Langhalou konten

Langhalou menu sekunder

Langhalou daftar isi

Saksi-Saksi Yehuwa

Alor Abui

E Tofa Homi De Kang Hamol Diy

 BAGIAN 3

Lateiur Tafok Woheikang

Lateiur Tafok Woheikang

”Kang mu mitapieta wotiyeng diy tehu de tehasalah wosiyer.”1 Petrus 4:8

Ahola neng mol rong riymiy ba robirang, tafok faring deiareu. Nala wuhe hei opi midalek, heimu ritanut tara, rirompang tara, ya ri afeng tara mipadiy wuhe. Ya, ama uytaha he detafok paneng, wala ritanut mia na.

Tafok ba tofa homi mia pi hehalal, pi hiyeng takiy haba, pi tafok faring hadatareu Surah Rieling hewong depomong. (Matius 5:23, 24) Tebirang hadokang ba Surah Rieling homi mia, E haluol birang de tafok ba E hadatareu woheikang heimu E womahia teiur ba kulkang.

 1 TAFOK WOBESAR

NALA HE SURAH RIELING DEWOFANG: ”Leng ba besarlasar mu . . . hadoa.” (Pengkhotbah 3:1, 7) Leng nuku iy te, rilia wobesar. Tafok ba daleki, E tanut ya E omi kiding E herofi wofang. Hare, neng mol tada besar mati, ’herofi wofang’ te. (Efesus 4:25) Hare, tomi kiding tanut hasalah midalek hasuwong ba pi wal to kawai na. Hewohawai ba sadafalasing, de tomi aring tafok kiding midalek piwal to kawai na.Amsal 15:4; 26:20.

E wala woteinuk na haba, E paneng E pak lakang lahamol, neng mol mitiyena ya miteluk te. (Kolose 4:6) Tafok abeta woheikang, nala he tomi mia wobesar te, la rama na.Efesus 4:26.

E MIPANENG KANG:

  • Leng kang ba engahiy rilia tafok wobesar

  • Hare, yala E womahia, E omaha ba wohawai haba, eiy hoaring eymia ba besar hadoa

 2 WOMAHIA YA OMI MI SEI TE

NALA HE SURAH RIELING DEWOFANG: ”Mihiyena, sadafalasing ya, kang de opa E miy ama afena mihadasama. Miteluk picura paneng miy ama afena mihadasama.” (Roma 12:10) Teiur ba E puna womahia mu, kulkang. Nala he dewobesar E haha bol na E womahia te. ”Nala he dewotanut hedosama edi bay heihe E wotanut ya, . . . omi damasing te.” (1 Petrus 3:8; Yakobus 1:19) Doma, E okoli womahia na. Namati, nala he E woawang doiti, nuku de besar nuku womahia te maite, E hafang ba E wai besar. Hare, neng mol riwala takel na haba, rifal nuku wuda hare ”tomi tareng na”.Pengkhotbah 7:9.

E MIPANENG KANG:

  • Nala he dewofang, ko wal omi misei na haba, E tanut falaka puna ba womahia

  • Nala he dewofang E wotanut te, he lek iyeri E womahia ya, hiyeng hapong woreya

3 HEMINUK MIPANENI

NALA HE SURAH RIELING DEWOFANG: ”E wo susahmalohi haba hekang hadoa. Haba, tawa he taha we wotokurang kaleba diy.” (Amsal 14:23) Nala he rilia hoheinuku diy E herofi wofang mani na haba, rilia kul mipak paneng te. Hei opi, awang tihai nuku wuda haba, nala he ri mipaneng wal petang taka miwat na. (Amsal 10:4) Rilia awang hedosama fal nuku wuda, hekang hadoa.Pengkhotbah 4:9.

E MIPANENG KANG:

  • Tafok ba daleki ri tara-tara woheikang

  • Ariy kopang nala he rong paneni ri hehalal te