NEN kong jo ma gitye ka nywaro awobi-ni. In ingeye? Man aye Jeremia. En obedo lanebi pa Lubanga ma pire tek tutwal.

Dano gunyero Jeremia

Cutcut i nge kare ma Kabaka Yocia ocako jwero cal jogi woko ki i lobo Icrael, Jehovah owaco ki Jeremia me bedo Lanebine. Ento Jeremia tamo ni en pud etidi tutwal me bedo lanebi. Ento Jehovah owaco ni Ebikonye.

Jeremia otito bot jo Icrael me weko tim maraco. En owaco ni: ‘Lubanga ma lurok giworo-ni obedo lubanga me goba.’ Ento jo Icrael mapol onongo gimito woro cal ma ka woro Jehovah Lubanga me ada. I kare ma Jeremia owaco botgi ni Lubanga bipwodogi pi rac kitgi, gin gunyere anyera.

Mwaka mapol okato. Yocia oto, ci lacen i nge dwe adek wode Yekoyakim odoko kabaka. Jeremia omedde ki lok ki lwak ni: ‘Ka pe wuloko timwu maraco-ni Jerucalem kibituro woko.’ Lulam dog gumako Jeremia ci gudange ni: ‘In omyero kineki woko pi waco lok magi.’ Ci guwaco bot rwodi me Icrael ni: ‘Jeremia myero kinek woko, pien en oloko marac i kom bomawa.’

Jeremia dong bitimo gin ango? En pe lwor! En owaco botgi ducu ni: ‘Jehovah ocwala me tito pi jami magi botwu. Ka pe wuloko kitwu maraco-ni, Jehovah obituro Jerucalem woko. Ento myero wunge man: ‘Ka wuneka, nongo wuneko dano ma pe otimo bal mo.’

Rwodi magi guweko Jeremia ma kwo, ento jo Icrael pe guloko kitgi maraco-ni. Lacen Nebukadnejar, kabaka me Babilon, obino olwenyo i kom Jerucalem. I ngeye Nebukadnejar omiyo jo Icrael gudoko luticce. En ocokogi alip mapol oterogi Babilon. Tam kong kit ma bedo kwede, ka jo mo mapat ma pe kingeyo, okwanyowu ki i pacowu oterowu i lobo mo mapat!

Jeremia 1:1-8; 10:1-5; 26:1-16; 2 Luker 24:1-17.



Peny

  • Awobi ma tye i cal-li anga?
  • Jeremia otamo ningo pi bedo-ne macalo lanebi, ento gin ango ma Jehovah owacce?
  • Kwena ango ma Jeremia obedo ka tito pire kare ducu bot dano?
  • Lulam dog gutemo juko Jeremia nining, ento en onyuto nining ni en pe elwor?
  • Ngo ma otimme i kare ma jo Icrael pe guloko yo me kwogi marac-ci?

Peny mukene

  • Kwan Jeremia 1:1-8.

    Kit ma lanen pa Jeremia nyuto kwede, gin ango ma miyo dano twero timo tic pa Jehovah? (2 Kor. 3:5, 6)

    Lanen pa Jeremia miyo cuko cwiny ango bot Lukricitayo ma bulu i kare man? (Latit. 12:1; 1 Tem. 4:12)

  • Kwan Jeremia 10:1-5.

    Labol magwa ango ma Jeremia otiyo kwede me nyuto ni cal lubanga-gu pe miyo kony mo? (Jer. 10:5; Ic. 46:7; Kab. 2:19)

  • Kwan Jeremia 26:1-16.

    Ka gitye ka ciko dano i kare-ni, udong jo ma giwirogi giketo i cwinygi cik pa Jehovah bot Jeremia ‘pe me weyo lok mogo ma tye’ nining? (Jer. 26:2; Nwo. 4:2; Tic 20:27)

    Lanen maber ango ma Jeremia onyuto pi Lucaden pa Jehovah i kom kare-ni ma dok i kom cwalo kwena pa Jehovah me ciko jo me lobo? (Jer. 26:8, 12, 14, 15; 2 Tem. 4:1-5)

  • Kwan 2 Luker 24:1-17.

    Adwogi marac ango ma obino i kom Juda pi bedo labongo niye i kom Jehovah? (2 Luker 24:2-4, 14)