MA PEYA Daudi oto, en omiyo bot Solomon cal ot ma Lubanga omiyo me yubo ot pa Jehovah. I mwaka me angwen me locce, Solomon ocako gero ot pa Jehovah, dok otero mwaka abiro ki nucu me tyekone. Co alip mapol gutiyo i kom ot-ti, dok gedo-ni otero lwak cente mapol adada. Man pien gitiyo iye ki jabu ki ryal madwong tutwal.

Ot pa Lubanga-ni onongo tye ki kicika aryo, calo kit ma ot kema-ni bene onongo tye kwede-ni. Ento kicika magi onongo gidongo dodo ma i kema ca kiryo. Solomon oweko giketo canduk me gicikke i kicika ma i iye loyo ki i ot pa Lubanga, ci jami mukene ma onongo gigwokogi i kema-ni kiketogi i kicika mukene-ni.

I kare ma gityeko yubo ot pa Lubanga, karama madit obedo tye. Solomon ogungo i nyim ot pa Lubanga ka olego, kit ma ineno kwede i cal-li. Solomon owaco bot Jehovah ni: ‘Kadi polo ducu bene pe romi me bedo, kara ot man kono dong matitidi-ni twero romi ningo. Ento, ai Lubangana, tim ber iwiny joni ka gilego kun gikemo kabedo man.’

Kabaka Solomon tye ka lega

I kare ma Solomon otyeko lega, mac oa ki i polo obino piny. Owango gitum lee ma gin guyubo-ni. Ci dero maleng ma oa ki bot Jehovah opongo ot pa Lubanga. Man nyuto ni Jehovah tye ka winyo, dok ni cwinye yom pi ot pa Lubanga-ni kacel ki lega pa Solomon. Ot pa Lubanga-ni, ma pe kema-ni, aye dong odoko ka ma dano gibino iye ka woro.

Solomon oloyo ki ryeko pi kare malac, dok dano gubedo ki yomcwiny. Ento Solomon onyomo mon mapol ki i lobe mukene ma pe giworo Jehovah. Itwero neno mo acel ma tye ka woro i nyim cal apaya-ni? Olo twal mon pa Solomon gumiyo en ocako woro lubanga mukene bene. I ngeyo gin mutimme i kare ma Solomon otimo man? En dong onongo pe loyo lwak i yo maber. En odoko ger, dok dano cwinygi onongo dong pe yom wacel.

Kabaka Solomon tye ka woro cal apaya

Man omiyo kiniga omako Jehovah i kom Solomon, ci owacce ni: ‘Abikwanyo ker woko ki boti ci amiyo bot laco mukene. Pe abitimo man ma nongo pud ikwo, ento i kare me loc pa wodi. Ento pe abikwanyo jo ducu ma i ker-ri ki bot wodi.’ Wanenu kit ma man otimme kwede.

1 Tekwaro 28:9-21; 29:1-9; 1 Luker 5:1-18; 2 Tekwaro 6:12-42; 7:1-5; 1 Luker 11:9-13.



Peny

  • Otero kare ma romene bot Solomon me tyeko gero ot me woro Jehovah, dok pingo ocwalo lwak lim mapol?
  • Kicika madongo adi ma onongo tye i ot pa Lubanga, dok gin ango ma giketo i kicika ma i iye-ni?
  • Gin ango ma Solomon oloko pire i lega-ne i kare ma gityeko tic me gero ot maleng?
  • Jehovah onyuto nining ni cwinye obedo yom pi lega pa Solomon?
  • Gin ango ma mon pa Solomon gumiyo en otimo, ci dong ngo ma otimme i kom Solomon?
  • Pingo kiniga omako Jehovah i kom Solomon, dok ngo ma Jehovah owacce?

Peny mukene

  • Kwan 1 Tekwaro 28:9, 10.

    Ma lubbe ki gin ma Daudi oloko i 1 Tekwaro 28:9, 10, ngo ma myero wayele matek me timo i kwowa me nino ducu? (Jab. 19:14; Pil. 4:8, 9)

  • Kwan 2 Tekwaro 6:12-21, 32-42.

    Solomon onyuto nining ni ot ma dano adana aye ogero pe twero romo gwoko Lubanga Mamalo Twal? (2 Tekwaro 6:18; Tic 17:24, 25)

    Gin ango ma lok pa Solomon ma nonge i 2 Tekwaro 6:32, 33 nyuto i kom Jehovah? (Tic 10:34, 35; Gal. 2:6)

  • Kwan 2 Tekwaro 7:1-5.

    I kit macalo Luicrael guwinyo cwiny me miyo pak bot Jehovah i kare ma guneno deyo-ne, i kom kare-ni ka wa lwodo pi mot pa Jehovah pi dano-ne ci omyero man ogud tamwa nining? (2 Tek. 7:3; Jab. 22:22; 34:1; 96:2)

  • Kwan 1 Luker 11:9-13.

    Kwo pa Solomon ducu, onyuto nining ni pire tek me bedo ki niye matek nio wa i agikki? (1 Luker 11:4, 9; Mat. 10:22; Yabo. 2:10)