Yakobo ki awobene

NEN kong lwak jo me ot man. Man aye awobe 12 pa Yakobo. Dok en bene onongo tye ki anyira. In ingeyo nying latin acel mo ki i kin-gi? Wapwonyu kong mogo.

Lea onywalo Reuben, Cimeon, Levi ki Juda. I kare ma Lakeri oneno ni pe eromo nywal, cwinye ocwer tutwal. Pi meno en omiyo laticce ma dako ma nyinge Bila bot Yakobo, ci Bila onywalo lutino aryo ma nyinggi Dan ki Naputali. Lea bene omiyo laticce ma dako, Jilpa bot Yakobo, ci Jilpa onywalo Gad gin ki Acer. I ngeye Lea dok onywalo awobe aryo mukene, Icakar gin ki Jabulon.

Olo twal Lakeri bene onongo latin. En ocako nyinge ni Yucepu. Lacen wabipwonyo lok mapol i kom Yucepu, pien en odoko dano ma ngene adada. Magi aye awobe 11 ma kinywalogi i kare ma Yakobo onongo pud bedo bot Laban won Lakeri.

Yakobo bene onongo tye ki anyira mogo, ento Baibul miyo nying ngat acel keken ki i kin-gi. Nyinge Dina.

Kare oo ma Yakobo omoko tamme me a woko ki bot Laban pi dok cen i Kanaan. Pi meno en ocoko jo mapol me ode ki romine mapol kacel ki dyangine ci ocako wot mabor-ri.

I kare ma Yakobo ki jo ode gubedo manok i nge dwogo cen ki i Kanaan, Lakeri onywalo latin awobi mukene. Man otimme ma onongo gin gitye i wot. Lakeri owinyo ma goro tutwal, lacen en oto woko i kare ma tye ka nywal. Ento kom latin gire onongo yot. Yakobo ocako nyinge ni Benjamin.

Wan wamito ni wiwa opo i kom nying awobe 12 pa Yakobo-ni pien rok me Icrael ducu oa ki i komgi. I ada, kaka 12 me Icrael nyinggi ocakke ki i kom awobe 10 pa Yakobo ki awobe aryo pa Yucepu. Icaka okwo pi mwaka mapol ma onongo dong kityeko nywalo awobe magi ducu, dok obedo ki likwayo mapol myero bed oyomo cwinye tutwal. Ento wek wanenu kong gin ma otimme i kom lakware Dina.

Acakki 29:32-35; 30:1-26; 35:16-19; 37:35.



Peny

  • Lutino abicel ma Yakobo onywalo ki dakone mukwongo Lea nyingi anga?
  • Lutino aryo mene ma latic pa Lea Jilpa onywalo bot Yakobo?
  • Lutino aryo ma latic pa Lakeri Bila onywalo ni onongo nyingi anga-gi nga?
  • Lutino aryo mene ma Lakeri onywalo, ento ngo ma otimme i kare ma ginywalo latin me aryo?
  • Kit ma tye i cal-li, Yakobo obedo ki lutino adi, dok ngo ma okatti ki i kom-gi?

Peny mukene

  • Kwan Acakki 29:32-35 ki 30:1-26.

    Kit ma ginyuto kwede i kom lutino 12 pa Yakobo, lutino ma co pa jo Ibru onongo gicako nyingi nining i kare macon?

  • Kwan Acakki 37:35.

    Wangeyo nining ni Yakobo onongo tye ki anyira makato acel, kadi bed Dina keken aye gituco nyinge i Baibul? (Acak. 37:34, 35)