KI WOKO, dano ma pe i yeya gumedde ki kwogi kit macon. Gin onongo pud pe giye ni Pii Aluka obibino. Gin omyero bed gunyero mukato kare woko. Ento cutcut nyero ogik woko.

 Pi aluka tye ka mwonyo dano ki lee ma lworo ocirogi

Cutcut pii ocako oony woko atura. Ocwer ki i polo obino piny kit macalo ionyo pii ki i cuburiya nywal ber-ri. Lok pa Nua kara onongo tye atir! Ento kare onongo dong pe pi ngat mo keken me donyo i yeya. Jehovah onongo dong oloro doggola woko matek liking.

Cutcut piny ka ma obedo lung ducu opong woko. Pii-ni olokke odoko calo kulu madongo. Ocoro yadi dok oloro kidi madito i kin piny ki woo madwong adada. Dano gudoko lwor. Guyito ka ma obedo cerecere ma tye malo. Ai, guparo ni kono nene giwiny lok pa Nua me donyo i yeya ma doggola onongo pud tye twolo pigi! Ento kare onongo dong pe.

Pii omedde ameda ki dongo malo. Pii ocorre ki i polo pi nino 40 dyeceng ki dyewor benebene. Oyito wa i but godi, dok cutcut omwonyo kadi wa godi maboco loyo ducu. Pi meno kit ma Lubanga onongo owaco kwede, dano ki lee ducu ma onongo gitye woko guto woko. Ento jo ducu ma i yeya gubwot.

Nua ki awobene onongo gutimo tic maber tutwal me payo yeya. Pii otingo yeya malo, ma obedo gire ka kwang i wi pii. I nino mo ma kot dong ocok, ceng ocako ryeny. Gin ma onen obedo me aura adada! Nam madit acel keken ma oromo piny ducu. Gin acel keken ma onongo nen ma tye ka kwang i wi pii aye yeya-ni.

Yeya tye ka kwang i wi pii

Cog co ca onongo dong gipe. Dok pe dong gibibedo tye me wano dano. Gin ducu guto woko kacel ki megigi ki jo maraco mukene-ni ducu. Ento gin ango ma otimme i kom wegigi?

Wegi cog co-ni onongo pe gubedo dano kikome calo wan. Gin gubedo lumalaika ma onongo gubino piny me kwo calo dano i lobo. Pi meno i kare ma Pii Aluka obino, gin pe guto kacel ki jo mukene-ni. Gin guweko tic ki kom me dano ma onongo guyubo-ni, ci gudok cen i polo macalo lumalaika. Ento pe dong kiye ni gudony i kin lumalaika pa Lubanga. Pi meno gudoko lumalaika pa Catan. I Baibul kilwongogi ni jogi.

Lubanga oweko yamo okodo, ci pii aluka ocako dok piny. I nge dwe abic yeya-ni obino ocung i wi got mo. Nino mukene mapol okato, jo ma i yeya onongo gineno wi godi maboco ka guneno woko. Pii omedde ameda ki dok piny.

Ci Nua ocwalo winyo macol ma kilwongo ni agak me cito woko ki i yeya. Obedo ka tuk cito woko pi kare mo ka dok dwogo cen, pien onongo pe twero nongo ka mo maber me pye. Obedo ka timo man teretere, dok kare ducu ka odwogo cen ci ywe i wi yeya.

Amam

Nua onongo mito neno ka pii-ni dong otwo woko ki i lobo, pi meno en dok ocwalo amam me cito woko ki i yeya. Amam bene odwogo cen pien pe onongo ka mo ma romo bedo iye. Nua dok ocwalo amam me cito woko tyen me aryo, ci odwogo cen ki pot yat jeituni i doge. Pi meno Nua ongeyo woko ni pii dong odok piny. Nua dok ocwalo amam woko tyen me adek, ci olo twal amam dong onongo kabedo mutwo ma romo kwo iye.

Lubanga dong oloko ki Nua. En owaco ni: ‘Kati woko ki i yeya. Kwany jo me odi kacel ki lee ducu ma tye kwedi.’ Gin onongo gubedo i yeya pi kare makato mwaka acel kulo. Pi meno watwero tamo kit ma gin ducu igi onongo yom kwede me kati woko ki me bedo makwo!

Acakki 7:10-24; 8:1-17; 1 Petero 3:19, 20.



Peny

  • Pingo pe otwere pi dano mo me donyo i yeya ma kot dong ocakke?
  • Jehovah oweko kot ocwer pi dye ceng ki dyewor adi, dok pii-ne opong matut romene?
  • Ngo ma otimme i kom yeya man i kare ma pii ocako mayo lobo?
  • Cogi co-ni mono gubwot ki i Pii Aluka-ni, dok ngo ma otimme i kom wegigi?
  • Ngo ma otimme i kom yeya man i nge dwe abic?
  • Nua ocwalo agak okato woko pingo?
  • Nua ongeyo nining ni pii ma omayo lobo ni dong odwon?
  • Ngo ma Lubanga owaco bot Nua i kare ma Nua ki luode dong gubedo i yeya pi kare ma kato mwaka kulu?

Peny mukene

  • Kwan Acakki 7:10-24.

    Kijwero kwo woko kwicikwici ki i lobo lakwene? (Acak. 7:23)

    Otero kare ma romene pi Pii Aluka me dwon ki wi lobo? (Acak. 7:24)

  • Kwan Acakki 8:1-17.

    Acakki 8:17 nyuto ni yub pa Jehovah macon-ni pe olokke pi lobo nining? (Acak. 1:22)

  • Kwan 1 Petero 3:19, 20.

    I kare ma lumalaika ma lujemo gudok cen i polo, kop ango ma gingolo i komgi? (Juda 6)

    Lok ma gitito i kom Nua ki luode-ni jingo genwa i teko ma Jehovah tye kwede me laro jo-ne nining? (2 Pet. 2:9)