Langhalou konten

Langhalou menu sekunder

Langhalou daftar isi

Saksi-Saksi Yehuwa

Alor Abui

Nala he Surah Rieling Dewopidasakolah?

 PASAL 19

Yehuwa Hopa Hamina Iti

Yehuwa Hopa Hamina Iti

1, 2. Yala opi datang teitauhapuna mu pi ya teihu mi tahai?

E WOTANUT e anui anaha hareng lak. Adiy kafanga diy, alahai king kidek, ya woring worong. Anui lea ko de sei. E takata tahai ba natea. E yera ba takata hiyeni omi mikang mihamol diy!

2 Yala opi bay nal heiwuda he pi hadatareu. Ruli taha opi beka he lang ler. E ko miatangar, ’He yera ba rama amoni ne ya teihe mihiyeng kang?’ Buku Mazmur ba Surah Rieling homi mia dewobileni, ”Ne Yehuwa wohokafang, e edi he atang nei tauhapuna ya e edi wala he ne wiy ba, ne Allah ba e edi wala he ne o rumai.” (Mazmur 91:2) Rofi, yala pi bekatafiela faring hadatareu Yehuwa mani he kang hamol mipir, ya worumai kang hamol ba ariy falaka hei bay de mipir.

3. Pi lateiur Yehuwa puna ba datang teitauhapuna?

3 Yehuwa de lateiur pofikang? Pi bekatafiela hadatareu de pomong ba bekatafiela hedi pi hadatareu kang, ya mahe bekatafiela paneng mipidasama Yehuwa mu kul rumai baharing ba miy heitaha. Mbeimu ko yala pi bekatafiela hadatareu, haba pi worumai kang ba ariy falaka Yehuwa de bekatafiela hedi wei woheikang. Surah Rieling de mipisuong, ”Kang ba Allah hei, kul homi mia iti te.” (Yudas 21) Pi Yehuwa hopa hamina iti, pi bekatafiela hadatareu de pomong kang. Haba hedi pi lateiur mipaneng?

ALLAH HEKANG WOHAWAI

4, 5. Yehuwa de kang mu de lateiur wotiyeng diy?

4 Pi Yehuwa hopa hamina temati, Yehuwa de mipiyena mu pi hiyeng te. Nala he dotafuda Yehuwa de paneng ba  mipidasama pi wotanut. Buku ba kul masena he de mipidi, homi mia mu binatang karikarnuku ya bata karikarnuku ba pomi hafik. Dedi bay siyeng meli he de mipir, ya iya sani he de miy pir ba pi but. Yehuwa de Surah Rieling puna ba dana ya he sifat ba kang hamol dewotadasakolah. Nal karikarnuku he arah mia de kang de miy wotiyeng diy mu Dewil Neng ba dekul mihiyena Yesus de habot buku tau sai ba de birang de miy pir. (Yohanes 3:16) Ya, de mong wuhe pi worumai ba kang hamol ariy falaka hei hadoa.

5 Yehuwa dong Kerajaan Mesianik nasiy heimu parentah ba surga mia bekatafiela ba pi hadatareu wei dotafuda de hanau kang. Kerajaan hedi de buku opi paneng ba firdaus, ya mahe hei mibirang de rama amoni ya kang hamol ba birang mihalor. (Mazmur 37:29) Lela afena ba Yehuwa de kang de miy wotiyeng diy mu dewopidasakolah ba lateiur yala pi birang de kang. Dedi bay de piyenabeiy ba pi doa puna hadabesar, ya de kul wolela iti ba pi doa womahia. Ama nunuku Yehuwa de kang de he falaka wotiyeng diy.

6. E lateiur ba Allah hekang wohawai?

6 E lateiur Yehuwa hekang wohawai? Wohiyeng diy ba nal karikarnuku ba de paneng miadasama e hekang hehamol wofang. Haba, yala amakang faring mu kang wal ama hopa na. Yesus de buku taha mia bay hamo heiwuda. Leng nuku mia Yesus de ama karnuku ba koti rawang hopa hado bil, haba la ama nuku wala he siye hekang wofang. (Lukas 17:12-17) Pidi pomaha ama neng nuku ba siye Yesus hekang wofang wuda. Pi pomaha leng kopang pi Yehuwa hekang wofang iti.

7. Herofi mu pi lateiur Yehuwa mihiyena te?

7 Pidi bay kang mu pi kul Yehuwa wohiyeng diy te.  Yesus de demurid wei wohokafang ba de Yehuwa mihiyena mu domi rofi puna, de isi puna ya de tanut puna te. (Mihalal Matius 22:37.) He arti mu nala?

8, 9. Pi lateiur Yehuwa wohiyeng diy ba pi mihiyena?

8 Na pi wofang ba pi Yehuwa mihiyena mani ngkang? Walna. Pomi rofi puna, pi isi, ya pi tanut puna ba Yehuwa mihiyena heimu pi pak pi paneng he pi puna wohiyeng diy. (Matius 7:16-20) Surah Rieling de he falaka wopidasakolah ba pi Allah mihiyena mati, he parentah wei bay pi heluk te. Na heimu beka? Walna, mbeimu Yehuwa he ”parentah wal tihai na”.Mihalal 1 Yohanes 5:3.

