NEN kong gin marac ma tye ka timme-ni! Kitye ka neko Yecu woko. Gin gukete i kom yat. Kiguro cumar i cinge ki i tyene. Pingo ngat mo mito timo man i kom Yecu?

Yecu tye ka to

Man otimme pien jo mogo gidag Yecu. In ingeyo nga ma gin obedo? Ngat acel ki i kin-gi aye Catan Larac lamalaika ma kite rac-ci. En aye ngat ma omiyo Adam gin ki Kawa gujemo i kom Jehovah. Dok Catan aye bene oweko lukwor pa Yecu gutimo bal marac-ci.

Kadi ma peya kiguro Yecu i kom yat kany, lukworre gutimo jami maraco tutwal i kome. Wi po kit ma gubino i poto me Gececemane ci gumake kwede? Lukwor magi onongo obedo angagi? Ada, gin obedo lutela dini. Ber, kong wanenu gin ma otimme ma lubo man.

I kare ma lutela dini gumako Yecu, lukwenane guringo woko. Gin guweko Yecu kene ki lukworre, pien gudoko lwor woko. Ento lukwena Petero gin ki Jon pe gucito mabor tutwal. Gin gulubo korgi me neno gin ma timme i kom Yecu.

Lulam dog gutero en bot ladit Anac, ma yam kong obedo lalam dog madit. Lwak-ki pe guri kany. I ngeye gutero Yecu i ot pa Kayapa, ma en aye dong kombeddi lalam dog madit. Lutela dini mapol onongo gugure i ode.

Kiyabo kot i ot pa Kayapa kany. Kikelo dano mogo me loko goba i kom Yecu. Lutela dini ducu giwaco ni: ‘Yecu myero kinek woko.’ Ci gungulo laa i wange, ka dok gudonge ki cinggi.

Ma jami magi ducu tye ka timme, Petero onongo tye i dye kal woko. Onongo obedo dyewor mangic, pi meno dano gumoko mac. Ka gitye gurumo mac kun gitye ka oyone, anyaka ma latic mo oneno Petero, ci owaco ni: ‘Laco man onongo bene tye kacel ki Yecu.’

Petero ogamo ni: ‘Pe, an onongo pe atye kwede!’

Dano guwaco ki Petero tyen adek ni en onongo tye kacel ki Yecu. Ento ka kiwaco Petero kwero woko ni pe ada. Tyen me adek-ke ma Petero owaco man, Yecu olokke ci onene. Cwiny Petero ocwer mada pi loko goba magi, ci en ocito okok ki woko.

Ka ceng ocako tuc odiko me Ceng Abic, lulam dog gutero Yecu i Sanedrin, ot cokkegi madit. Kany gin guloko pi gin ma gibitimo i kome. Gutere bot Pontio Pilato, laloc me distrik me Judaya.

Lulam dog guwaco ki Pilato ni: ‘Man laco marac. Myero kinek woko.’ I nge penyo Yecu lapeny mogo, Pilato owaco ni: ‘An pe aneno ni en otimo gin mo marac.’ Ci Pilato ocwalo Yecu bot Kerode Antipac. Kerode aye laloc me Galilaya, ento en bedo Jerucalem. Kerode bene pe neno ni Yecu otimo gin mo marac, pi meno en odwokke cen bot Pilato.

Pilato mito ni ewek Yecu woko. Ento lukwor pa Yecu gimito ni lamabuc mukene aye myero kigony. Laco man aye Baraba, ma layak-ki. Kombeddi dong cwiny dyeceng i kare ma Pilato okelo Yecu woko. En owaco bot lwak ni: ‘Nenu! Kabakawu!’ Ento lulam dog madito gugamo ni: ‘Kwany en woko. Neke woko! Neke woko!’ Pi meno Pilato ogonyo Baraba, ci gukwanyo Yecu gutero woko me aneka.

I otyeno me Ceng Abic kiguro Yecu i kom yat. Pe itwero nenogi i cal-li, ento i nget Yecu tung ryoryo, bene kiguro iye lutur cik aryo i kom yat. Ma Yecu dong cok ki to, ngat acel i kin lutur cik-ki owaco bote ni: ‘Po pira ka idonyo i kerri.’ Ci Yecu ogamo ni: ‘Acikke boti ni ibibedo kweda i Paradic.’

Meno pe cikke ma mwonya tutwal? In ingeyo Paradic ma Yecu oloko pire-ni? Paradic ma Lubanga oyubo i acakki-ni onongo tye kwene? Ada, onongo tye i wi lobo. Dong ka Yecu biloc macalo kabaka i polo, en dok bidwoko laco-ni cen i kwo wek onong mit me Paradic manyen i lobo. Cwinywa pe twero bedo yom pire?

Matayo 26:57-75; 27:1-50; Luka 22:54-71; 23:1-49; Jon 18:12-40; 19:1-30.



Peny

  • Anga ma bal mukwongo me to pa Yecu ocung i wiye?
  • Gin ango ma lukwena gutimo i kare ma gicwalo Yecu bot ludito dini?
  • Ngo ma otimme ki i ot pa Kayapa lalam dog madit?
  • Pingo Petero oa woko ci oywayo koko?
  • Inge dwogo Yecu bot Pilato, lulam dog dok guwor ningo?
  • Gin ango ma gutimo i kom Yecu i dye ceng me Ceng abic, dok cikke ango ma en omiyo bot labal ma giguro i kom yat cok ka ngete ni?
  • Paradic ma Yecu oloko pire-ni bibedo kwene?

Peny mukene

  • Kwan Matayo 26:57-75.

    I yo ango ma jo me kot mamalo pa Lujudaya gunyuto kwede ni cwinygi onongo col mada? (Mat. 26:59, 67, 68)

  • Kwan Matayo 27:1-50.

    Pingo watwero waco ni cwer cwiny pa Juda-ni pe oa ki i cwinye? (Mat. 27:3, 4; Mar. 3:29; 14:21; 2 Kor. 7:10, 11)

  • Kwan Luka 22:54-71.

    Pwony ango ma watwero nongo i kit ma Petero okwero kwede Yecu i dye wor ma gidote ci gimakke iye-ni? (Luka 22:60-62; Mat. 26:31-35; 1 Kor. 10:12)

  • Kwan Luka 23:1-49.

    Yecu otimme nining pi tim bwami ma onongo kitimo i kome, dok pwony ango ma watwero nongo ki i kop meno? (Luka 23:33, 34; Rom. 12:17-19; 1 Pet. 2:23)

  • Kwan Jon 18:12-40.

    Gin ango ma nyuto ni kadi bed ni lworo dano ogoyo Petero marac i cawa mo manok, en obijing ci odoko lakwena matek mada? (Jon 18:25-27; 1 Kor. 4:2; 1 Pet. 3:14, 15; 5:8, 9)

  • Kwan Jon 19:1-30.

    Tam ma opore madok i kom jammi me kom ango ma Yecu obedo kwede? (Jon 2:1, 2, 9, 10; 19:23, 24; Mat. 6:31, 32; 8:20)

    Lok dog Yecu ma en dong cok ki to onyuto kamaleng loyo lwennye me oilo malo rwom pa Jehovah macalo latwer ducu nining? (Jon 16:33; 19:30; 2 Pet. 3:14; 1 Jon 5:4)