KICIKO Lukricitayo me Kwero Nipo me to pa Kricito. Kwer man bene kilwongo ni ‘cam pa Rwot me otyeno.’ (1 Jo Korint 11:20) Gin ango ma pire tek iye? Omyero kikwer nining dok awene?

Yecu Kricito ocako te kwer man i nino me Kato pa Lujudaya i dye wor i mwaka 33 K.M. Kwer me Kato obedo kwer ma onongo kitimo kicel keken i mwaka i nino dwe 14 me dwe me Nican pa Lujudaya. Me nongo nino dwene kikome, Lujudaya onongo gikuro nino me equinox ma bedo i kare me poto kot ma nongo dyeceng bedo cawa 12 ki dye wor bene bedo cawa 12 ma rom rom. Dwe ma opo manyen ma kikwongo nenone ma cok ki nino meno aye bedo acakki me Nican. Nino me Kato bedo nino 14 i ngeye, ka ceng opoto.

Yecu ocamo nino me Kato-ni kacel ki lukwenane, ocwalo Juda Lakeriot woko, ka dong ocako te kwer me Cam pa Rwot me Otyeno. Cam man oleyo ka tyen nino me Kato pa Lujudaya-ni, dong pi meno omyero kikwer kicel keken i mwaka.

Jiri pa Matayo waco ni: “Yecu okwanyo mugati ci, inge lego gum, en oturo ka, omiyo bot lupwonnye, en owaco ni: ‘Kwanyu, camu. Man ocung pi koma.’ Dok en okwanyo kikopo, ci i nge miyo pwoc, en omiyo botgi, ma waco ni: ‘Matu ki iye, wun ducu; pien man ocung pi “remo me gicikke” ma myero kiony woko pi jo mapol me weko bal.’”—Matayo 26:26-28, NW.

Jo mogo gitamo ni Yecu oloko mugati-ni odoko ringo kome kikome ki vino-ni odoko remone. Ento kono, i kare ma Yecu omiyo mugati-ni, onongo gin mo peya ogudo kome. Onongo mono lukwena pa Yecu ada gitye ka camo kom ringone ki mato remone kikome? Pe, pien meno doko tim me camo dano dok turo cik pa Lubanga. (Acakki 9:3, 4; Lulevi 17:10) I Luka 22:20, NW, Yecu owaco ni: “Kikopo man ocung pi gicikke manyen pi remona, ma myero kiony piwu.” Kikopo meno mono i ada onongo odoko “gicikke manyen”? Meno pe twero timme, pien gicikke obedo lok ma dano moko i kingi ento pe gin mo ma kome tye.

Mugati ki vino

Pi meno, mugati ki vino-ni ducu gitye calo lanyut keken. Mugati-ni cung pi kom Kricito ma roc pe iye. Yecu otiyo ki mugati ma odong ki i cam me Kato. Mugati-ni onongo kiyubo labongo kit tobi mo. (Nia 12:8) Baibul tiyo ki tobi calo gin ma cung pi bal nyo gin ma top. Pi meno mugati-ni ocung pi kom Yecu ma pe ki roc ma kityero. Onongo bal pe iye.—Matayo 16:11, 12; 1 Jo Korint 5:6, 7; 1 Petero 2:22; 1 Jon 2:1, 2.

Vino makwar-ri cung pi remo pa Yecu. Remo meno miyo gicikke-ni tiyo. Yecu owaco ni remone kionyo “pi weko bal.” Pi meno, dano dong twero doko leng i wang Lubanga dok twero donyo i gicikke manyen gin ki Jehovah. (Jo Ibru 9:14; 10:16, 17) Gicikke man, weko Lukricitayo 144,000 ma lugen gitwero cito i polo. Gin gibitic kunnucalo kabaka ki lulam dog pi ber bedo pa dano ducu.—Acakki 22:18; Jeremia 31:31-33; 1 Petero 2:9; Niyabo 5:9, 10; 14:1-3.

Angagi ma gitwero camo mugati ki vino-ni? Pe dok twero bedo jo mapat ki jo ma gitye i gicikke manyen-ni—jo ma gitye ki gen me cito i polo—gin aye myero gucam mugati ki vino-ni. Cwiny maleng pa Lubanga aye miyo jo magi giniang ni gityeko yerogi me bedo calo kabaka i polo. (Jo Roma 8:16) Jo meno bene gitye i gicikke gin ki Yecu pi Ker.—Luka 22:29.

Jo ma gitye ki gen me bedo i Paradic i lobo kono dong? Gin gilubo cik pa Yecu me bedo tye i Cam pa Rwot me Otyeno-ni, gin gibino pi kwero nino meno keken ento pe gicamo. Lucaden pa Jehovah gikwero Cam pa Rwot me Otyeno kicel mwaka ki mwaka i nge poto ceng i nino dwe 14 me Nican. Kadi bed jo alip manok i wi lobo ducu aye gitye ki gen me cito i polo, kwer man pire dit atika bot Lukricitayo ducu. Obedo kare ma jo ducu omyero gutam iye matut pi mar ma dong loyo ducu ma Lubanga Jehovah gin ki Yecu Kricito gunyuto.—Jon 3:16.

← Nen dul ma lok man a ki iye