Cit atir i jami ma tye

Cit atir ka ma nyuto lok ma tye iye

Lucaden pa Jehovah

Yer leb Acholi

Ododo me 85: Kinywalo Yecu i Dwol

Ododo me 85: Kinywalo Yecu i Dwol

IN INGEYO anga ma latin onyu-ni obedo? Ada, man aye Yecu. Pud kinywale anywala i dwol. Dwol aye ka ma kigwoko iye lee. Maliam opyelo Yecu i weer, ma en aye ka ma kiketo iye cam pa kana ki lee mukene. Ento pingo Maliam gin ki Yucepu gitye i kin lee? Man pe ka ma omyero kinywal iye latin, pe kumeno?

Pe, omyero pe kinywal kenyo. Ento man aye omiyo gin gitye kany. Cecar Augucito, laloc me Roma, oketo cik ni ngat acel acel myero odok i boma ka ma kinywale iye wek kico nyinge i buk. Dong, Yucepu yam kinywalo i Beterekem. Ento i kare ma en gin ki Maliam guo, ot mo onongo dong pe pigi ka mo keken. Pi meno gin dong gubino kany me bedo kacel ki lee. Dok i nino man kikome Maliam onywalo Yecu! Dong, kit ma itwero neno kwede, latin gire tye maber.

Yucepu, Maliam, ki Yecu ma pud tye onyu

Itwero neno lukwat ma gitye ka bino ka neno Yecu? Gin onongo gitye i poto ka kwayo romigi i dyewor, ci dero mo oryeny orumogi. Man onongo lamalaika! Lworo omako lukwat-ti mada. Ento lamalaika-ni owaco ni: ‘Pe wulwor! An atye ki kwena maber piwu. Tin, i Beterekem, kinywalo Kricito Rwot. En bilaro dano! Wun wubinongo ka kiboye woko ki bongo dok nongo kipyelo i weer pa lee.’ Cutcut lumalaika mapol obino ci gucako pako Lubanga. Pi meno lukwat magi gurune oyotoyot me cito ka neno Yecu, ci kombeddi dong gunonge.

In ingeyo pingo Yecu pire tek tutwal? In ingeyo anga ma en tika obedo? Po ni, i lokwa mukwongo i buk man watito pi Wod pa Lubanga mukwongo. Wod man otiyo gin ki Jehovah me yubo polo ki lobo kacel ki jami ducu. Dong, man aye ngat ma Yecu obedo!

Ada, Jehovah okwanyo kwo pa Wode ki i polo ci oketo i Maliam. Cutcut latin ocako dongo i iye kit ma jwi lutino mukene gidongo kwede i megigi. Ento latin man onongo Wod pa Lubanga. Lacen kinywalo Yecu kany i Beterekem i dwol. Itwero dong neno kombeddi pingo lumalaika onongo cwinygi yom tutwal me tito ki dano ni dong kinywalo Yecu?

Luka 2:1-20.



Peny

  • Latin lakere mene ma tye i cal-li, dok Maliam tye ka pyele kwene?
  • Pingo ginywalo Yecu i weer pa dyang?
  • I cal-li, co mene ma gitye ka donyo i dwol-li, dok gin ango ma malaika onongo owaco botgi?
  • Pingo Yecu dok pat mada?
  • Pingo gitwero lwongo Yecu ni Latin pa Lubanga?

Peny mukene

  • Kwan Luka 2:1-20.

    Tic ango ma Augucito Cecar otimo ma ocobo lok pa lunebi madok i kom nywalo Yecu? (Luka 2:1-4; Mika 5:2)

    Kiromo medo dano moni i kin jo ma gilwongo-gi ni ‘jo ma en pwoyo’ nining? (Luka 2:14; Mat. 16:24; Jon 17:3; Tic 3:19; Ibru 11:6)

    Ka Lujudaya ma mwol ma lukwat gubedo ki yomcwiny pi nywalo Lalar, kit yomcwiny madit ango ma lutic pa Lubanga me kare-ni myero gubed kwede? (Luka 2:10, 11; Ep. 3:8,, 9; Yabo. 11:15; 14:6)