Cit atir i jami ma tye

Cit atir ka ma nyuto lok ma tye iye

Lucaden pa Jehovah

Yer leb Acholi

Ododo me 52: Gideon ki Jone 300

Ododo me 52: Gideon ki Jone 300

ITYE ka neno gin ma tye ka timme kany? Man ducu obedo lumony me Icrael. Co ma gukulle piny-nyi gitye ka mato pii. Laco mucung cok kwedgi-ni aye Langolkop Gideon. En tye ka neno kit ma gimato pii kwede.

Nen kong mot kit yo mapatpat ma co magi gimato pii kwede. Jo mogo gurwako doggi piny wa i kom pii kikome. Ento ngat acel tye ka twomo pii ki cinge wek enen gin ma tye ka timme i ngete ducu. Man pire tek, pien Jehovah owaco bot Gideon me yero co ma gimato pii kun nongo gingiyo piny. Jo mukene-ni, Lubanga owaco ni, kidwokgi paco. Wanenu kong pingo.

Ayelayela dok oketo kom Luicrael woko. Peko tye pien gin gukwero winyo Jehovah woko. Jo Midian obwoyogi woko dok onongo unogi adada. Pi meno Luicrael gukok bot Jehovah pi kony, ci Jehovah owinyo kokogi.

Jehovah owaco bot Gideon ni onong lumony, ci Gideon ocoko lumony 32,000 kacel. Ento lumony 135,000 aye bilweny ki Icrael. Kadi bed kumeno Jehovah pud dok owaco ki Gideon ni: ‘Itye ki jo mapol tutwal.’ Pingo Jehovah owaco kit meno?

Pien ka Icrael oloyo lweny, giromo tamo ni gin giloyo lweny kikomgi. Giromo tamo ni pe gimito kony pa Jehovah pi loyo lweny. Pi meno Jehovah owaco bot Gideon ni: ‘Wac ki jo ma lwor ducu gudok paco.’ I kare ma Gideon otimo meno, lumonnye 22,000 gucito paco. Man weko en ki jo 10,000 keken me lweny ki lumony 135,000.

Gideon tye ka temo jone

Ento, winy! Jehovah waco ni: ‘Dano pud pol.’ Pi meno en owaco bot Gideon ni owek lwak gumat pii ki i kulu man ki dok ni jo ma gukulle gurwako doggi wa i pii myero ocwalgi paco. Jehovah ocikke ni: ‘Abimiyo iloyo lweny ki jo 300 ma gumato pii kun gingiyo piny-nyi.’

Kare me lweny oo. Gideon oketo jo 300 ma mege-ni i dul adek. En omiyo bot laco acel acel tum, abino ki mac raa iye. Cokcok ki cwiny dyewor, gin ducu gucokke i nget gony pa lumony lukworgi. Ci, gin ducu lawang acel, gukuto tum, gutyero abino, ka gudangnge ni: ‘Pala lucwan pa Jehovah ki pa Gideon!’ I kare ma lumony lukworgi guco, lworo omakogi dok gubange woko. Gin ducu gucako ngwec, ci Luicrael guloyo lweny.

Lungolkop cura 6 nio wa i 8.



Peny

  • I yo ma nining ki dok pingo Luicrael gitye i twon peko?
  • Pingo Jehovah owaco bot Gideon ni en tye ki mony mapol?
  • Co adi mudong i kare ma Gideon owaco ki co ma lwor me dok cen paco?
  • Ki i cal-li, tit kong yo ma Jehovah otiyo kwede me dwoko wel mony pa Gideon piny i wel co 300 keken.
  • Gideon oyubbe ki co-ne 300 nining, dok Luicrael guloyo lweny nining?

Peny mukene

  • Kwan Lungolkop 6:36-40.

    Gideon oniang miti pa Lubanga maber mukwongo nining?

    Kombeddi wan wangeyo miti pa Jehovah nining? (Car. 2:3-6; Mat. 7:7-11; 2 Tem. 3:16, 17)

  • Kwan Lungolkop 7:1-25.

    Pwony ango ma watwero nongo ki bot jo 300 ma gubedo atera ma pat ki jo ma gunyuto cwiny manokki? (Lungol. 7:3, 6; Rom. 13:11, 12; Ep. 5:15-17)

    Kit macalo jo 300 gupwonnye ki neno gin ma Gideon otimo, wan kono watwero pwonnye ki neno Gideon Madit Yecu Kricito nining? (Lungol. 7:17; Mat. 11:29, 30; 28:19, 20; 1 Pet. 2:21)

    Lungolkop 7:21 konyowa me yeng ki tic ma kiminiwa ka mo keken i dul pa Jehovah nining? (1 Kor. 4:2; 12:14-18; Yak. 4:10)

  • Kwan Lungolkop 8:1-3.

    Ka obino i kom lok me niang manok i kin omego nyo lamego, ngo ma watwero pwonyo ki i kit ma Gideon ocobo kwede woo ki jo Epraim? (Car. 15:1; Mat. 5:23, 24; Luka 9:48)