COKCOK dwe aryo i nge weko Ejipt, Luicrael gubino i te Got Cinai, ma bene kilwongo ni Koreb. Man aye bene kabedo ma Jehovah oloko iye ki Moses ki i latin yat ma lyel mac-ci. Dano gutongo gony kany ci gubedo iye pi kare mo manok.

Moses oito got, kun dano gikuro ki piny. Ki malo kunnu i wi got, Jehovah owaco bot Moses ni En emito ni Luicrael guwiny En dok gudok Jone ma pigi tek. Kare ma Moses olor piny, en otito bot Luicrael gin ma Jehovah owaco. Dano guye ni gibiwinyo Jehovah, pien gimito bedo jone.

Jehovah otimo gin mo me aura. En omiyo wi got oduny yito, dok piny obedo ka mor matek. En bene oloko ki lwak ni: ‘An Jehovah Lubangawu ma akelowu ki i Ejipt.’ Ci en ociko ni: ‘Pe wuwor lubanga mo mapat ki an.’

Kidi apada aryo

Lubanga omiyo cik abongwen mukene bot Luicrael. Dano gudoko lwor tutwal. Gin guwaco ki Moses ni: ‘In aye ilok kwedwa, pien walworo ni ka Lubanga aye oloko kwedwa waromo to woko.’

Lacen Jehovah oloko ki Moses ni: ‘Bin malo bota kany i wi got.’ Abimini kidi aryo ma apada ma acoyo iye cik ma amito ni jo magi gulubi.’ Pi meno Moses dok odok i wi got. Pi nino 40 dyewor ki dye ceng en obedo kunnu.

Lubanga onongo tye ki cik mapol adada pi jone. Moses ocoyo cik magi piny. Lubanga bene omiyo bot Moses kidi aryo ma apada-ni. I komgi, Lubanga kikome aye ocoyo cik 10 ma en onongo otito bot lwak ducu-ni. Kilwongo ni Cik Apar.

Moses i Got Cinai

Cik Apar obedo cik ma pigi tego. Cik mapol mukene ma Lubanga omiyo bot Luicrael-li bene pigi tego. Acel ki i kom cik magi aye ni: ‘Omyero imar Jehovah Lubangani ki cwinyi ducu, ki tammi ducu, ki kwoni ducu ki tekoni ducu.’ Dok mukene ni: ‘Omyero imar lawoti macalo i mare keni.’ Yecu Kricito Wod pa Lubanga, owaco ni magi aye cik aryo madito kato ducu ma Jehovah omiyo bot jone Icrael. Lacen wabikwano jami mapol i kom Wod pa Lubanga kacel ki pwonnye.

Nia 19:1-25; 20:1-21; 24:12-18; 31:18; Nwoyo Cik 6:4-6; Lulevi 19:18; Matayo 22:36-40.



Peny

  • Luicrael gugony kwene i nge dwe aryo i kare ma guweko Ejipt?
  • Ngo ma Jehovah owacci emito ni dano gutim, dok gugamo ningo?
  • Pingo Jehovah omiyo kidi apada aryo ki Moses?
  • Ma pat ki Cik Apar ni, cik mukene mene ma Jehovah omiyo bot Jo Icrael?
  • Cik aryo mene ma Yecu Kricito owacci dong dit loyo mukene?

Peny mukene

  • Kwan Nia 19:1-25; 20:1-21; 24:12-18; ki 31:18.

    Lok ma gicoyo piny i Nia 19:8 konyo me niango ngo ma dyere pa Lakricitayo kwako nining? (Mat. 16:24; 1 Pet. 4:1-3)

  • Kwan Nwoyo Cik 6:4-6; Lulevi 19:18; ki Matayo 22:36-40.

    Lukricitayo ginyuto margi i kom Jehovah ki jirani-gi nining? (Mar. 6:34; Tic 4:20; Rom. 15:2)