Ecau

LUTINO awobe aryo-ni gipat tutwal, pe kumeno? In ingeyo nyinggi? Ladwar-ri Ecau, ki awobi ma tye ka gwoko romi-ni aye Yakobo.

Ecau gin ki Yakobo gubedo lutino rudi pa Icaka gin ki Labeka. Won-gi Icaka, onongo maro Ecau tutwal, pien en onongo ladwar maber dok onongo kelo cam pi jo ma paco. Ento Labeka onongo maro Yakobo ma loyo, pien en onongo wor dok maro kuc.

Kwarogi Abraim onongo pud kwo, dok watwero tamo kit ma Yakobo onongo maro tutwal me winyo ka en loko i kom Jehovah. Lacen Abraim oto ma mwaka me ditte tye 175, onongo lutino rudi-ni gitye ki mwaka 15.

I kare ma Ecau tye ki mwaka 40 en onyomo mon aryo ki i lobo me Kanaan. Man ocwero cwiny Icaka gin ki Labeka mada, pien mon magi onongo pe giworo Jehovah.

I nino mo acel gin mo otimme ma omiyo Ecau iye owang tutwal i kom ominne Yakobo. Kare oo ma Icaka onongo mito goyo laa i kom wode madit. Pien Ecau onongo dit kato Yakobo, Eacu otamo ni en aye ebinongo laa man. Ento Ecau onongo dong ocato twero me nongo laa man woko con bot Yakobo. Medo i kom meno, i kare ma kinywalo awobe aryo-ni Lubanga onongo owaco ni Yakobo aye obinongo laa-ni. Dong man aye gin ma otimme. Icaka ogoyo laa man i kom Yakobo.

Yakobo

Lacen, i kare ma Ecau oniang lok man iye owang tutwal i kom Yakobo. Iye onongo owang tutwal ma omiyo en owaco ni ebineko Yakobo woko. I kare ma Labeka owinyo lok man, par ocire woko. Pi meno en owaco bot cware Icaka ni: ‘Bibedo marac adada ka Yakobo bene onyomo nyako mo me Kanaan.’

Cutcut Icaka olwongo wode Yakobo ci owacce ni: ‘Pe inyom dako mo me Kanaan. Cit i ot pa kwaru Becweri i Karan. Nyom ngat acel ki i kin anyira pa wode Laban.’

Yakobo owinyo wonne, ci cutcut ocako twon wot mabor-ri me wot i Karan.

Acakki 25:5-11, 20-30; 26:34, 35; 27:1-46, Jo Ibru 12:16, 17.



Peny

  • Ecau ki Yakobo gubedo nga, dok gipat nining?
  • Ecau ki Yakobo onongo dong gitye ki mwaka adi i kare ma kwarogi Abraim oto kwede?
  • Ngo ma Ecau otimo ma ocwero cwiny minne ki wonne tutwal-li?
  • Pingo kiniga omako Ecau matek mada i kom omine, Yakobo?
  • Cik ango ma Icaka omiyo bot wode Yakobo?

Peny mukene

  • Kwan Acakki 25:5-11, 20-34.

    Ngo ma Jehovah oloko woko con i kom lutino pa Labeka ni? (Acak. 25:23)

    Apokapoka ango ma obedo i kit cwiny ma Yakobo ki Ecau obedo kwede i kom dit me anywalli? (Acak. 25:31-34)

  • Kwan Acakki 26:34, 35; 27:1-46; ki 28:1-5.

    Yo ango ma onen kwede kamaleng ni Ecau onongo cwinye nok i kom jammi me cwiny? (Acak. 26:34, 35; 27:46)

    Ngo ma Icaka owaco ni Yakobo omyero otim, me wek en onong mot pa Lubanga? (Acak. 28:1-4)

  • Kwan Jo Ibru 12:16, 17.

    Lanen pa Ecau-ni nyuto adwogi ango pi jo ma gicayo jammi maleng me cwiny?