Cit atir i jami ma tye

Cit atir ka ma nyuto lok ma tye iye

Lucaden pa Jehovah

Yer leb Acholi

Ododo 4: Gin Mumiyo Gurwenyo Pacogi

Ododo 4: Gin Mumiyo Gurwenyo Pacogi

NEN kong gin ma tye ka timme kombeddi. Gitye ka ryemo Adam gin ki Kawa woko ki i poto me Eden maber adada-ni. In ingeyo pingo?

Gitye ka ryemo Adam gin ki Kawa woko ki i poto me Eden

Tye kumeno pien gutimo gin marac adada. Pi meno Jehovah tye ka pwodogi. Ingeyo gin marac ma Adam gin ki Kawa gutimo?

Gin gutimo gin ma Lubanga owacigi ni pe gutim. Lubanga owacci giromo camo cam ki i kom yadi ma i poto-ni. Ento ki i kom yat acel Lubanga owacci pe gucam, pien ka gucamo ci gibito woko. En ogwoko yat meno macalo mege. Wan bene wangeyo ni rac me kwanyo jami pa ngat mukene, pe kumeno? Ngo dong ma otimme?

I nino mo acel ma Kawa onongo tye kene i poto, twol oloko kwede. Kong itam meno! En owaco ki Kawa ni ocam nyig yat ma Lubanga ociko ni pe gucam-mi. I kare ma Jehovah oyubo twol en pe oyubogi ma gitwero lok. Man dong te lokke ni ngat mukene aye onongo tye ka miyo twol-li loko. Meno onongo anga?

Meno onongo pe Adam. Meno omyero obed ngat acel ki i kin jo ma Jehovah onongo oyubogi con ma peya oyubo lobo. Jo meno gubedo lumalaika, dok pe watwero nenogi. Malaika acel-li onongo odoko lawaka tutwal. En ocako tamo ni omyero ebed laloc calo Lubanga. Dok omito ni dano guwiny en ma ka winyo Jehovah. En aye lamalaika ma omiyo twol oloko.

Lamalaika man gire olo obwolo Kawa. I kare ma en owaco ki Kawa ni Kawa bidoko calo Lubanga ka ocamo nyig yat ca, Kawa oye. Pi meno en ocamo, ki Adam bene ocamo. Adam gin ki Kawa gukwero winyo Lubanga, dok meno aye gin ma omiyo gurwenyo pacogi me poto maber-ri.

Nino mo Lubanga bineno ni lobo ducu kiyubo maber marom aroma ki poto me Eden. Wabineno lacen kit ma in bene iromo nywako yubone kit man. Ento kong wanenu gin ma otimme i kom Adam gin ki Kawa.

Acakki 2:16, 17; 3:1-13, 24; Niyabo 12:9.



Peny

  • I cal-li, ngo ma tye ka timme i kom Adam ki Kawa?
  • Pingo Jehovah omiyogi pwod?
  • Gin ango ma twol owaco bot Kawa?
  • Nga ma oweko twol olok ki Kawa?
  • Pingo Adam ki Kawa gurwenyo pacogi me Paradic?

Peny mukene

  • Kwan Acakki 2:16, 17 ki 3:1-13, 24.

    Peny pa Twol bot Kawa-ni obalo nying Jehovah nining? (Acak. 3:1-5; 1 Jon 5:3)

    Kawa odoko calo lanen me cikowa nining? (Pil. 4:8; Yak. 1:14, 15; 1 Jon 2:16)

    I yo ango ma Adam gin ki Kawa gukwero kwede ye balgi pi gin ma gutimo? (Acak. 3:12, 13)

    Lukerubi ma giketogi tung kunyango me poto me Eden-ni gugwoko twero pa Jehovah nining? (Acak. 3:24)

  • Kwan Niyabo 12:9.

    Catan dong oo i rwom ma nining i loko dano ki i kom loc pa Jehovah? (1 Jon 5:19)