Langhalou konten

Langhalou menu sekunder

Langhalou daftar isi

Saksi-Saksi Yehuwa

Alor Abui

E Tofa Homi De Kang Hamol Diy

 BAGIAN 1

Allah de Wotiyeng diy ba Kang Hamol pi fang te

Allah de Wotiyeng diy ba Kang Hamol pi fang te

”La ahola ama neng ya ama mol De paneni.”Matius 19:4

Teimiy teypung ahola Yehuwa * he paneni. Surah Rieling dewofang, de mol ahola paneni ”demiy amakang hedi”. Adam homi kul mikang, ”Opi he hedi, narakai tepai ya ne isi.” (Kejadian 2:22, 23) Yala bay, Yehuwa hedomaha teimiy teypung kang hamol te.

La ahola E eiymi eiypung E wotanut lakang lahamol nahani. Haba, pimihehalal ti, ama neng ya, ama mol la ahola dekul midiyena nahani haba, yala bekatafiela he de hadatareu nahani. (1 Korintus 7:28) Buku opi, birang hadokang ba Surah Rieling homi mia E hiyeng kang, E haluol birang E tofa homi mia de rama amoni.Mazmur 19:8-11.

 1 AWANG BA YEHUWA DEMIY RIDI HEPANIY

NALA HE SURAH RIELING DEWOFANG: Ama neng de tofa homi mia hekaiy.Efesus 5:23.

Hare, E ama neng mu Yehuwa domaha E sadafalasing miy E mol mihadasama. (1 Petrus 3:7) Ama mol Allah dewofang, demiy la ohau. Hare Allah hedomaha, E heluk ya mihiyena te. (Kejadian 2:18) E mol mu, E kul mihiyena ya E omi rofi puna ba hei E deicura paneng te, maice Eiy wai paneng.Efesus 5:25-29.

Hare, E ama mol mu Yehuwa hedomaha E neng heluk te. Ya, awang ba ama neng hei, E homong ba paneng. (1 Korintus 11:3; Efesus 5:33) Omi rofi puna, woheinuk ba E neng dewofani ya, de paneng rilia paneng. (Kolose 3:18) Hare, opi E kul-kul mipaneng E neng ya, Yehuwa hapomareng mia E masena.1 Petrus 3:1-6.

E MIPANENG KANG:

  • Rilia miritangar, ri lateiur neng kang ya mol kang. Womahia kang-kang ba, kul-kul mirimo hawai

  • Riyhoaring. Rilia lateiur ro rama amoni ba nunuku mihadasama, heimu hewosakolah helengmu lunga

2 AMA NENG YA AMA MOL DOMI KIDING WOFIKANG TE

NALA HE SURAH RIELING DEWOFANG: Ama neng mati, demol hei dedeicura paneng te. Ya, ama mol mati deneng hei dedeicura paneng te. (Filipi 2:3, 4) E neng mati emol mihiyena te, ya E mol mati eneng mihiyena te. Hedosama, nala ba hebeli midaliela wuda. Woamunang iti, Yehuwa de dehui defatil wei hafang ba ”Sadafalasing demipaneng mi ama faring mihadasama te.” (2 Timotius 2:24) ”Mani ama besar wal wotanut na, he bula mu toda bula wuda. Haba, ama ba loring amak dewotanut, te fata de hado bil.” Hare, dara loring amak na, engahiy te. (Amsal 12:18) Yehuwa he Simoi Rieling, de omong E besarlasar sadafalasing ya kul mihiyena.Galatia 5:22, 23; Kolose 4:6.

E MIPANENG KANG:

  • Rama amoni wal tofa homi mia na, pi doa ba Yehuwa hafang de tetanut haber ya, de tomong pi rama amoni wobesar

  • E dara besar na, E wotanut heikani te

 3 WOTANUT BA RILIA FAL NUKU

NALA HE SURAH RIELING DEWOFANG: Rong riymi riypung rilia ri isi ”lanuku”. (Matius 19:5) Haba rilia tara-tara, ritanut bay tara-tara. Hare, rilia latanut nuku ya latatok nuku hei, riwosakolah te. (Filipi 2:2) Dara woheinuk na, hei opi kulkang. Surah Rieling dewofang, ’Pakang halek dekang temati wong haluol.’ (Amsal 20:18) Tebirang hadokang ba Surah Rieling homi mia, de ripong puna ba woheinuk hiyeng rofi rorilia miy.Amsal 8:32, 33.

E MIPANENG KANG:

  • Rilia laworiming miti ba besar haba, nala he romi kiding mia riwofang te

  • Hare, nala he rilia woromaha, rilia riming miti ba wobesar te

^ par. 4 Yehuwa mu Allah hana ba, Surah Rieling homi mia.