MAN cal paradic ma romo bedo rom ki en ma Lubanga onyuto bot lanebine Icaya-ni. Icaya okwo cokcok ki kare pa Yona.

Dano i Paradic

Paradic te lokke ni “poto.” Man poyo wi i kom gin ma dong wakwano woko i buk-ki? Nen calo poto maber ma Lubanga Jehovah oyubo pi Adam gin ki Kawa-ni, pe kumeno? Ento lobo ducu mono bidoko paradic?

Jehovah owaco bot lanebine Icaya me coyo lok i kom paradic manyen ma tye ka bino pi jo pa Lubanga. En owaco ni: ‘Orudi ki romi bibedo kacel ki kuc. Lutino dyangi bicam kacel ki lutino labwor, dok lutino matitino aye bigwokogi. Kadi latin matitidi bene pe binongo awano ka tuko i nget twol ma kwire rac.’

Jo mapol gibiwaco ni: ‘Man pe twero timme matwal. Cakke con ayelayela onongo tye i lobo, dok pud bimedde ki bedo tye.’ Ento kong itam: Kit paco ango ma Lubanga omiyo bot Adam gin ki Kawa?

Lubanga oketo Adam gin ki Kawa i paradic. Pi kwero winyo Lubanga aye oweko gin gurwenyo pacogi maber-ri, guti ci guto. Lubanga ocikke ni ebimiyo bot jo ma gimare jami ma Adam gin ki Kawa gurwenyo-ni kikome.

I paradic manyen ma tye ka bino-ni gin mo pe ma bikelo awano nyo to. Kuc kikome bibedo tye. Dano ducu bibedo ki yomcwiny dok ki yot kom. Obibedo kit ma con Lubanga onongo omito ni obed kwede i acakki-ni. Ento lacen wabikwano kit ma Lubanga bitimo man kwede.

Icaya 11:6-9; Niyabo 21:3, 4.



Peny

  • Icaya obedo anga, dok en okwo i kare mene, ki dok ngo ma Jehovah onyuto bote?
  • "Paradic” tyen lokke ngo, dok man poyo wii i kom ngo?
  • Ngo ma Jehovah owaco bot Icaya ni oco i kom Paradic manyen?
  • Ngo mamwonya ma Adam gin ki Kawa gurwenyo?
  • Ngo ma Jehovah ociko pi jo ma maro en?

Peny mukene

  • Kwan Icaya 11:6-9.

    Lok pa Lubanga nyuto nining wat ma bibedo i kin lee ki dano i lobo manyen? (Jab. 148:10, 13; Ic. 65:25; Ejek. 34:25)

    Lok pa Icaya ango ma tye ka cobbe i kin Lucaden pa Jehovah i kom kare ni? (Roma. 12:2; Ep. 4:23, 24)

    Anga ma myero onong pwoc pi alokaloka ma tye ka nen i kwo pa dano ma i kare man, wa ki ma bibedo i lobo manyen? (Ic. 48:17, 18; Gal. 5:22, 23; Pil. 4:7)

  • Kwan Niyabo 21:3, 4.

    Ginacoya onyuto nining ni bedo pa Lubanga i kin dano-ni pe tere ni en bibedo i kom kwedgi ento i yo mapat doki? (Levi. 26:11, 12; 2 Tekwaro 6:18; Ic. 66:1; Yabo. 21:2, 3, 22-24)

    Kit pig wang ki arem ango ma gibikwanyo woko? (Luka 8:49-52; Rom. 8:21, 22; Yabo. 21:4)