GIN ango ma itye ka nenone kany? Ada, lumony ma gitye i wi aguragura matar. Ento nen kong ka ma gitye ka a ki iye. Aguragura magi gitye ka ngwec kun gia ki i polo dok ki i wi pol! Aguragura mono tye i polo ada?

Yecu ma dong tye Kabaka i polo

Pe, man pe aguragura kikome. Wangeyo ni tye kit man pien aguragura pe gitwero ngwec i pol, pe kumeno? Ento Baibul gire tito pi aguragura ma i polo. In ingeyo pingo?

Tye kuman pien i kare macon kitiyo ki aguragura tutwal i lweny. Pi meno Baibul tito pi jo ma gingweco ki aguragura gibino piny ki i polo me nyuto ni Lubanga mito lweny ki dano ma i lobo. In ingeyo kabedo me lweny man kit ma kilwongo kwede? Armagedon. Meno lweny me tyeko gin maraco ducu ki i lobo.

Yecu aye ngat ma bitelo lweny man i Armagedon. Po ni, Yecu aye ngat ma Jehovah oyero me bedo kabaka me Gamentene. Meno aye gin mumiyo Yecu ruko otok pa kabaka. Dok pala lucwan nyuto ni en bineko lukwor pa Lubanga ducu. Myero mono wabed ki ur ni Lubanga tyeko jo maraco?

Dok cen inen Ododo me 10. Itye ka neno gin ango kunnu? Ada, Pii Aluka madit ma otyeko jo maraco. Anga ma okelo Pii Aluka meno? Lubanga Jehovah. Kombeddi nen Ododo me 15. Gin ango ma tye ka timme kunnu? Codom ki Gomora kitye ka wangogi woko i mac ma Jehovah ocwalo.

Lokke i dok cen i Ododo me 33. Nen ngo ma tye ka timme i kom aguragura ki gadigadi lweny pa Luejipt. Anga ma omiyo pii obino ocorre i komgi? Jehovah. En otimo man pi gwoko jone. Nen Ododo me 76. Ibineno bene kunnu ni Jehovah oweko kadi wa jone kikome, Luicrael, kinekogi pi rac kitgi.

Pi meno, pe dong myero waur ni Jehovah bicwalo monnye me polo pi giko gin maraco ducu ki i lobo. Ento tam kong te lok meno! El pot karatac-ci wek wanenu.

Niyabo 16:16; 19:11-16.



Peny

  • Pingo Baibul loko pi aguragura ma i polo?
  • Lweny pa Lubanga ki jo maraco ma i lobo-ni gilwongo nyinge ningo, dok lweny man tye pi yub ango?
  • Ki i cal-li, anga mono ma bitelo wi lweny meno, pingo en dok oruko lalukana, dok pala lucwan-ne ni tyen lokke ngo?
  • Ka idok cen i Ododo me 10 me 15 ki me 33, pingo myero pe wabedo ki ur ni Lubanga obijwero jo maraco woko?
  • Ododo me 36 ki 76 nyuto botwa nining ni Lubanga bijwero jo maraco woko kadi bed gitimme ni giworo en?

Peny mukene

  • Kwan Niyabo 19:11-16.

    Ginacoya onyuto ni Yecu Kricito aye obedo ngat ma tye ka ngwec ki aguragura matarri nining? (Yabo. 1:5; 3:14; 19:11; Ic. 11:4)

    Remo ma kikiro i kom gin aruka pa Yecu ma woko-ni moko ni loyo lweny-nye bicobbe mapwot labongo akalakala nining? (Yabo. 14:18-20; 19:13; Ic. 63:1-6)

    Anga-gi ma nen calo giketogi bene i kin lulweny ma gitye ka lubo Yecu ma tye i wi aguragura matarri? (Yabo. 12:7; 19:14; Mat. 25:31, 32)