SOLOMON onongo pud dano me mwaka apar ki wiye i kare ma en doko kabaka. En maro Jehovah dok lubo tam maber ma wonne Daudi omiye. Cwiny Jehovah yom i kom Solomon, pi meno i dyewor mo acel en owaco bote ki i wang lek ni: ‘Solomon, gin ango ma imito ni amini?’

Ka kenyo Solomon ogamo ni: ‘Jehovah Lubangana, an atidi tutwal dok pe angeyo kit me loc. Pi meno miya ryeko me loyo joni i yo ma atir.’

Cwiny Jehovah obedo yom i kom gin ma Solomon openyo. Pi meno En owaco ni: ‘Pien ipenyo pi ryeko dok pe pi kwo pi kare malac nyo pi lonyo, abimini ryeko makato pa ngat mo keken ma yam kong okwo con. Ento abimini bene gin ma pe ipenyo pirgi, lonyo wa ki deyo.’

Lacen i nge kare mo manok mon aryo gubino bot Solomon ki peko ma tyeko tek adada. Dako acel otito ni: ‘An wan ki dako man wabedo i ot acel. An anywalo latin laco, ci lacen i nge nino aryo en bene onywalo latin laco. Ci i dyewor mo acel latinne oto. Ento i kare ma anino woko, en oketo latinne muto-ni ka ngeta ci okwanyo latinna woko. I kare ma aco ci aneno latin muto-ni, anongo ni pe mega.’

Ka kenyo dako mukene-ni ogamo ni: ‘Pe! Latin makwo-ni mega, ento muto-ni mere!’ Dako mukwongo-ni ogamo ni: ‘Pe! Latin muto-ni megi, ento makwo-ni mera! Man aye kit ma mon-ni gilaro lok kwede. Solomon dong bitimo ngo?

En owaco ni gikel pala lucwan, ci, i kare ma kikelo, en owaco ni: ‘Tong ipok latin makwo-ni iye aryo, ci imi nucune bot dako acel acel.’

Min latin kikome okok ni: ‘Pe! Tim ber pe inek latin-ni. Mi bote!’ Ento dako mukene-ni owaco ni: ‘Pe imi bot ngat mo i kinwa; medde ki ticci, pok iye aryo.’

Kabaka Solomon tye ka ngolo kop mo matek

Lacen Solomon dong oloko ni: ‘Pe inek latin-ni! Miye bot dako mukwongo-ni. En aye min latin kikome.’ Solomon ngeyo man pien min latin kikome maro latin tutwal ma ye me miyone bot dako mukene ca wek pe kinek woko. I kare ma lwak guwinyo kit ma Solomon ocobo peko-ni, cwinygi obedo yom ni gitye ki kabaka maryek kumeno.

I kare me loc pa Solomon, Lubanga omiyo ngom oceko ngano ki bel, olok ki oduro kacel ki cam mukene mabub. Dano onongo giruko bongo mabeco dok onongo gibuto i odim abeco. Jami ducu mabeco onongo tye muromo dok makato pi jo ducu.

1 Luker 3:3-28; 4:29-34.



Peny

  • Ngo ma Jehovah openyo ki bot Solomon, dok en kono ogamo nining?
  • Pien en obedo ki yomcwiny i kom gin ma Solomon openyo, gin ango ma Jehovah ocikke me miye?
  • Peko matek ango ma mon aryo gutero bot Solomon?
  • Kit macalo ineno i cal-li, Solomon ocobo peko meno nining?
  • Loc pa Solomon obedo nining, dok pingo?

Peny mukene

  • Kwan 1 Luker 3:3-28.

    Gin ango ma co ma gimiyogi tic i dul pa Lubanga myero gupwony ki i lok ma oa ki i cwiny Solomon ma gicoyo i 1 Luker 3:7? (Jab. 119:105; Car. 3:5, 6)

    Gin ma Solomon openyo-ni tye calo lanen maber pi jammi matir ma myero waleg pire nining? (1 Luker 3:9, 11; Car. 30:8, 9; 1 Jon 5:14)

    Kit ma Solomon ocobo kwede larra i kin mon aryo-ni miyowa gen ango i kom loc me anyim pa Solomon Madit, Yecu Kricito? (1 Luker 3:28; Ic. 9:6, 7; 11:2-4)

  • Kwan 1 Luker 4:29-34.

    Jehovah ogamo lega pa Solomon pi cwiny me mwolo-ni nining? (1 Luker 4:29)

    Ma lubbe ki keto tek ma dano guketo me winyo ryeko pa Solomon, kit cwiny ango ma myero wabed kwede pi kwano Lok pa Lubanga? (1 Luker 4:29, 34; Jon 17:3; 2 Tem. 3:16)