Cit atir i jami ma tye

Cit atir ka ma nyuto lok ma tye iye

Lucaden pa Jehovah

Yer leb Acholi

Ododo me 59: Gin ma Omiyo Daudi Myero Oring Woko

Ododo me 59: Gin ma Omiyo Daudi Myero Oring Woko

MA DONG Daudi otyeko oneko Goliac, Abneri lawimony me Icrael okelo en bot Caulo. Cwiny Caulo obedo yom tutwal i kom Daudi. Omiyo en odoko ladit i monnye dok otero en me kwo i ot pa kabaka.

Lacen, i kare ma lumony gidwogo ki ka lweny i kom Lupiliciti, mon guwero ni: ‘Caulo oneko mere alip, ento Daudi alip apar.’ Man miyo nyeko mako Caulo, pien kimiyo deyo bot Daudi ma kato pa Caulo. Ento Yonacan wod pa Caulo pe nyek. En maro Daudi mada, dok Daudi maro Yonacan bene. Pi meno gin aryo-ni gucikke ngat man bot lawote ni gin gibibedo larem matwal.

Kabaka Caulo obayo tong i kom Daudi

Daudi onongo ngeyo goyo opuk tutwal, dok Caulo maro winyo wer ma en goyo. Ento i nino mo acel nyeko pa Caulo omiyo en otimo gin mo marac adada. I kare mo ma Daudi tye ka goyo opuk, Caulo okwanyo tongnge ci obayo, kun waco ni: ‘Abiguro Daudi woko i kor ot!’ Ento Daudi owene, ci tong pe ogude. Lacen Caulo doki obwot cobo Daudi ki tongnge. Pi meno Daudi dong ongeyo woko ni omyero egwokke mada.

Wi po i cikke pa Caulo? En ocikke ni ebimiyo nyare bot laco ma oneko Goliac. Caulo owaco ki Daudi ni dong twero tero nyare Mikal, ento en myero kong onek lukworgi Lupiliciti 100. Tam kong meno! Ada Caulo gire onongo geno ni Lupiliciti bineko Daudi woko. Ento gin pe guneke, dong pi meno Caulo omiyo nyare me doko dako pa Daudi.

I nino mo acel Caulo otito bot Yonacan kacel ki luticce ducu ni emito neko Daudi woko. Ento Yonacan owaco bot wonne ni: ‘Pe iwan Daudi. En pud peya otimo gin mo marac boti. Ma ka meno, jami ducu ma en otimo obedo me kony madit boti. En ojalo kwone ka neko Goliac, dok i kare ma ineno, cwinyi obedo yom.’

Daudi oweyo tong

Caulo owinyo wode, ci ocikke pe me wano Daudi. Kidwoko Daudi cen, ci en doki ocako tic pi Caulo i ode kit ma con ca. Ento, i nino mo acel, ma Daudi tye ka goyo wer, Caulo dok obayo Daudi ki i tongnge. Daudi opango ci tongngi ocobo kor ot. Man tyen me adek-ke! Daudi dong ongeyo ni omyero ering woko!

I dyewor meno Daudi ocito i ode. Ento Caulo ocwalo co mogo me neke. Mikal ongeyo gin ma wonne mito timo. Pi meno en owaco ki cware ni: ‘Ka pe ia woko i dyewor-ri, diki ibito woko.’ I dyewor meno Mikal okonyo Daudi me lwi woko ki i wang dirica. Pi mwaka ma romo abiro Daudi myero okane akana kun kobo a ki i kabedo moni cito i mukene wek Caulo pe ononge.

1 Camuel 18:1-30; 19:1-18.



Peny

  • Pingo nyeko omako Caulo i kom Daudi, ento Yonacan latin pa Caulo dok obedo pat nining?
  • Ngo ma otimme nino mo acel ma Daudi onongo tye ka goyo opuk ki Caulo?
  • Ngo ma Caulo owaco ni Daudi otim ma pud peya otero nyare Mikal me bedo dako-ne, dok pingo Caulo owaco meno?
  • I kare ma Daudi obedo ka goyo opuk ki Caulo, ngo ma otimme tyen me adekke, kit ma cal tye ka nyuto?
  • Mikal okonyo kwo pa Daudi nining, dok ngo ma dong Daudi myero otim pi mwaki abiro kulu?

Peny mukene

  • Kwan 1 Camuel 18:1-30.

    Kit mar ma pe tur pa Yonacan pi Daudi-ni onyuto con mar matut ma tye i kin "romi mukene” ki "romi manok” nining? (1 Cam. 18:1; Jon 10:16; Luka 12:32; Jek. 8:23)

    I kit ma onongo dong tye kwede ni Yonacan aye myero ole ker pa Caulo, 1 Camuel 18:4 onyuto kamaleng mine pa Yonacan i te ngat ma giyero me bedo kabaka nining?

    Lanen pa Caulo nyuto ni nyeko twero tero dano i timo bal marac nining, dok man cikowa i kom ngo? (1 Cam. 18:7-9, 25; Yak. 3:14-16)

  • Kwan 1 Camuel 19:1-17.

    Yonacan oketo kwo-ne kama ding nining i kare ma oloko gin ma gicoyo i 1 Camuel 19:4, 5? (1 Cam. 19:1, 6)