Langhalou konten

Langhalou menu sekunder

Langhalou daftar isi

Saksi-Saksi Yehuwa

Alor Abui

Nala he Surah Rieling Dewopidasakolah?

 PASAL 2

Surah Rieling Mu—Buku Ba Allah Hei

Surah Rieling Mu—Buku Ba Allah Hei

1, 2. Nalawuhe Surah Rieling mu nalkang nuku wuda ba Allah de mipidi?

E MOKENI nuku de langfarot nalkang nuku er, omi lateiwuda? Ong ko wal eiy hoaring na ba hohaber, ya nala he e mokeni de eri omi mikang mihamol. E hekang wofang.

2 Surah Rieling mu Allah he mi pidi. Heimu, de wotiyeng diy ba he falaka mu pi wal afena mi hiyeng na. Hedosama, Surah Rieling dewofang ba Allah de adiy, buku, ya amakang neng ya mol ahola paneni. Surah Rieling de prinsip kang mi piri, pi masalah homi mia de pomong. Surah Rieling mia pi wosakolah, lateiur Allah de paneng ba hedomaha buku opi woheikang ba kulkang diy. Surah Rieling mu nal ba kulkang he Allah de mi piri!

3. E Surah Rieling wosakolah, nala he e hiyeng?

3 E Surah Rieling wosakolah e hiyeng Allah domaha e he mokeni kang diy. E kul wosakolah iti, e kul mihadap kang ya e he mokeni kang diy.

4. Surah Rieling hei nala he kul omi hafik?

4 Surah Rieling mu loring 2.600 mitauhawai, ya miliaran mipaneni. Buku taha, ama miliaran mihapieti de loring puna Surah Rieling mihalal. Ya minggu dokopang ama juta nuku mihapieti de Surah Rieling hiyeni! Rofi, Surah Rieling mu wal buku afena dosama na.

5. Nalawuhe pi wofang ba Surah Rieling mu ”Allah he tanut”?

 5 Surah Rieling mu ”Allah he tanut”. (Mihalal 2 Timotius 3:16.) Haba mani ama wotanut, ’Surah Rieling mu amakang he bileni, hare lateiur Allah he tanut?’ Surah Rieling de wohawai, ”Amakang dewofang hedi mu Allah hei, haba Simoi Rieling he hapong puna nahani.” (2 Petrus 1:21) Hedosama mu desa de sekretaris habot ba surah bileng. Surah hei mahe tanut? Desa hei, wala sekretaris heina. Hedosama Surah Rieling mu, Allah he paneni wala amakang ba de puna Surah Rieling bileni heina. Allah de hapong puna ba he tanut bileni. Hare hiyeng rofi mu Surah Rieling, kul-kul ”Allah hamau buka”.1 Tesalonika 2:13; hehalal Catatan Hewosik 2.

Kitab Suci Terjemahan Dunia Baru loring faring homi mia

 SURAH RIELING MU LADOSAMA

6, 7. Nalawuhe pi wofang ba Surah Rieling mu ladosama?

6 Tung 1.600 mihapieti puna Surah Rieling bileni. Ama ba bileni, he tung mu tara-tara. Mani he sakolah daliela, mani walna. Hedosama, nuku dokter. Afena pining tetek, afu tatahai, lumfa wofikang, nabi, hakim, ya lei. Ama ba bileni tara-tara nahani, haba Surah Rieling homi mia mu ladosama. Heimu bagian nuku ya afena wei wal midapieta na. *

7 Bagian ahola ba Surah Rieling de he falaka wofang, lateiur te masalah buku taha midaleki, ya bagian Surah Rieilng hewosik de he falaka wofang lateiur Allah de masalah hedi woheikang ba buku opi de paneng ba Firdaus wuda. Hare Surah Rieling homi mia mu amakang he birang ba tung ribi mihapieti heihe de bileni, ya Allah he domaha dekul midalek.

