Cit atir i jami ma tye

Cit atir ka ma nyuto lok ma tye iye

Lucaden pa Jehovah

Yer leb Acholi

Ododo me 46: Cel me Jeriko

Ododo me 46: Cel me Jeriko

GIN ango ma tye ka miyo cel magi me Jeriko tye ka poto? Nen calo bombom madit aye ocelogi. Ento i kare ca onongo gipe ki bombom; kadi wa luduku bene onongo gipe kwede. Man tango mukene pa Jehovah! Wakwanu kong kit ma otimme kwede.

Cel me Jeriko tye ka poto

Winy gin ma Jehovah tye ka waco bot Yocwa: ‘In kacel ki lulweny-nyi omyero wuwot wulwor Jeriko. Wuwot wulwor Jeriko kicel i nino acel acel pi nino abicel. Wuting canduk me gicikke wuwot kwede. Lulam dog abiro guwot i nyime kun gukuto tumgi.

‘I nino me abiro myero wuwot wulwor boma-ni tyen abiro. Ci kutu-tum malongo, iwek jo ducu gudange dange lweny. Ci cel-li bipoto ryebbe woko piny.’

Yocwa kacel ki lwak gutimo gin ma Jehovah owaco. I kare ma gitye ka wot, dano ducu guling alinga litik. Ngat mo pe ma oloko. Gin ma onongo tye ka winye aye dwan tum ki mor pa tyen. Lukwor pa jo pa Lubanga ma i Jeriko myero bed lworo omakogi tutwal. Itwero neno tol makwar ma tye ka lyere ki wang dirica-ni? Dirica pa nga ca-ni? Ada, Rakab otimo gin ma lurot-piny guwacce ni otim. Jo me ode ducu onongo gitye i ot kun gikuro piny kacel kwede.

Yocwa

Me giko, i nino me abiro-ne, i nge lworo boma tyen abiro, tum okok, co ma lulweny gudange, ci cel opoto. Ci Yocwa owaco ni: ‘Wunek jo ducu ma i boma-ni ci wuwang woko. Wangu jami ducu. Weku ryal, jabu, mola ki nyonnyo keken, wumi giket i ka kano lim ma i kema me ot pa Jehovah.’

Yocwa owaco bot lurot-piny aryo ca ni: ‘Citu i ot pa Rakab ci wukel en kacel ki jo ode ducu woko.’ Rakab kacel ki jo me ode gubwot kit macalo lurot-piny gukwonge kwede bote.

Yocwa 6:1-25.



Peny

  • Ngo ma Jehovah owaco bot co ma lulweny ki lulam-dog ni gutim pi nino abicel?
  • Gin ango ma co-nu omyero gutim i nino me abiro-ne?
  • Kit macalo ineno kwede i cal-li, ngo ma tye ka timme i kom cel me Jeriko?
  • Pingo tol makwar tye gingabbe i wang ot?
  • Ngo ma Yocwa owaco ki co ma lulweny ni myero gutim i kom boma meno ki dano ma iye, ento jammi mogo calo ryal, jabu, mola ki nyonyo kono?
  • Ngo ma giwaco bot lurot-piny aryo-ca ni gutim?

Peny mukene

  • Kwan Yocwa 6:1-25.

    Dorre pa Luicrael pi nino abiro pore mada ki tic me pwony pa Lucaden pa Jehovah i kare man me agikki ni nining? (Yoc. 6:15, 16; Ica. 60:22; Mat. 24:14; 1 Kor. 9:16)

    Lok pa lanebi ma gicoyo piny i Yocwa 6:26 ocobbe inge mwaka 500, dok man pwonyowa ngo i kom lok pa Jehovah? (1 Luker 16:34; Ic. 55:11)