Cit atir i jami ma tye

Cit atir ka ma nyuto lok ma tye iye

Lucaden pa Jehovah

Yer leb Acholi

Ododo me 73: Kabaka pa Icrael me Agikki ma Kite Ber

Ododo me 73: Kabaka pa Icrael me Agikki ma Kite Ber

YOCIA onongo tye ki mwaka aboro keken i kare ma en odoko kabaka me kaka aryo me Icrael ma kupiny-nyi. Man mwaka manok tutwal pi ngatti mo me doko kabaka. Pi meno i acakkine ludongo mogo kong gukonye me loyo lobo Icrael.

Ma Yocia dong obedo kabaka pi mwaka abiro ci en ocako yenyo Jehovah. En olubo lanen pa kabaka mogo ma kitgi beco calo Daudi, Yekocapat, ki Kejekia. Dok ma en pud awobi me mwaka apar ki wiye, Yocia otimo gin me tekcwiny adada.

Kabaka Yocia ki jone tye ka ngido cal jogi woko

Pi kare malac onongo dong jo Icrael mapol kitgi odoko raco adada. Gin onongo giworo lubanga me goba. Gigungo i nyim cal. Pi meno Yocia ocito woko ki jone me tyeko te woro me goba woko ki i lobo. Man obedo tic madit adada pien jo mapol onongo giworo lubanga me goba. In itwero neno Yocia ki jone kany ka gitye ka ngido cal woko.

I ngeye, Yocia oketo co adek me loyo tic me roco ot pa Jehovah. Gijogo cente ki bot dano ci gimiyo bot co magi me culo pi tic ma bitine. Ma onongo gitye ka tic i kom ot pa Lubanga, Ilkia, lalam dog madit onongo gin mo ma pire tek tutwal kunnu. Buk me cik kikome ma Jehovah omiyo Moses ocoyo i kare macon adada. Onongo orweny woko pi mwaka mapol.

Kitero buk-ki bot Yocia, ci en owaco ni gikwanne. Ka en tye ka winyo, Yocia oneno ni dano onongo pe gitye ka lubo cik pa Jehovah. Man owango cwinye tutwal, pi meno en oyeco bongone woko, kit ma itwero neno kwede kannyi. En owaco ni: ‘Jehovah tye ki akemo i komwa, pien wegiwa pe gugwoko cik ma gicoyo i buk man.’

Capan ki Kabaka Yocia

Yocia omiyo cik bot lalam dog madit Ilkia me niang gin ma Jehovah bitimo i komgi. Ilkia ocito bot Kulda, ma obedo lanebi ma dako, ci openye. En omiyo bote kwena man ma oa ki bot Jehovah me dok kwede bot Yocia: ‘Jerucalem kacel ki lwak ducu binongo pwod pien guworo lubanga me goba dok piny ducu opong woko ki tim maraco. Ento pien in, Yocia, itimo gin maber, pwod man pe bibino nio wa i nge toni.’

2 Tekwaro 34:1-28.



Peny

  • Yocia odoko Kabaka onongo tye ki mwaka adi, dok en ocako timo ngo i kare ma en dong obedo kabaka pi mwaki abiro?
  • Ngo ma i neno Yocia tye ka timo i cal mukwongo ni?
  • Ngo ma lalam dog madit onongo i kare ma gitye ka tic me roco ot pa Lubanga?
  • Pingo Yocia oyeco bongo-ne iye aryo?
  • Kwena ango ma oa ki bot Jehovah ma dako ma lanebi Kulda omiyo bot Yocia?

Peny mukene

  • Kwan 2 Tekwaro 34:1-28.

    Lanen ango ma Yocia onyuto pi jo ma cawa mukene nongo guciro can i kare ma pud gin lutino? (2 Tekwaro 33:21-25; 34:1, 2; Jab. 27:10)

    Yo ango ma Yocia okwanyo me dongo woro me ada i mwaka me 8, 12, ki 18 me locce? (2 Tekwaro 34:3, 8)

    Pwony ango ma wa twero pwonyo i kom yubo kabedo wa me woro ki i lanen ma Kabaka Yocia gin ki Lalam dog madit Ilkia guketo? (2 Tek. 34:9-13; Car. 11:14; 1 Kor. 10:31)