8. Surah Rieling ya ilmu pengetahuan dil dosama, hedosama wobesar.

8 Surah Rieling wal bileni ba ilmu pengetahuan heina, nati buku ba sakolah heina, haba ilmu pengetahuan hei wobesar ladosama. Heiopi he pomaha buku ba Allah hei, hedosama buku Imamat homi mia Allah de parentah mi bangsa Israel her ba lateiur tehu tariktafiy ba daleki dewal howe na. Heiopi mu lunga he bileni ba ama afena dar bakteri ya virus hiyeng na ba heimu tariktafiy heiyeri. Surah Rieling bay dewopidasakolah buku opi petang taka mitilaka. (Ayub 26:7) Ya amakang faring deworumai buku opi fui, haba Surah Rieling dewofang buku opi fufa.Yesaya 40:22.

9. Ama ba Surah Rieling bileni de rofi hapuna, nala he pi worumai kang?

 9 Surah Rieling ngwowong hei dewobesar ladosama. Haba buku ba ngwowong hei mani waldosama na, heimu ama ba bileni wei wal homi rofi na. Hedosama he bangsa wei de yenang he yai haba wal hei he mi iy na dewal bileng na. Haba ama ba Surah Rieling bileni homi rofi, bangsa Israel de yenang ba wala hei mi iy na bay de wobileni. De hasalah mipaneni bay de bileni yoti. Hedosama buku Bilangan homi mia, Musa dewobesar de hasalah lea mipaneni hedimia Allah de hohirai diy. (Bilangan 20:2-12) Ama ba Surah Rieling bileni domi rofi puna bileng dewotiyeng diy ba Surah Rieling mu Allah he heiyeri. Hare pi Surah Rieling worumai kang.

BUKU BA WONG KANG WOMIRI

10. Yala opi nalawuhe wong ba Surah Rieling hei hekang dara mipidasama?

10 Surah Rieling mu ”Allah he tanut, hekang mu mi wotadasakolah, hotau, ya nal-nal harof”. (2 Timotius 3:16) Rofi, yala opi bay Surah Rieling hewong dar mipidasama kang. Yehuwa de hiyeng lateiur piy paneni, hare nala he pi wotanut ya pi hadatareu bay de hiyeng. Yehuwa de tiyeng mu kul piy mitaha, ya domaha pi kang hamol. Nala he kang ya nala he beka ba piy, Yehuwa de hiyeng.

11, 12. (a) Wong nala he Yesus de miy pidi ba Matius 5 ya 7 mia? (b) Wai nala he Surah Rieling mia ba pi wai wosakolah kang?

11 Matius 5 ya 7 ref, pi mi hehalal wong ba kulkang he Yesus de mipidi dewofang lateiur te pi kang hamol, ama afena pokari pinaisena mia hei, teur doa, ya seng hehalal. Wong hedi eyal he tung 2.000 mihapieti hu ngwofani,  haba he wong mu dar kang ya yala bay dara puna kang.

12 Surah Rieling homi mia Yehuwa bay dewopidasakolah, prinsip hei de pomong birang tofa homi mia kang hamol, awang paneng ba kang, ya ama afena pokari rama amoni birang. Ya, prinsip ba Surah Rieling homi mia de pomong kang, heimu wal wofang ba pidi mu ma, pi teihe mia, ya masalah nala he pi hadatareu.Mihalal Yesaya 48:17; hehalal Catatan Hewosik 3.

NGWOFANI BA SURAH RIELING HEI E WORUMAI KANG

Ama ba Surah Rieling bileni hana he Yesaya dewofang Babilon de hayei

13. Babilon hei Yesaya de lateiur wobesar?

13 Ngwofani faring ba Surah Rieling homi mia midaleki diy. Hedosama Yesaya dewobesar ba Babilon de hayei. (Yesaya 13:19) Hekiding-kiding bay de wobesar lateiur Babilon opi hado hayei. Kota hedi awei lea ya uli lea hobalei. Haba Yesaya dewofang ba uli hedi hado takat ya he awei lado owang. Hetakel wei de kota hei miwe haba ama wal hada yenang na.Yesaya bay dewai wobesar, ama neng nuku hana he Kores de Babilon hado hayei.Mihalal Yesaya 44:27–45:2; hehalal Catatan Hewosik 4.

14, 15. Lateiur te Yesaya dong ngwofani mihayei diy?

14 Tung asaha ayoki mihapieti ba ngwofani hedi wobileni, prajurit wei de siyei ba Babilon hadanatea. Mahe prajurit wei hapong puna? Eyala Nabi hedi dong ngwofani wuda, heimu Kores lei Persia. Nal afena midaleki diy wuhe ngwofani hedi wei dotafuda midaleki yoti.

