LACO ma ogungo kany-nyi aye Citefano. En obedo lapwonnye ma genne pa Yecu. Ento nen kong gin ma tye ka timme i kome kombeddi! Jo magi gitye ka bayo gweng madongo i kome. Pingo gidag Citefano kuman mumiyo gitye ka timo gin marac kit man? Wanenu kong.

Kitye ka celo Citefano ki gweng

Lubanga obedo ka konyo Citefano me timo tango mapol me aura. Co magi pe gimaro ticce-ni, pi meno gin gucako pyem kwede ka en pwonyo lwak ki ada. Ento Lubanga omiyo ryeko madit bot Citefano, dok Citefano onyuto woko ni jo magi gubedo ka pwonyo lok goba. Man omedo akemogi dong makato. Pi meno gumake, ci gulwongo dano me tito lok goba i kome.

Lalam dog madit openyo Citefano ni: ‘Lok magi tye atir?’ Citefano ogamo kun miyo pwony maber ma a ki i Baibul. I agikkine lokke, en otito kit ma jo maraco gudago kwede lunebi pa Jehovah i kare mukato i ngec. Ci en owaco ni: ‘Wun wurom aroma ki jo meno. Wuneko Yecu latic pa Lubanga, dok bene pe wulubo cik pa Lubanga.’

Man omiyo kiniga omako ludito dini adada! Gukayo lakgi ki akemo. Ento Citefano gire oilo wiye malo, ci owaco ni: ‘Nen! Atye ka neno Yecu ocung ka nget Lubanga yo tung acuc i polo.’ Ka guwinyo meno guketo cinggi i itgi ci gumwomme i kom Citefano. Gumake ci guywaye gutere i nge boma.

Kany gin gulunyo bongogi ci gumiyo bot awobi mo ma nyinge Caulo me gwokone. In itye ka neno Caulo? Ci jo mogo gucako celo Citefano ki gweng. Citefano ogungo piny, kit ma ineno kwede-ni, ci en olego Lubanga ni: ‘Jehovah, pe ipwodgi pi gin marac man.’ En ngeyo ni jo mogo i kin-gi lutela dini aye obwologi. I nge meno Citefano oto.

Ka ngat mo otimo gin marac i komi, in itemo wane bene, nyo i kwayo Lubanga ni owane? Meno aye pe gin ma Citefano nyo Yecu otimo. Gin onongo ber kadi wa bot jo ma pe ki kica i komgi.

Tic pa Lukwena 6:8-15; 7:1-60.



Peny

  • Citefano obedo anga, dok tic ango ma Lubanga obedo ka konnye me timo?
  • Gin ango ma Citefano owaco ma okelo keco bot ludito dini?
  • I kare ma co meno guywayo Citefano woko i nge boma, gin ango ma gutimo i kome?
  • Ki i cal-li, awobi mene ma ocung i nget bongi ni?
  • Ma peya en oto, gin ango ma Citefano olego pire bot Jehovah?
  • I poro Citefano, gin ango ma myero watim ka ngat mo otimo gin mo marac i komwa?

Peny mukene

  • Kwan Tic pa Lukwena 6:8-15.

    Tic bwolo ango ma ludito dini gutiyo kwede me temo juko tic me pwony pa Lucaden pa Jehovah? (Tic 6:9, 11, 13)

  • Kwan Tic pa Lukwena 7:1-60.

    Gin ango ma okonyo Citefano me lok pi kwena man maberri iyo ma ocwiny i nyim jo me Canedrin, dok gin ango ma watwero pwonyo ki i lanen-ne? (Tic 7:51-53; Rom. 15:4; 2 Tem. 3:14-17; 1 Pet. 3:15)

    Kit cwiny ango ma omyero wabed kwede i kom jo ma gikwero ticwa? (Tic 7:58-60; Mat. 5:44; Luka 23:33, 34)