Langhalou konten

Langhalou menu sekunder

Langhalou daftar isi

Saksi-Saksi Yehuwa

Alor Abui

Nala he Surah Rieling Dewopidasakolah?

 PASAL 1

Nal Hiyeng Rofi Ba Allah Hei

Nal Hiyeng Rofi Ba Allah Hei

1, 2. Hetatangar-hetatangar nala he ama mi wofang?

KANO-KANO wei he tatangar mu faring. He falaka ong ko, hefaring wobesari haba dewai mi atangar, ’Nalawuhe?’. Ya ong ko wohawai, haba ko dewai mi atangar, ’Haba nalawuhe?’

2 Abeti mayak ya fikang potafuda pitatangar faring hadoa. Ko pitatangar ba nala he pine, pipuna, ya pi bel. Nati, pitatangar ba kulkang hadoa ba pi birang yala hei ya ariy falaka hei. Haba pitatangar-pitatangar ba eyala wei, hewohawai ba tomi misei pi wala hiyeng na, pong ko poaiy hewohawai tahai na.

3. Nalawuhe amakang faring de midomahia hetatangar ba kul penting he wohawai de hiyeng beka?

3 Pitatangar-pitatangar ba kulkang wei hewohawai Surah Rieling mia rena? Mani ama wotanut Surah Rieling hewohawai hadoa, haba ama midomahia mu Surah Rieling kul wal tomi misei na. Dewotanut nahani, guru-guru namati pendeta he wohawai kang. Ya afena wei la tukai funa-funa ba wofang, hewohawai de wala hiyeng na. Edi lateiwuda?

4, 5. Hetatangar kul penting nala he opa? Nalawuhe hewohawai mu pi kul tahai te?

4 Hetatangar-hetatangar hedi wei hewohawai ko omaha hiyeng rena, hedosama: Nalawuhe ko ne opi mia? Ne mong nala he ko de midalek? Allah hamo mu lateiwuda? Yesus mu guru ba ama faring hiyeng, dewofang, ”E kul fang heimu de er, e kul tahai e hiyeng, e kul wohuor  de e haber.” (Matius 7:7) Woarang na ba, ya hewohawai ba e worumai o hiyeni te.

5 Rofi, hare e ”kul tahai iti” hewohawai ba Surah Rieling mia e hiyeng kang. (Amsal 2:1-5) Hewohawai mu tomi misei kang. Nala he e wosakolah birang kang hamol yala e hiyeng kang ya, worumai kulkang ba ariy falaka hei bay. Mie, hetatangar nuku ba ama faring tahai mideinunuk pi wobesar.

ALLAH HOMI PIDATOKA RE DE TAHUPANG?

6. Nalawuhe amakang faring de wotanut bekatafiela ba de hadatareu Allah homi wal hedatoka na?

6 Amakang faring de wotanut, Allah homi wal hedatoka na. De midomahia Allah homi kul-kul hedatoka, ruli opi hamo wal opi wuda na. Pi hehalal yenang, tomi mitataluol, bekatafiela ya tei-tei mia. Ama harik hafiy, bekatafiela hadatareu, ya mongtanitang. Ama faring de midatangar, ’Allah homi ko kul-kul pidatoka, nalawuhe bekatafiela dewal hanau na?’

7. (a) Nalawuhe ama wotanut ba Allah mu tahupang? (b) Bekatafiela ba midalek pi lateiur worumai ba Allah wal heiyeri na?

7 Agama he pemimpin wei, minunuk de paneng ama worumai Allah mu tahupang. Hare nal beka midalek dewofang, hedi Allah he domaha. Dewofang nahani, hedi mu Allah he domaha ba midalek. Hare de heiur wofang, Allah he de heihasalah nahani. Haba Surah Rieling dewopidasakolah ba Allah mu, de wala bekatafiela heiyeri na. Yakobus 1:13 dewofang, Allah dewal bekatafiela mipidasama na. Ayat hedi dewai wofang, ”Pi bekatafiela hadatareu, doma pi opiur wofang na, ’Allah he paneng mipidasama.’ Herofi mu bekatafiela Allah dewal paneng na ya dedi bay de wala paneng ba  mipidasama na.” Heiopi he arti nal-nal beka ba daleki Allah de dara wotap na haba, de wala bekatafiela heiyeri na. (Mihalal Ayub 34:10-12.) Mie, hedosama nuku pi hehalal.

