NEN Moses tye ka ringo woko ki i Ejipt. Itwero neno co mogo ma tye ka ryemo kore-ni? In ingeyo pingo gimito neko Moses? Wanenu kong ka watwero ngeyone?

Moses tye ka ringo woko ki i Ejipt

Moses odongo i ot pa Parao, laloc me Ejipt. En odoko dano madit dok maryek. Moses ongeyo gire ni en pe ebedo laejipt, ento ni lunyodone kikome gubedo Luicrael ma gin opii.

Nino mo acel, ma mwaka me ditte onongo dong oromo 40, Moses owoto me neno kit ma lutugi gitye kwede. Kit ma kitimogi kwede onongo rac adada. En oneno ka Laejipt mo tye ka goyo Laicrael mo ma opii. Moses oneno ka ngete ducu, ka oneno ni ngatti pe ma neno, en ogoyo Laejipt ca, ci Laejipt ca oto woko. Moses okano kome i kweyo.

I nino ma lubo meno Moses owoto dok me neno lutugi. En otamo ni etwero konyogi wek pe dong gubed opii. Ento en oneno Luicrael aryo ma co ka gilwenyo, pi meno Moses owaco ki ngat ma labal-li ni: ‘In itye ka goyo omeru pingo?’

Laco-ni owaco ni: ‘Anga ma oketi me bedo laloc ki langol kopwa? Imito neka kit ma ineko Laejipt ca?’

Moses otugi doko lwor woko. En ongeyo ni gin ma etimo i kom Laejipt ca dano dong kara gungeyo woko. Kadi Parao bene owinyo lok man, ci en ocwalo jo me neko Moses. Man aye gin ma omiyo Moses oringo woko ki i Ejipt.

I kare ma Moses oweko Ejipt, en ocito i lobo pa jo Midian ka mabor tutwal. Ki kunu en orwatte ki jo me ot pa Yecero, dok onyomo nyako acel ma nyinge Jipola ki i kin anyirane. Moses odoko lakwat dok en obedo ka gwoko romi pa Yecero. En okwo i lobo Midian pi mwaka 40. I kare meno mwaka me ditte onongo dong romo 80. I nino mo acel ma Moses onongo tye ka gwoko romi pa Yecero, gin mo otimme ma oloko kwo pa Moses woko ducu. Wek wanenu ngo ma gin me aura-ni obedo.

Nia 2:11-25; Tic pa Lukwena 7:22-29.



Peny

  • Moses odongo ki kwene, ento ngo ma en onongo ngeyo i kom lunyodo-ne?
  • Ngo ma Moses otimo ma onongo mwakane tye 40?
  • Ngo ma Moses owaco bot Laicrael mo ma onongo tye ka lweny, dok lagam ango ma laco-ni odwokke?
  • Pingo Moses oringo oweko Ejipt?
  • Moses oringo kwene, dok en orwatte ki ango kunnu?
  • Ngo ma Moses otimo pi mwaki 40 ma en onongo oringo woko ki i Ejipt ni?

Peny mukene

  • Kwan Nia 2:11-25.

    Kadi bed ni Moses opwonye pi mwaki mapol i ryeko pa Luejipt, Moses onyuto cungo-ne tung bot Jehovah ki jo-ne nining? (Nia 2:11, 12; Ibru 11:24)

  • Kwan Tic pa Lukwena 7:22-29.

    Pwony ango ma watwero nonogo ki i kom temme pa Moses me laro Luicrael kene kene ki i okol pa Luejipt? (Tic 7:23-25; 1 Pet. 5:6, 10)