9 Pi Yehuwa heluk pi birang de kang hamol ya pomi de mikang. (Yesaya 48:17, 18) Haba nala he de pomong ba pi Allah hopa hamina iti? Mie pi hehalal.

YEHUWA MIHADAP ITI

10. Nalawuhe e kul Yehuwa hei wosakolah iti te?

10 Lateiur e Yehuwa hemokeni kang? Surah Rieling homi mia e wosakolah diy, e kul Yehuwa hiyeng kang ya rilia rinaisena de hadoa. Rilia rinaisena opi hedosama ara wuda ba omaha ara opi he lefing de wal takung na. Haba ara hedi, ara tuku afena miy wo iy te ba de tulang iti, Yehuwa hei e wosakolah iti rilia rinaisena de rumai diy.Amsal 2:1-5.

Ara wuda e kang ba miy Yehuwa mihadasama mu de tulang iti temati, ara tuku afena mi wo iy te

11. Lateiur Surah Rieling wosakolah de omi hafik?

11 Hedosama Surah Rieling hei e faring wosakolah iti, nal-nal ba kul-kul omi hoyai e hiyeng kang. Ngwofani ba Surah Rieling homi mia Yesus de he falaka miy de murid wei wohadabesar, he murid ayoki homi lateiwuda. Dewofang nahani, ”Lela mia ba de pidabesar na pomi mikang mihamol, hedosama bileng rieling wei dotafuda de hohaber ba de wopokafang?”Lukas 24:32.

12, 13. (a) Pi kang ba Allah her mu nala he ko de hadatareu kang? (b) Pi kang ba Yehuwa her mu pi lateiur wofikang ba de hadoa iti?

 12 Hedosama Yesus he murid wei homi wuda Bileng Rieling de hiyeng homi hoyai, edi bay Surah Rieling hei ong kabei hiyeng omi bay murid-murid wei wuda kang. Opi de omong e Yehuwa hiyeng ya e mihiyena. E wal o maha na ba kang ba de opa mu dewopalat.Matius 24:12.

13 Ong Allah hemokeni e tukai awang ba Allah rilia rinaisena de rumai. Yehuwa ya Yesus heimu e kul wosakolah iti te, ya nala he e wosakolah e kul wotanut ba miy e birang do iy te. (Yohanes 17:3) Leng ba e Surah mihalal namati e wosakolah e isi e mihatangar, ’Heiopi Allah Yehuwa hei nala he dewonadasakolah? Nalawuhe nomi rofi ya ne isi puna ba Yehuwa mihiyena te?’1 Timotius 4:15.

14. Lateiur doa de pomong ba kang ba pi Yehuwa wohiyeng diy mu de rumai iti?

14 E mokeni kang hadoa leng kopang e hadabesar iti, ya  heiopi de paneng rilia rinaisena de rumai diy. Hedosama, leng kopang e doa puna Allah hadabesar hei de paneng e kang ba mihadasama de rumai iti. (Mihalal 1 Tesalonika 5:17.) Doa mu nal ba kul kang he Pima surga mia de mipidi. Nala he pomi mia leng kopang pi wohadabesar kang. (Mazmur 62:8) Nala ba te tanut mia pi wal doa mi tawa heyera nuku mibesar-mibesar na, haba nala he pi wofang mu kul pomi misei te. Rofi, pi kul Surah Rieling wosakolah iti ya pomi mia ba berdoa kang ba pi Yehuwa mihadasama mu de kul rumai diy.

YEHUWA HEI MIY AMA AFENA WOHADABESAR

15, 16. Awang ba maring kang wobesar mu pi lateiur hehalal?

15 Pomaha pi Yehuwa hopa hamina iti temati, pi worumai mu pi miy ama afena bay wohadabesar te. Yehuwa hei miy ama afena wohadabesar mu hak istimewa ba kul kang. (Lukas 1:74) Ya heimu nal ba Yesus de miy ama Kristen hiyeng rofi dotafuda wohabang tau iy. Ama nunuku maring kang ba Kerajaan Allah hei mu potafuda wobesar te. Ong mipaneng diy rena?Matius 24:14; 28:19, 20.

16 Rasul Paulus de midomahia ba maring kang wobesar mu awang ba hebeli daliela, hei dewofang mu ”osang”. (2 Korintus 4:7) Yehuwa ya hedomaha e miy ama afena wohadabesar heimu awang ba kul penting he e mipaneng. Heimu lela ba e Yehuwa hei milak minatea, ya nala he e paneng ba miy Yehuwa mihadasama de heluk. (Ibrani 6:10) Maring kang wobesar mu hekang edi ya ama ba eiy womahia mihadasama, mbeimu de edi ya ama ba eiy womahia de romong ba Yehuwa mihadap ya birang mihalor ri hiyeng kang. (Mihalal 1 Korintus 15:58.) Na awang afena hadoa ba de kul paneng ba omi mikang mihamol?

