Cit atir i jami ma tye

Cit atir ka ma nyuto lok ma tye iye

Lucaden pa Jehovah

Yer leb Acholi

Ododo me 36: Latin Dyang me Jabu

Ododo me 36: Latin Dyang me Jabu

AI, AI! Gin ango ma dano itye ka timo kombeddi? Gitye ka lega bot latin dyang! Gitimo man pingo?

Pien Moses ori i wi got pi kare malac, lwak guwaco ni: ‘Wan pe wangeyo gin mutimme i kom Moses. Pi meno wayubu lubanga wek otelwa me a woko ki i lobo man.’

Moses tye ka bolo kidi aryo-ni piny

Aron omin Moses owaco ni: ‘Ka kare. Wukwany lwak agit me jabu ma wutye kwede, ci wukel bota.’ I kare ma lwak gutimo, Aron olenyo woko ci oyubo latin dyang me jabu. Ci lwak guwaco ni: ‘Man aye Lubangawa ma okelowa ki i Ejipt!’ Luicrael dong guyubo karama madit, ci guworo latin dyang me jabu.

I kare ma Jehovah oneno man, cwinye ocwer adada. Pi meno en owaco bot Moses ni: ‘Ruune ilor piny oyot. Lwak gitye ka timo gin marac tutwal. Wigi owil woko i kom cikka dok gitye ka gungo piny i nyim latin dyang me jabu.’

Dano gitye ka woro latin dyang me jabu

Moses oruune olor piny ki i wi got. Ci i kare ma en oo cok, man aye gin ma en oneno. Lwak gitye ka wer ki ka myel gilworo latin dyang me jabu-ni! Cwiny Moses ocwer adada ma omiyo en obolo kidi aryo ma apada ma cik tye i igi-ni woko piny ci gutyer gungidde matitino mapol ata. Cutcut en okwanyo latin twon me jabu ci olenyo woko. Ci orego woko mapwot.

Lwak gutimo gin marac adada. Pi meno Moses owaco ki co mogo ni gukwany pala lucwan-gi. Moses owaco ni: ‘Jo maraco ma guworo latin dyang me jabu-ni omyero guto woko.’ Pi meno co magi guneko jo 3,000! Man pe nyuto ni omyero wagwokke dok wawor Jehovah keken, ento pe lubanga mo me goba?

Nia 32:1-35.



Peny

  • Ki i cal, gin ango ma dano tye ka timo-ne, dok pingo?
  • Pingo akemo omako Jehovah, dok Moses otimo gin ango i kare ma oneno gin ma dano gitye katimo?
  • Moses owaco ki co mukene me timo ngo?
  • Pwony ango ma ododo man miyowa?

Peny mukene

  • Kwan Nia 32:1-35.

    Lok man nyuto tam pa Jehovah nining i kom rubo dini goba ki woro me ada? (Nia 32:4-6, 10; 1 Kor. 10:7, 11)

    Gwokke ango ma Lukricitayo myero gubed kwede i yero jammi me galo wang, macalo wer ki myel? (Nia 32:18, 19; Ep. 5:15, 16; 1 Jon 2:15-17)

    Kaka pa Levi gumiyo lanen maber nining i cung pi kit matir? (Nia 32:25-28; Jab. 18:25)