15 Akuni ba de siye, Babilon he ama wei delek paneng nahani. De midomahia de rama amoni homi mia,  dewotanut tembok daliela ya uli hobalei. Kota uiytaha mia Kores ya he prajurit wei de uli wohakili mi afena hareng, iya tiri tehu prajurit Persia wei de iya milak we. Haba lateiur prajurit wei de Babilon he tembok hapiet? Eyala Nabi dewofani wuda awei hedi ama lado owang, hare ama wal hada yenang na.

16. (a) Babilon hei nal afena nala he Yesaya dewai wofani? (b) Ngwofani hedi midaleki he bukti mu nala?

 16 Yesaya dong ngwofani ba heuiharena amakang wai wala Babilon mibirang na. De bileni ”Babilon ama wai wal mia na, hetayek hetamang wai walhadoa na”. (Yesaya 13:20) Heiopi kul midaleki rena? Babilon ba asing mia, 80 kilometer we selatan harena Bagdad-Irak mia yala heyera he doiti. Haba yala bay ama nuku hadou hei mibirang na. Yehuwa de Babilon hamuli ”Tifuyang tamul talal he de puna”.Yesaya 14:22, 23. *

Babilon heyera taka

17. Allah he pakang nalawuhe dotafuda pi worumai kang?

17 Nal faring ba Surah Rieling dong wofani ba midaleki diy mu hedosama nala he Surah Rieling dewofang ba birang ariy falaka hei bay pi worumai kang. Pi worumai ba Yehuwa de pakang buku opi de paneng  ba Firdaus wuda. (Mihalal Bilangan 23:19.) Rofi, pi worumai hadoa ”Birang mihalor ba Allah de lunga wopakang diy haba dewal ayer na”.Titus 1:2. *

SURAH RIELING DE E BIRANG MIHAMOHAWAI KANG

18. ”Allah hamau buka” hei nala he Paulus dewofang?

18 Pong wosakolah diy ba buku afena wala Surah Rieling dosama na. Surah Rieling ladotilaka ya de ilmu pengetahuan nati ngwowong hei wobesar mu ladosama. Surah Rieling de wong kang mi pir ya ngwofani faring ba mihayei. Haba Surah Rieling mu kul mitaha. Rasul Paulus dewofang, ”Allah hamau buka mu birang ya he kuasa hopa.” He arti mu nala?Mihalal Ibrani 4:12.

19, 20. (a) Surah Rieling de lateiur omong ba e isi hehalal kang? (b) Surah Rieling mu nalkang nuku wuda ba Allah de mi edi e lateiur hekang wofang?

19 Surah Rieling de e birang mihamohawai kang. Heimu de omong ba e hiyeng edi mu ma. De omong ba e tanut ya omi e hiyeng kang. Hedosama, ko pi wotanut ba pi Allah mihiyena. Haba pi wotiyeng diy ba pi kul-kul mihiyena mu, nala he Surah Rieling dewofang pi haluol birang te.

20 Surah Rieling mu kul buku ba Allah hei, dei domaha e mihalal, e wosakolah, ya e mihiyena. Nalkang ba eri mu e he kang wofang te, ya e wosakolah iti. Ya nala he Allah domaha ba mi amakang mihadasama e hiyeng kang. Pasal he wohaluol Allah he domaha opi pi faring wosakolah.

^ par. 6 Amakang faring dewofang Surah Rieling waldosama na, haba hedi wal rofi na. Hehalal pasal 7 buku Alkitab—Firman dari Allah Atau dari Manusia? Saksi-Saksi Yehuwa he Paneni.

^ par. 16 Surah Rieling heiba ngwofani hefaring omaha wosakolah, e mihalal halaman 27-29 brosur Buku bagi Semua Orang, Saksi-Saksi Yehuwa he Paneni.

^ par. 17 Babilon ba asing mia ngnawi heiopi ngwofani nuku ba Surah Rieling homi mia ba midaleki, haba ngwofani faring dar hadoa. He falaka ngwofani ba Yesus Kristus hei, hehalal Catatan Hewosik 5.