WI PO winyo pi awobe adek magi? Ada, gin aye lurem Daniel ma gukwero camo gin ma onongo pe ber pigi me acama. Jo Babilon olwongogi ni Cadrak, Mecak ki Abednego. Ento kong inen-gi kombeddi. Pingo gin pe gitye ka ryebbe piny i nyim twon cal apaya man calo jo mukene-ni ducu? Kong wanenu.

Wi po i kom cik ma Jehovah kikome aye ocoyo ma kilwongo ni Cik Apar-ri? Cik mukwongo ki i kin cik magi aye ni: ‘Pe iwor lubanga mukene kono an kena.’ Awobe ma kany-nyi gitye ka lubo cik man, kadi bed pe obedo gin ma yot me atima.

Nebukadnejar, kabaka me Babilon, olwongo ludito mapol ma pigi tego me woro cal man ma en oketo-ni. En onongo pud otyeko wacone awaca bot dano ducu ni: ‘Ka wuwinyo dwan bila, opuk, ki jami wer agoya mukene, omyero wuryebbe piny ci wuwor cal jabu man. Ngat mo ma pe oryebbe piny ci oworo kibibolone cut i keno malyet ma tye ka lyel mac.’

Ka Nebukadnejar ongeyo ni Cadrak, Mecak, ki Abednego pe guryebbe piny, kiniga omake matek. En oweko kikelogi bote. En dok omiyogi kare mukene me ryebbe piny. Ento awobe-ni gigeno Jehovah. Gin guwaco ki Nebukadnejar ni: ‘Lubangawa ma watiyo pire-ni twero larowa. Ento kadi en pe olarwa, wan pe wabiryebbe piny i nyim cal jabuni-ni.’

Cadrak, Mecak ki Abednego

Ka owinyo man, akemo pa Nebukadnejar omedde ameda. Keno mo tye cok kenyo ci en ociko ni: ‘Wulyet keno malyette kato macon ca tyen abiro!’ Ci en omiyo co ma tego loyo ki i monnye me tweyo Cadrak, Mecak, ki Abednego dok me bologi i keno. Keno onongo lyet tutwal ma omiyo mac oneko co matego-ni woko. Ento awobe adek ma gin gubolo i iye ni kono?

Kabaka oneno i keno ci odoko lwor adada. En openyo ni: ‘Wan pe watweyo co adek ci wabologi i keno malyet-ti?’

Luticce gugamo ni: ‘Ee, wabologi do.’

En owaco ni: ‘Ento aneno jo angwen gitye ka wot i dye mac. Pe kitweyogi, dok mac pe tye ka wanogi. Dok ngat me angwenne-ni nen calo lubanga.’ Kabaka ocito cok ki dogola keno ka odangnge ni: ‘Cadrak! Mecak! Abednego! Wubin woko, wun lutic pa Lubanga Mamalo Twal!’

I kare ma gukatti woko, ngat mo keken twero neno ni gin mo pe owanogi. Ci kabaka owaco ni: ‘Wek kipak Lubanga pa Cadrak, Mecak, ki Abednego! En ocwalo lamalaikane ci olarogi pien pe giryebbe piny ci giworo kit lubanga mo kono ka megi-ni keken.’

Man pe lanen maber tutwal me bedo jo ma genne bot Jehovah ma myero walubi?

Nia 20:3; Daniel 3:1-30.



Peny

  • Cik ango ma Nebukadnejar, kabaka me Babilon omiyo bot dano?
  • Pingo lurem Daniel adekki gukwero ryebbe piny i nyim cal me jabu?
  • I kare ma Nebukadnejar omiyo kare bot jo Ibru adekki me ryebbe piny, gin gunyuto ni giketo gen-gi i kom Jehovah nining?
  • Gin ango ma Nebukadnejar oweko jo-ne otimo i kom Cadrak, Mecak, ki Abinego?
  • Gin ango ma Nebukadnejar oneno i kare ma en tye ka neno ruk mac?
  • Pingo kabaka dok opako Lubanga pa Mecak, Cadrak ki Abinego, dok man miyo botwa lanen ango?

Peny mukene

  • Kwan Daniel 3:1-30.

    Cwiny ango ma awobe Ibru adekki gunyuto ma myero lutic pa Lubanga ducu gulubi ka gukemme ki atematema i kom niye-gi? (Dan. 3:17, 18; Mat. 10:28; Rom. 14:7, 8)

    Pwony ango mapire tek ma Jehovah opwonyo kwede Nebukadnejar? (Dan. 3:28, 29; 4:34, 35)