GIN mo otimme marac adada. Pud gineko Jon Labatija aneka. Kerodia, dako pa kabaka, onongo pe mare. Dok en oweko kabaka omiyo kingolo ngut Jon woko.

Ka Yecu owinyo lok man, cwinye oton adada. En ocito i kabedo ka ma dano pe iye, ka kene. Ento lwak gulubo kore. Ka Yeco oneno lwak, kica omake i komgi. Pi meno en oloko kwedgi i kom ker pa Lubanga, dok ocango lutwogi.

Otyeno meno lupwonnyene gubino bote ci guwaco ni: ‘Cawa dong okato woko, dok man kabedo ma dano pe iye. Cwal lwak gucit i kin paco ma cokcok wek guwil cam.’

Yecu opito dano mapol

Yecu ogamo ni: ‘Gin omyero pe gucit woko. Wun wumi botgi gin mo gucam.’ Ka olokke bot Pilipo, Yecu openyo ni: ‘Watwero wilo cam ki kwene ma romo pito lwak dano magi ducu?’

Pilipo ogamo ni: ‘Obitero lwak cente mapol tutwal me wilo cam muromo wek ngat acel acel onong mo manok.’ Anderiya oloko ni: ‘Latin awobi man, ma tye ka tingo camwa-ni, tye ki mugati abic ki rec aryo. Ento pud pe biromo lwak dano magi ducu.’

Yecu owaco ni: ‘Wek dano gubed piny i kom lum.’ Ci en opwoyo Lubanga pi cam-mi, ci ocako pokone matitino. I ngeye, lupwonnyene gumiyo mugati ki rec-ci bot lwak ducu. Co onongo gitye 5,000, dok mon ki lutino onongo gitye alip mapol. Gin ducu gucamo nio ka guyeng. Dok i kare ma lupwonnye gucoko cam mudong, opongo adita 12!

Yecu kombeddi dong omiyo lupwonnyene gudonyo i yeya me ngolo Nam me Galilaya. I dyewor twon yamo mo obino, ci twagge pa pii bayo yeya dwoko yo tungngi ki yo tung ca. Lupwonnye-ni lworo omakogi mada. Ci, i cwiny dyewor, guneno ngat mo tye ka wot ngolo bino botgi. Gin gukok ki lworo, pien pe gingeyo gin ma gitye ka nenone-ni.

Yecu owaco ni: ‘Pe wulwor. Man an.’ Ento pud pe gitwero ye. Pi meno Petero owaco ni: ‘Rwot, ka in eno ada, wacca wek awot angol pii abin boti.’ Yecu ogamo ni: ‘Bin!’ Petero okato woko ci owoto ki i wi pii! I ngeye en odoko lwor ci ocako lwiny, ento Yecu olarre woko.

Lacen, Yecu opito dano alip mapol doki. I kare meno en otiyo ki mugati abiro ki rec matitino manok. Jami doki oromo lwak ducu. Kit ma Yecu gwoko dano kwede mono pe ber tutwal? I kare ma en biloc macalo kabaka ma Lubanga oketo pe wabiparo pi gin mo wacel!

Matayo 14:1-32; 15:29-38; Jon 6:1-21.



Peny

  • Gin ango marac ma otimme i kom Jon Labatija, dok man oweko Yecu owinyo nining?
  • Yecu opito lwak mapol ma onongo gulubbe nining, dok cam mudong onongo tye ma romene?
  • Pingo lukwena gubedo ki lworo i dyewor, dok ngo ma otimme i kom Petero?
  • Yecu dok opito dano alip mapol ata wang me aryo nining?
  • Pingo bibedo ber tutwal ka Yecu ocako loyo lobo calo Kabaka ma Lubanga ocimo?

Peny mukene

  • Kwan Matayo 14:1-32.

    Kop ma gicoyo piny i Matayo 14:23-32 miyo botwa niang ango i kom kit Petero?

    Ginacoya onyuto nining ni Petero otegi i anyim dok oweko kit me mwukke i jammi-ni? (Mat. 14:27-30; Jon 18:10; 21:7; Tic 2:14, 37-40; 1 Pet. 5:6, 10)

  • Kwan Matayo 15:29-38.

    Yecu onyuto woro pi mic me jammi me kom ma a ki bot Wonne nining? (Mat. 15:37; Jon 6:12; Kol. 3:15)

  • Kwan Jon 6:1-21.

    Lukricitayo ma kombeddi gitwero lubo lanen pa Yecu pi lok ma dok i kom gamente nining? (Jon 6:15; Mat. 22:21; Rom. 12:2; 13:1-4)