8, 9. Hedosama nuku wofang nalawuhe bekatefiela ba pi hadatareu pi Allah woheihasalah beka.

8 Abeti nuku de fikang wei dokari tofa nuku. Hema dekul mihiyena ya, de wohadasakolah lateiur woheinuk miy kang. Haba, abeti hedi wal de fikang heluk na de woheinuk miy ba, wala tofa mia na. De bekatafiela he mipaneng ya, masalah hadatareu. Nala he daleki na e hema woheihasalah heimu, wil wal tofa mia na haba dewal wotap na? Walna! (Lukas 15:11-13) Eyala hema wuda, amakang domaha bekatafiela miahiy ba paneng Allah dewal wotap na. Hare, nal bekatafiela ba midalek pi kul wopimunang Allah mu dewal heiyeri na. Allah mu pi woheihasalah beka.

9 He alasan kang hadoa, nalawuhe bekatafiela ba midalek Allah de lawomahia. Heiopi hewohawai Surah Rieling mia Pasal 11 buku opi, mi wosakolah. Haba, e worumai Allah homi kul mipiyena ya, bekatafiela ba pi hadatareu pi woheihasalah beka. Herofimu, he Dedy donakala pomong ba bekatafiela ba pi hadatareu weimu woheikang.Yesaya 33:2.

10. Nalawuhe pi worumai nal beka ba ama tahupang wei de mipaneng dotafuda Allah de woheikang?

10 Allah mu Rieling. (Yesaya 6:3) Nal karikarnuku ba de paneng mu sani masolang, sani ya kang. Hare, pi hei worumai kang. Amakang wala hedi wuda na. Minunuk de hasalah mi paneng nahani. Ya pemimpin ba homi kulrofi bay, he kuasa wal hopa na hare bekatafiela ba dalek de woheikang beka. Amakang he kuasa wal  Allah wuda na. Allah de hiyeng, ya nal beka ba dotafuda ama tahupang wei de mipaneng de woheikang. Ya nal beka wei dotafuda de hanau mihalor.Mihalal Mazmur 37:9-11.

AMAKANG DE BEKATAFIELA HADATAREU ALLAH HOMI LATEIWUDA?

11. Bekatafiela ba e hadatareu Allah de hehalal homi lateiwuda?

11 Nala he ruli taha midalek, ya nala ba e hadatareu dotafuda Allah de hehalal homi lateiwuda? Surah Rieling dewopidasakolah ba Allah mu, ”Rofi hapuna dekul mihiyena.” (Mazmur 37:28) Nala he kang ya, nala he beka Allah homi kul pidatoka. Amakang de bekatafiela hadatareu, Allah homi hobeka. Surah Rieling dewofang,”Allah homi kul harik” Asing mia bekatafiela midalek Allah de hehalal mu homi harik. (Kejadian 6:5, 6) Allah de dar midamohawai na. (Maleakhi 3:6) Surah Rieling dewofang, Allah mu homi kul-kul e datoka.Mihalal 1 Petrus 5:7.

Surah Rieling dewopokafang ba Yehuwa mu de nal karikarnuku Paneni haba homi sadafalasing

12, 13. (a) Nalawuhe pi ama afena mihiyena ya hetatoka, ya bekatafiela ba ruli taha mia pi hehalal pomi lateiwuda? (b) Nalawuhe pi worumai ba bekatafiela ya wal rofihapuna na Allah de hanau?

12 Surah Rieling bay dewai wofang, Allah damo puna piy paneni. (Kejadian 1:26) Heimu, Allah piy paneni hedosama pidi bay pi sifat-sifat hei wuda kang. Hare amakang de bekatafiela hadatareu pi hehalal ko pomi wosei, haba Allah homi mu kul tukai wosei! Ko pi lateiur hiyeng?

