Cit atir i jami ma tye

Cit atir ka ma nyuto lok ma tye iye

Lucaden pa Jehovah

Yer leb Acholi

Ododo me 20: Dina Opoto i Peko

Ododo me 20: Dina Opoto i Peko

IN ITYE ka neno jo ma Dina cito ka limogi-ni? En tye ka cito ka neno anyira mogo ma gikwo i lobo me Kanaan. Wonne Yakobo cwinye romo bedo yom iye? Me gamo lapeny man, tem poyo gin ma Abraim gin ki Icaka onongo gitamo i kom mon me Kanaan.

Dina cito ka neno anyira mogo ma gikwo i lobo me Kanaan

Abraim mono onongo mito ni wode Icaka onyom nyako mo me Kanaan? Pe, en onongo pe mito. Icaka gin ki Labeka onongo gimito ni latin-gi Yakobo onyom anyaka mo me Kanaan? Pe, gin onongo pe gimito. In ingeyo pingo?

Pien jo me Kanaan giworo lubanga mapol me goba. Gin onongo pe gubedo co ki mon mabeco me anyoma, dok gin bene onongo pe gubedo jo mabeco me bedo lurem macok. Pi meno watwero niang atir gin ma omiyo Yakobo cwinye pe romo bedo yom ni nyare onongo tye ka mako larem ki anyira me Kanaan.

Ada, Dina opoto woko i peko. Itye ka neno laco me Kanaan ma i cal ma tye ka neno Dina-ni? En nyinge Cekem. Nino mo acel ma Dina obino ka limo, Cekem omako Dina ci obuto kwede tektek. Man onongo rac, pien co ki mon ma gunyomme keken aye laco ki dako omyero gubut kacel. Gin marac man ma Cekem otimo i kom Dina-ni okelo ayela mukene mapol.

I kare ma omegi Dina guwinyo gin ma otimme, cwinygi owang tutwal. Jo aryo ki i kin-gi, Cimeon gin ki Levi, cwinygi owang adada ma omiyo gukwanyo pala lucwan ci gucito i boma ci guturo co atura lipip. Gin kacel ki omegigi guneko Cekem ki co mukene-ni ducu. Yakobo cwinye ocwer tutwal pi gin marac ma awobene gutimo.

Ayelayela magi ducu kono ocakke nining? Ocakke pien Dina omako larem ki jo ma pe winyo cik pa Lubanga. Wan pe wamito mako larem ma kit meno, pe kumeno?

Acakki 34:1-31.



Peny

  • Pingo Abraim ki Icaka pe gumito ni lutinogi onyomme ki jo me lobo Kanaan?
  • Yakobo mono ocwako larem ma nyare omako ki anyira Kanaan?
  • Laco mene ma tye ka neno Dina i cal-li, dok gin marac ango ma en otimo?
  • Ngo ma omegi Dina Cimeon gin ki Levi gutimo i kare ma guwinyo pi gin ma otimme?
  • Yakobo mono ocwako gin ma Cimeon ki Levi gutimo ni?
  • Peko pa luot man ocakke nining?

Peny mukene

  • Kwan Acakki 34:1-31.

    Bedo pa Dina kacel ki anyira me lobo Kanaan mono obedo gin ma otimme kicel keken? Tit kong. (Acak. 34:1)

    Pingo but bal me rwenyo bedo-ne macalo nyako ma pe ongeyo co obedo i wi en Dina? (Gal. 6:7)

    Lutino me kare ni ginyuto nining ni giketo i cwinygi lanen ma otimme i kom Dina-ni calo gin ma cikogi? (Car. 13:20; 1 Kor. 15:33; 1 Jon 5:19)