jon 5:19) Pi man, wageno ni kwo i yo pa Lubanga bibedo gin ma welo, ci miyo jo mukene bikweri woko.


Peny me Kwan

1, 2. Mi labol pa dano mogo ma Jehovah onenogi calo lureme macok.

3. Pingo Jehovah oyero dano mogo me bedo lureme?

4, 5. Jehovah nyuto tekone pi jone i yo ma nining?

6. Catan odoto dano ningo?

7, 8. (a) Gin ango ma oweko Yubu dok onongo pat ki dano ducu me kare maca? (b) I yo ango ma Catan owaco kwede ni Yubu tiyo pi Lubanga pi rwot ineka keken?

9. Jehovah odok i pyem pa Catan-ni nining, dok pingo?

10. Kit atematema ango ma opoto i kom Yubu?

11. (a) Adot me aryo mene ma Catan omoro i kom Yubu, dok Jehovah kono odok iye nining? (b) Yubu otimo gin ango pi two malit ma opoto i kome?

12. Yubu ogamo adot pa Larac-ci nining?

13. Ngo ma otimme pien Yubu obedo ngat ma geno Lubanga?

14, 15. Pingo watwero waco ni pyem pa Catan i kom Yubu-ni mako dano ducu?

16. (a) Kit yo ango ma Catan temme kwede me loko dano woko ki i kom Lubanga? (b) Larac-ci twero tic ki yo magi i komi nining?

17. Gin ango ma pire tek ma miyo walubo cik pa Jehovah?

18, 19. (a) Cik pa Jehovah mogo tye ningo? (nen i bok.) (b) Wangeyo nining ni Lubanga pe mito ni watim jami makato kerowa woko?

20. Kit pa Lubanga ango ma omyero wadong, dok pingo pigi tego?

21. Gin ango ma bikonyi me dongo kit pa Lubanga?

22. Ka itimo jami i yo ma yomo cwiny Lubanga nongo icobo gin ango?