13 Surah Rieling dewopidasakolah ba ”Allah mu kang.” (1 Yohanes 4:8) Nal karikarnuku ba Allah de paneng heimu kang he mihasuong wuhe. Hare pi kang mi wotiyeng diy heimu Allah kang wuhe. Opi e wotanut: E kuasa de opa bekatafiela ya walrofi hapuna na ba ruli  taha mia, na e hanau kang? Rofi, heimu e amakang mihiyena wuhe. Allah mu lateiwuda? Allah he kuasa hopa, ya de mipiyena hare bekatafiela ya walrofi hapuna na mu dotafuda de hanau. Pi worumai Allah hepakang ba dotafuda dong wofani ba, buku opi he ahola taha mia de midalek! Haba e pakang hei worumai Allah hei, e faring hiyeng te.

ALLAH DEIDOMAHA E HIYENG KANG

E omaha e mokeni hadoa nala he e wofang, e ana. Allah dana de wopokafang haba Surah Rieling he mia

14. Allah hana mu ma, ya nalawuhe pi hana puna?

14 E omaha e mokeni hadoa, la ahola nala he e wofang? E ana. Hare Allah hana ko hopa rena? Agama mani dewofang hana mu Allah nati Tuhan, haba hedi wei dotafuda wal hana na. Hedimu he gelar, hedosama ”lei” ya ”presiden.” Allah dewofang nana mu Yehuwa. Mazmur 83:18 (Ayat 19, Terjemahan Baru) dewofang, ”Ba ama hiyeng nahani, ana he Yehuwa ba buku opi taha mia e onakala Midaliela.” Ama ba Surah Rieling bileni, de Allah hana puna ribi asaha mia. Yehuwa domaha hana e hiyeng ya e puna. Dana de wohokafang ba e hemokeni kang diy.

15. Allah hana mu he arti nala?

15 Allah hana mu Yehuwa, he arti mu kul lohi. Heimu, he pakang dotafuda de mipaneng  kang ya  nala he domaha de mipaneng. Nal karikarnuku de Allah hotap beka. Yehuwa he donakala dana puna. *

16, 17. Heiopi wei he arti mu nala (a) ”Kuasa Midaliela”? (b) ”Lei ba hewosik beng wal hadoa na”? (c) ”Nal karikarnuku Paneni”?

16 Eyala ahola mia pi mihalal Mazmur 83:18 De Yehuwa hei wofang: ”E onakala Midaliela.” Ya,  Penyingkapan 15:3 dewofang, ”Lea ya nala he e paneng lakang lahamol Yehuwa Allah ba kuasa midaliela. E lela dotafuda rofi hapuna ya rofi, lei ba hewosik beng wal hadoa na.” (1 Timotius 1:17) Gelar ba ”Kuasa Midaliela” he arti mu nala? Heiopi mu Yehuwa he kuasa midaliela nal karikarnuku mihapieti. Ya gelar ”Lei ba hewosik beng wal hadoa na” he arti mu Yehuwa mu kul hadoa iti. Mazmur 90:2 dewofang tung dolal leng dowat Yehuwa de hadoa iti. Kul lakang lahamol!

17 Yehuwa he donakala nal karikarnuku paneni. Penyingkapan 4:11 dewofang, ”Yehuwa e ni Allah, kang hamol, ni oluk ya kuasa dotafuda e edi hepaniy kang, heimu e onakala nal karikarnuku paneni wuhe.” Rofi,  malaikat ba mar surga mia, furi ba adiy taha mia, bata buka wei, afu ba tama wal mia ya nal karikarnuku ba ri wotanut weimu Yehuwa—he paneni!

E YEHUWA HEMOKENI KANG DIY RENA?

18. Nalawuhe amakang faring dewotanut de Allah hemokeni beka? Haba nala he Surah Rieling dewofang?

18 Amakang faring de Yehuwa hesifat-sifat kang mihalal de wofuna nahani ya dewotanut, ’Allah mu he kuasa kul midaliela, kul mulia ya kul buokal wal pimina mia na, homi dar pidatoka rena?’ Haba, pi tanut heiwuda Allah dewal domaha na. Yehuwa domaha de miadap. Surah Rieling dewofang Allah mu ”ama nunuku de wala pibuokal na”. (Kisah 17:27) Allah domaha e mihadap. De wopakang diy ba,”dei bay de mi adap”.Yakobus 4:8.

