Cit atir i jami ma tye

Cit atir ka ma nyuto lok ma tye iye

Lucaden pa Jehovah

Yer leb Acholi

Ododo me 89: Yecu Olonyo Ot pa Lubanga

Ododo me 89: Yecu Olonyo Ot pa Lubanga

YECU nen calo okeco ada kany, pe kumeno? In ingeyo pingo en okeco? Akemo omako en pien co magi ma gitye i ot pa Lubanga ma i Jerucalem gubedo luworo me jami adada. Gin gitye ka temo nongo cente mapol ki bot jo ma gubino kany ka woro Lubanga.

Yecu tye ka reto meja pa lulok cente

In itye ka neno wod twoni dyang mapol ki romi ki amam ca-ni ducu? Ada, jo magi gitye ka cato lee magi kany i ot pa Lubanga. In ingeyo pingo? Pien ni Luicrael gimito lee ki winyi me atyera macalo gitum bot Lubanga.

Cik pa Lubanga waco ni ka Laicrael mo otimo gin marac, en omyero omi tyer bot Lubanga. Dok kare mukene bene onongo tye, ma Luicrael omyero gumi iye tyer. Ento Laicrael onongo dong twero nongo winyi ki lee me atyera bot Lubanga ki kwene?

Luicrael mogo onongo gitye ki winyi ki lee. Pi meno gin gitwero tyero magi. Ento Luicrael mapol onongo pe gitye ki kit lee nyo winyi mo. Dok jo mukene gikwo ka mabor ki Jerucalem ma pe gitwero kelo kadi lee acel i ot pa Lubanga. Pi meno dano gibino kany ci giwilo lee nyo winyi ma gimito. Ento jo magi gingolo wel matek ma okato kare woko bot dano. Gin onongo gitye ka bumo dano. Me medo i kom meno, myero onongo pe gubed ka cat wa i ot pa Lubanga kany.

Man aye oweko akemo omako Yecu. Pi meno en oreto meja pa jo magi ma gitye ki cente-ni ci oketo nyig centegi atata. En bene oyubo anino ki tol ogwil ci oryemo kwede lee ducu ki i ot pa Lubanga. En ociko jo ma gitye ka cato amam-mi ni: ‘Teru jami magi woko ki kany! Pe wulok ot pa Wora odok kabedo me nongo cente mabup.’

Lulub kor Yecu mogo gitye kacel kwede kany i ot pa Lubanga i Jerucalem. Gin guuro gin ma guneno Yecu tye ka timone. Ci wigi opo i kabedo ma i Baibul ma waco kom Wod pa Lubanga ni: ‘Mar pi ot pa Lubanga biwango koma calo mac.’

Ka Yecu tye kany i Jerucalem ka kwero Kato, en otimo tango mapol. I ngeye, Yecu oweko lobo Judaya ci ocako wot me dok cen Galilaya. Ento i yone kunnu, en ongolo ki i distrik me Camaria. Kong wanenu gin ma otimme kunnu.

Jon 2:13-25; 4:3, 4.



Peny

  • Pingo gitye ka cato lee i ot pa Lubanga?
  • Ngo ma omiyo kiniga omako Yecu?
  • Kit ma itye ka neno-ne i cal-li, gin ango ma Yecu otimo, dok rukca ango ma en omiyo bot jo ma gitye ka cato winyo ni?
  • I kare ma lulub kor Yecu guneno gin ma en tye ka timo-ne, ngo ma wigi opo iye?
  • Kabedo mene ma Yecu owoto ki iye i kare ma en tye ka dok cen i Galilaya?

Peny mukene

  • Kwan Jon 2:13-25.

    Ka kitamo pi kiniga ma omako Yecu i kom lulok cente ma onongo gitye i ot pa Lubanga, tama ango ma dok i kom tic me biacara i Ot me Ker ma pe opore? (Jon 2:15, 16; 1 Kor. 10:24, 31-33)