17. Nalawuhe awang ba maring kang wobesar mu de pomi mihasoung ba kul mipaneng?

 17 Awang ba maring kang wobesar mu tukai mitasuong. Pi kul ”Allah hamau buka wobesar, mu tomi tukai mitasuong te”. (2 Timotius 4:2) Kerajaan Allah heimu amakang dotafuda de kul womahia te. Surah Rieling dewofang, ”Yehuwa he leng lea ngmana! Ngabeta siye!” Hewosik hedi ”heleng mia de kul siye”! (Zefanya 1:14; Habakuk 2:3) Rofi, wal lunga na Yehuwa heleng lea de kul siye ba ruli Iblis ba tahupang opi hanau. Hei de dar midalek na amakang wei wohokafang ba de miahiy ba Yehuwa hei milak minatea te.

18. Nalawuhe ama Kristen hiyeng rofi afena pokari Yehuwa hei milak minatea te?

18 Yehuwa domaha ama Kristen hiyeng rofi afena pokari hei he holuk te. Surah Rieling dewofang, ”Mitapieta tei woreya ya mitomi hasuong ba pipak pipaneng, kang, pi teitoluol kopang tetok do abeti te, mbeimu ama kabei de papaneng wuda na haba mitapieta mitarumai, wai latukai te, mu pi hiyeng ba leng hedi mitadap.” (Ibrani 10:24, 25) Teitoluol dotafuda pi siye te. Teitoluol mu de leng kang miy ter ba pi mitapieta mitarumai ya mitewofang ya siye.

19. Nala he pomong ba pi mokeni neng mol Kristen pi mihiyena?

19 Leng teitoluol ba e siye, mokeni kang ba de omong Yehuwa holuk e hiyeng kang. Mokeni neng ya mol ba tara-tara he e hiyeng kang, ya edi wuda, de mifik ba domaha kang paneng ba Yehuwa holuk. Ya edi wuda dedi wei bay wal ama rofi na, mani de hasalaha mipaneng. Hare de hasalaha mipaneng mati pomaha hesalah hedi wotafang. (Mihalal Kolose 3:13.) Pi mokeni neng ya mol Kristen weimu hekang hu pi hehalal, hei pi paneng de pomong ba pi Yehuwa mihadap kang.

 BIRANG HIYENG ROFI

20, 21. ”Birang hiyeng rofi” mu nala?

20 Yehuwa domaha hemokeni weimu dotafuda hebirang kang hamol. Surah Rieling dewopidasakolah ba pi birang ariy falaka ya pi birang yala opi mu kul waldosama na.

Yehuwa domaha ”birang hiyeng rofi” e hiyeng. Omaha rena?

21 Ariy falaka mu pi birang mihalor, wal tung 70 namati 80 ref na. Pi ”birang mihalor” ba wal tarik tafiy na, rama amoni, ya kang hamol ba firdaus masena mia. Heihe Surah Rieling dewofang ba ”birang hiyeng rofi”. Yehuwa de pi dapakang ba birang hiyeng rofi opi mu de mipir, haba yala pi kul mifik ba birang hiyeng rofi mu ”hopuna rumai” te.1 Timotius 6:12, 19.

22. (a) Pi lateiur ”birang hiyeng rofi mu hopuna rumai”? (b) Nalawuhe birang mihalor mu ponakala mifik pi wal hiyeng na te?

22 Pi lateiur ”birang hiyeng rofi mu hopuna rumai”? Heimu pi kul ”mifik ba kang paneng te” ya ”kang hamol ba pi mipaneng mu tukai faring te”. (1 Timotius 6:18) Heimu he arti, nala he pi Surah Rieling mi wosakolah pi haluol birang te. Haba, birang hiyeng rofi mu wala pi ponakala mifik ba hiyeni na. Herofi mu birang mihalor mu pi wal hiyeng na te. Heiopi mu Yehuwa de la hai miy heihui hefatil wei ba heluk her, mbeimu ”domi kang hamol wuhe”. (Roma 5:15) Herofi mu Pima ba mar surga mia domaha nal opi miy dehui defatil ba heluk wei her.

23. Nalawuhe yala miahiy ba hiyeng rofi mu pi mipaneng te?

23 E isi mihatangar, ’Lela ba Allah homi hoyai he ne puna ba holuk rena?’ E miomahia ba e miamohawai kabei mipaneng temati, e abeta mipaneng te. Pi Yehuwa hohaba ya pi kul mifik ba hei haluol Yehuwa mu de pi wiy ba. Leng hewosik peya ba ruli Iblis tahupang opi homi  mia ama ba Yehuwa holuk de hei wofikang. Hewohaluol hepakang wuda Yehuwa de kul mipaneng ba pi Firdaus taha mia ba birang mihalor. Rofi, yala woheinuk rofi he e paneng, birang hiyeng rofi e hiyeng kang!