ITWERO tito gin ma anyaka matidi-ni gin ki luwote gitye ka kwano? Ada, buk man ma itye ka kwanone-ni kikome—Buka me Ododo me Baibul. Dok gin bene gitye ka kwano ododo ma in itye ka kwano-ni kikome—“Kit Ma Watwero Kwo Kwede Nakanaka.”

Latin awobi tye ka kwan

In ingeyo ngo ma gitye ka pwonyo? Mukwongo, ni omyero wange lok i kom Jehovah gin ki Wode Yecu Kricito ka wamito kwo nakanaka. Baibul waco ni: ‘Man aye yo me kwo nakanaka. Nge lok i kom Lubanga acel me ada, kacel ki Wod ma ecwalo i lobo, Yecu Kricito.’

Watwero ngeyo lok i kom Jehovah gin ki Wode Yecu Kricito nining? Yo acel aye me kwano Bukka me Ododo me Baibul a i acakkine nio wa i agikkine. Buk-ki tito lok mapol i kom Jehovah gin ki Yecu, pe kumeno? Dok tito bene lok i kom jami mapol ma gin gutimo kacel ki jami ma gin pud gibitimo. Ento omyero watim makato kwano buk man akwana keken.

Baibul

Itye ka neno buk mukene ma obuto i dye ot-ti? Man Baibul. Wek ngat mo okwan boti but Baibul ka ma ododo me buk man oa iye. Baibul miyowa ngec muromo ma wamito wek wan ducu wati pi Jehovah i yo ma atir wek wanong kwo ma pe tum. Myero walok odok kitwa me kwano Baibul kare ki kare.

Ento ngeyo Jehovah gin ki Yecu Kricito angeya keken pe romo. Watwero nongo ngec matut mapol adada i komgi ki i kom pwonygi, ento pud pe biweko wanongo kwo ma pe tum. Ingeyo ngo mukene ma mitte?

Wan bene omyero wakwo i yo ma lubbe ki jami ma wakwano. Wi po i kom Juda Lakeriot? En obedo ngat acel i kin jo 12 ma Yecu oyero me bedo lukwenane. Juda onongo tye ki ngec madwong mada i kom Jehovah gin ki Yecu. Ento ngo ma otimme i kome? I nge kare manok en odoko ngat ma paro pire kene, ci odoto Yecu pi ryal 30. Pi meno Juda pe binongo kwo ma pe tum.

Wi po i kom Gikaji, laco ma wakwano lok i kome i Ododo 69? En omito bongo ki cente ma pe mere. Pi meno en oloko lok goba me nongo jami magi. Ento Jehovah opwode. Dok en bipwodowa bene ka pe walubo cikke.

Ento tye jo mabeco mapol ma gutiyo pi Jehovah ma gin lugen. Wan wamito ni wabed calo gin, pe kumeno? Camuel ma onongo pud tidi obedo lanen maber me aluba. Po ni, kit ma waneno kwede i Ododo 55, en onongo pud tye ki mwaka angwen nyo abic keken i kare ma ocako tic pi Jehovah i kemane. Pi meno kadi dong in ititdi ningo, pe itidi ma pe iromo tic pi Jehovah.

Ngene ni, ngat ma wan ducu wamito ni walub aye Yecu Kricito. Kadi i kare ma en pud awobi matidi, kit ma kinyuto kwede i Ododo 87, en onongo tye i ot pa Lubanga kunnu ka lok ki jo mukene i kom Wonne ma i polo. Walubu lanenne. Watitu lok i kom Jehovah Lubangawa me aura gin ki Wode, Yecu Kricito bot dano mapol kit ma watwero. Ka watimo jami magi, ci wabiromo kwo nakanaka i paradic manyen pa Lubanga i wi lobo.

Jon 17:3; Jabuli 145:1-21.



Peny

  • Ngo ma myero wange ka wamito ni wabed ki kwo ma pe tum?
  • Watwero pwonyo lok i kom Lubanga Jehovah ki Yecu, kit ma latin anyaka man ki lureme gunyuto kwede nining?
  • Buk mukene mene ma tye nen i cal-li, dok pingo myero wabed ka kwano-ne kare ducu
  • Ma pat ki pwonyo lok i kom Jehovah gin ki Yecu, gin ango mukene ma mitte pi nongo kwo ma pe tum?
  • Pwony ango ma wanongo ki i Ododo me 69?
  • Lanen maber ango ma Camuel ma onongo pud tidi onyuto i Ododo me 55?
  • Watwero lubo lanen pa Yecu Kricito nining, dok ka watimo meno, ci ma wabitwero timo gin ango i anyim?

Peny mukene

  • Kwan Jon 17:3.

    Ginacoya nyuto nining ni bedo ka nongo ryeko i kom Lubanga Jehovah gin ki Yecu Kricito tyen lokke kato mako ngec i wic keken? (Mat. 7:21; Yak. 2:18-20; 1 Jon 2:17)

  • Kwan Jabuli 145:1-21.

    Tyen kop mapol ango ma watye kwede me pako Jehovah? (Jab. 145:8-11; Yabo. 4:11)

    Jehovah ‘ber bot jo ducu’ nining, dok man omyero okelowa cok ki en nining? (Jab. 145:9; Mat. 5:43-45)

    Ka wamaro Jehovah ki cwinywa ducu, ci bicwalwa me timo gin ango? (Jab. 119:171, 172, 175; 145:11, 12, 21)