19. (a) E lateiur Allah hemokeni kang? (b) Allah he sifat teihe kul omi hafik?

19 E lateiur hemokeni kang? Yesus dewofang, ”Heiopi mu birang mihalor hei, heimu ama kul pengetahuan ba eiy de hiyeng, e onakala Allah hiyeng rofi ya, pribadi ba e habot seiy Yesus Kristus.” (Yohanes 17:3) E wosakolah iti ba, Yehuwa ya Yesus e hiyeng birang mihalor e hiyeng kang. Hedosama pong wosakolah diy ba ”Allah mu kang”. (1 Yohanes 4:16) Haba, dei bay hesifat-sifat afena ba kulkang faring hadoa. Surah Rieling dewofang ”Allah mu de mipiyena, ya homi sadafalasing, wal abeta te kilikil na, ya hekang mu tukai faring ya hiyeng rofi”. (Keluaran 34:6) Yehuwa mu ”kang, ya tehasalah domaha wodafang”. (Mazmur 86:5) Allah mu deihoaring ya tadakor mu hopa. (2 Petrus 3:9; Penyingkapan 15:4) He sifat-sifat kang ba tomi hafik he faring e Surah Rieling mi wosakolah kang.

20, 21. Allah pi hehalal beka haba pi lateiur mihadap kang?

 20 Allah mu e hehalal beka haba e lateiur mihadap kang? (Yohanes 1:18; 4:24; 1 Timotius 1:17) E Surah Rieling mihalal ba Yehuwa hei, hedi mia te e hiyeng Yehuwa mu Pribadi ba hadoa. (Mazmur 27:4; Roma 1:20) Hare Yehuwa hei e faring wosakolah, ong tukai mihiyena ya mihadap kang.

Tema wuda dewil wei demihiyena haba Allah ba mara surga mia leng kopang de mipiyena mu kul mitaha

21 Pong hiyeng Yehuwa mu Pima wuda. (Matius 6:9) De birang mi pir, ya dei bay domaha birang ba kulkang e hiyeng. Hedosama hedi he pima kang domaha paneng mi dewil wei mihadasama. (Mazmur 36:9) Rofi, Surah Rieling dewopidasakolah e Allah hemokeni diy kang. (Yakobus 2:23) Kul dei afena. Yehuwa de nal karikarnuku Paneni, domaha e hemokeni kang!

22. Ama afena domaha ba otap Surah Rieling wosakolah haba nala he e mipaneng?

22 E Surah Rieling wosakolah ko amakang faring de otap. Ko de wofuna nahani ba na e agama e hemanau. Haba mahe otap ba e Yehuwa hemokeni kang diy e hei haluol na. Yehuwa mu, mokeni ba kulkang he e hiyeni.

23, 24. (a) Nalawuhe e kul mitatangar iti? (b) Pasal hewohaluol nala he e wosakolah?

23 Hare e Surah Rieling wosakolah, ko wala wal omi misei na. Funa ba tatangar na, namati nala he ohiyeng temati afena hehafang. Yesus dewofang, pi tomi damasing ba kano fila wuda te. (Matius 18:2-4) Ya kano fila de nal faring la hetatangar. Allah domaha hewohawai e hiyeng te. Hare e kul-kul Surah Rieling wosakolah diy e worumai nala he e wosakolah mu nal hiyeng rofi.Mihalal Kisah 17:11.

24 Lela kang ba Yehuwa hiyeng, mu Surah Reiling wosakolah. Pasal hewohaluol te pi wosakolah, nalawuhe Surah Rieling mu buku afena dil wal dosama na.

^ par. 15 Hare e Surah Rieling wal Yehuwa hana puna na, haba omaha he arti ya Allah hana wofang hei e hiyeng mati, hehalal Catatan Hewosik 1.