KONG wadoku cen mwaka manok i ngec ma onongo peya Ejira ocito Jerucalem. Mordekai gin ki Esta aye onongo Luicrael ma pigi tek i ker me Percia. Esta aye onongo daker, dok Mordekai wod pa omin wonne aye onongo ditte lubo pa kabaka. Kong wanenu kit ma man otimme kwede.

Lunyodo pa Esta guto ma en onongo pud tidi tutwal, pi meno Mordekai aye opite. Akacwero, kabaka me Percia, tye ki gange i boma me Cuca, dok Mordekai obedo ngat acel i kin luticce. Dong, i nino mo acel Vasti, dako pa kabaka pe owinye, pi meno kabaka oyero dako manyen me bedo dakerre. In ingeyo dako ma en oyero-ni? Ada, Esta maber mamwonya tutwal-li.

Aman cwiny ocwer i kom Mordecai

In itye ka neno laco ma lawaka ma dano tye ka kulle bote-ni? Man aye Aman. En ngat ma pire tek mada i Percia. Aman mito ni Mordekai, ma in itwero neno obedo piny kany-nyi, okulle i nyime bene. Ento Mordekai pe kulle wacel. En pe neno ni obedo gin maber me kulle bot dano ma kite rac kuman. Man oweko akemo omako Aman matek. Dong man aye gin ma en otimo.

Aman otito bot kabaka lok goba i kom Luicrael. En owaco ni: ‘Gin jo maraco ma pe gilubo cikki. Omyero kinekgi woko.’ Akacwero pe ngeyo ni dakone Esta Laicrael. Pi meno en owinyo lok pa Aman, ci omiyo kiketo cik ma ocimo nino ma Luicrael ducu omyero kinekgi woko iye.

I kare ma Mordekai owinyo pi cik-ki, cwinye ocwer mada. En ocwalo kwena bot Esta ni: ‘In myero iwac ki kabaka, dok ikwaye me larowa.’ Obedo turo cik i Percia me cito ka lok ki kabaka ka pe kilwongi. Ento Esta ocito bote ma pe kilwonge. Kabaka oilo odo jabune bote, ma tere ni omyero pe kineke. Esta olwongo kabaka gin ki Aman me cito i karama mo madit. Ki kunnu kabaka openyo Esta gin ma en mito ki bote. Esta owaco ni en ebiwacce ka en gin ki Aman gibibino i karama mukene i nino ma lubo meno.

I dog cam meno Esta otito ki kabaka ni: ‘An wan ki jona kibinekowa woko.’ Akemo omako kabaka woko. En openyo ni: ‘Meno anga ma ete ka timo gin ma kit meno?’

Esta ogamo ni: ‘Laco, ma kite rac-ci, ma lakwor-ri, aye Aman eni!’

Daker Esta tye ka doto Aman

Kombeddi akemo dong omako kabaka adada. En omiyo cik ni kinek Aman woko. I ngeye, kabaka oketo Mordekai me bedo ngat ma twero me ditte lubo mege-ni keken. Ci Mordekai dong oneno ni kiketo cik manyen ma miyo Luicrael twero lweny pi kwogi i nino ma omyero onongo kinekgi iye. Pien Mordekai dong tye ngat ma pire tek kombeddi, jo mapol gukonyo Luicrael, ci gin gubwot ki i cing lukworgi.

Esta buk me Baibul.



Peny

  • Mordekai gin ki Esta gubedo nga?
  • Pingo Kabaka Akacwero mito dako manyen, dok anga ma en oyero?
  • Aman obedo anga, dok kiniga omake pi gin ango?
  • Cik ango ma giketo, dok ngo ma Esta otimo i kare ma en onongo kwena ki bot Mordekai?
  • Ngo ma otimme i kom Aman, dok gin ango mutimme i kom Mordekai?
  • Gilaro jo Icrael ki bot lukworgi nining?

Peny mukene

  • Kwan Esta 2:12-18.

    Esta onyuto ni pire tek me nyako ‘cwiny me mwolo’ nining? (Esta 2:15; 1 Pet. 3:1-5)

  • Kwan Esta 4:1-17

    Kit macalo gimiyo kare ki Esta me cung pi woro me ada, kare ango ma gimiyo botwa kombeddi me nyuto woro bot Jehovah? (Esta 4:13, 14; Mat. 5:14-16; 24:14)

  • Kwan Esta 7:1-6

    Jo pa Lubanga mapol giloyo ki aunauna calo Esta nining? (Esta 7:4; Mat. 10:16-22; 1 Pet. 2:12)