Jo ma gingiyo lakalatwe

ITWERO neno lakalatwe ca ma ryeny tutwal ma ngat acel i kin co magi tye ka cimone-ni? I kare ma gin guweko Jerucalem, lakalatwe-ni onen woko. Co magi gin jo me Kunyango, dok gin gingiyo lakalatwe. Gin gitamo ni lakalatwe manyen-ni tye ka telogi bot ngat mo ma pire tek.

I kare ma co magi guo i Jerucalem, gin gupenyo ni: ‘Latin ma bidoko kabaka pa Lujudaya-ni tye kwene?’ “Lujudaya” aye nying mukene pi Luicrael. Co-ni guwaco ni: ‘Wan wakwongo neno lakalatwe pa latin-ni i kare ma watye Kunyango, ci wabino ka wore.’

Ka Kerode, ma en aye kabaka me Jerucalem, owinyo man ci cwinye oballe woko. En pe mito ni kabaka mukene ole kakare. Pi meno Kerode olwongo ludito lulamdog ci openyo ni: ‘Kabaka ma kiciko pire-ni mono gibinywalo kwene?’ Gin gugamo ni: ‘Baibul waco ni i Beterekem.’ Pi meno Kerode olwongo co ma gua ki Kunyango-ni, ci owaco ni: ‘Citu wuciyeny ki diro ka ma latin matidi-ni tye iye. Ka wunonge, ci wuwek an ange. An bene amito cito ka wore.’ Ento, i adane, Kerode onongo mito nongo latin-ni me aneka!

Ci lakalatwe-ni onyiko ki i nyim co-ni wa Beterekem, ocung ka ma latin tye iye. Ka co-ni gudonyo i ot, gin gunongo Maliam gin ki Yecu. Gukwanyo mot ci gumiyo bot Yecu. Ento lacen Jehovah ocikogi i wang lek pe me dok bot Kerode. Pi meno gin gudok i lobogi kun gukwanyo yo mukene.

I kare ma Kerode owinyo ni co ma gua ki tung Kunyango-ni dong gudok woko paco, akemo omake mada. Pi meno en omiyo cik ni awobe ducu ma i Beterekem ma mwakagi tye aryo odok kwede piny omyero kinek woko. Ento Jehovah onongo otito woko con ki Yucepu i wang lek, ci Yucepu ki jo ode gucito woko Ejipt. Lacen, ka Yucepu ongeyo ni Kerode dong oto, en okwanyo Maliam gin ki Yecu odwogo cen Najaret. Kany aye ka ma Yecu odongo iye.

Anga ma itamo ni oweko lakalatwe manyen-ni obino? Po ni, co-ni kong gucito i Jerucalem i kare ma guneno lakalatwe-ni. Catan Larac onongo mito neko Wod pa Lubanga, dok en ngeyo ni Kabaka Kerode me Jerucalem bitemo neke. Pi meno Catan aye myero bed oweko lakalatwe-ni obedo ka ryeny.

Matayo 2:1-23; Mika 5:2.



Peny

  • Co mene ma gitye i cal-li, pingo ngat acel ki i kin-gi tye ka cimo lakalatwe ma tye ka ryenyi?
  • Pingo cwiny Kabaka Kerode oballe, dok en otimo ango?
  • Lakalatwe matar ni otelo co-ni oterogi kwene, ento pingo gin gudok cen i lobo-gi ki yo mukene?
  • Cik ango ma Kerode omiyo, dok pingo?
  • Jehovah owaco ni Yucepu omyero otim ngo?
  • Anga ma oweko lakalatwe manyen meno obedo ka ryeny, dok pingo?

Peny mukene

  • Kwan Matayo 2:1-23.

    Yecu onongo tye ki mwaka adi dok en onongo bedo kwene ma luryeko gubino ka limme? (Mat. 2:1, 11, 16)