Langhalou konten

Langhalou menu sekunder

Langhalou daftar isi

Saksi-Saksi Yehuwa

Alor Abui

Nala he Surah Rieling Dewopidasakolah?

 PASAL 15

Lela Hiyeng Rofi ba Allah Holuk

Lela Hiyeng Rofi ba Allah Holuk

1. Mahe wopokafang ba pi lela hiyeng rofi puna ba Allah holuk te?

AGAMA faring dewofang nal hiyeng rofi ba Allah hei he de puna ama wohadasakolah. Haba hedi ko wal rofi na, heimu agama faring nal tara-tara he de ama wohadasakolah ba Allah mu ma, ya pi lateiur holuk. Lela hiyeng rofi ba Allah holuk mu pi lateiur hiyeng? Yehuwa he donakala wopokafang ba pi lateiur holuk kang.

2. Allah holuk ba hiyeng rofi mu pi lateiur wosakolah?

2 Yehuwa de Surah Rieling mipidi ba pi lela hiyeng rofi ba Allah holuk wosakolah kang. Hare Surah Rieling wosakolah, Yehuwa de omong ba nala he e wosakolah hekang e hiyeng kang, heimu Yehuwa homi e datoka wuhe.Yesaya 48:17.

3. Nala he Allah domaha ba pi mipaneng te?

3 Ama faring dewofang ba agama dotafuda Allah dohomaha, haba wal hedi he Yesus dewopidasakolah na. Dewofang, ”Wal ama dokopang ba opiur wonokafang, ’Tuan, Tuan,’ de Kerajaan surga mi we kang, haba ama ba Nima surga mia he domaha milak minatea.” Hare kulkang mipidasama ba Allah hedomaha mu nala pi wosakolah ya haluol paneng te. Heiopi mu nal ba penting, mbeimu ama ba wal Allah heluk na Yesus de do iy mu ama tahupang ba de ”beka mipaneng miy hukum hapieti”.Matius 7:21-23.

4. Allah hei milak minatea nala he Yesus dewofang?

4 Yesus de pi wong wofang ba pomaha Allah hei milak minatea bekatafiela ko pi hadatareu kang. Dewofang,  ”Lela kiding ba kadia miwe, lela ba lea mu mong wotikeli, ya heiopi amakang faring haluol, haba lela ba kiding ya kadia birang wotikeli, ya la ama kabei wala he hiyeng.” (Matius 7:13, 14) Lela ba kiding namati lela hiyeng rofi ba Allah holuk mu de tapong puna ba birang mihalor kang. Lela lea namati lela ba hasalah puna Allah holuk de tapong puna ba mong wotikeli. Haba amakang nuku mong Yehuwa dewal domaha na. Amakang dotafuda Yehuwa de leng miher ba hei wosakolah.2 Petrus 3:9.

LELA HIYENG ROFI BA ALLAH HOLUK

5. Ama ba lela hiyeng rofi puna Allah holuk pi lateiur hiyeng?

5 Yesus dewofang ba mahe lela hiyeng rofi puna ba Allah holuk pi hiyeng kang. He lela mu nala he deworumai ya de pak de paneng pi mihehalal kang. Dewofang, ”He upi mia rong hiyeng kang.” Ya dewai tau wofang, ”Bata dokopang kang, he upi bay kang.” (Matius 7:16, 17) Heiopi he arti mu wal wofang ba ama ba Allah holuk mu ama rofi. Haba Allah hehui hefatil wei dewodabalaibuku nasiy ba nala he kang hedi he de mipaneng nahani. Yala mie pi hehalal nala he pomong kang ba mahe Allah holuk ba lela hiyeng rofi puna pi hiyeng.

6, 7. Nalawuhe ibadat hiyeng rofi mu heiyeri Surah Rieling? Yesus hetok pati nala he dewopidasakolah?

6 Wotadasakolah ba heiyeri Surah Rieling. Surah Rieling dewofang, ”Bileng Rieling dotafuda Allah he tanut ya hekang mu puna pidasakolah, hotau, ya nal-nal harof, hohirai diy ba rofi hapuna homi mia, ba Allah hehui de nal karikarnuku mipaneng kang, awang kang dotafuda domaha ba de mipaneng.” (2 Timotius 3:16, 17) Rasul Paulus de bileni ba mi ama Kristen wei heri, ”Hedimia Allah hamau buka ri hepaniy, ri nupa mi mahiy, hedi ri hepaniy wal  amakang hamau buka na, haba, dorofi heiweimu, Allah hamau buka.” (1 Tesalonika 2:13) Ibadat hiyeng rofi mu heiyeri Allah hamau buka mani ba Surah Rieling mia. Heimu heiyeri wal amakang hetanut, tradisi, namati nal afena.

7 Nal karikarnuku ba Yesus dewotadasakolah heiyeri mu Allah hamau buka. (Mihalal Yohanes 17:17.) Minunuk de bileng Rieling miwofani. (Matius 4:4, 7, 10) Allah hehui hefatil ba hiyeng rofi de Yesus hetok pati haluol ya nala he dewopidasakolah dotafuda heiyeri mu Surah Rieling.

8. Yehuwa holuk mu nala he Yesus dewopidasakolah?

8 Yehuwa mani he holuk. Mazmur 83:18 dewofang, ”Ba ama hiyeng nahani, ana he Yehuwa ba buku opi taha mia e onakala Midaliela.” Yesus domaha ama kul hiyeng ba Allah hiyeng rofi mu ma, ya Allah hana de miy ama wohadasakolah. (Mihalal Yohanes 17:6.) Yesus dewofang, ”Yehuwa e Allah, he e kul holuk te ya kul he donakala mani he awang rieling e milak minatea.” (Matius 4:10) Hare Allah hehui hafatil weimu pi Yesus hetok pati haluol. Yehuwa mani he pi holuk, hana pi puna, ya hana pi ama wohadasakolah ya nala he de paneng mipidasama.

9, 10. Kang mu lateiur pi mitapieta wotiyeng diy?

9 Pi kang mu pi kul-kul ama afena wohiyeng diy te. Yesus de demurid-murid wei wohadasakolah ba midapieta midiyena te. (Mihalal Yohanes 13:35.) Pi ya tei he ama, pi budaya lateiwuda nati pi kawasa re pi hui bay waldowuda na. Kang ba pi mitapieta wotiyeng diy mu de paneng ba Yehuwa hehui hefatil wei de domi muku hedosama nang naha wuda. (Kolose 3:14) Hare pi wal yenang haluol ya ama faheng na. Surah Rieling dewofang, ”Allah hewil ya Iblis hewil wei hiyeng rofi mu: Ama nunuku ba wal rofi hapuna mipaneng na wal Allah heina, hare ama ba wal de  mokeni mihiyena na hadou heiwuda.” Ya dewai mitau wofang, ”Pi kul mitapieta mitiyena te, wal Kain wuda ba si fasik hei mbeimu de denaha hei faheni diy.”1 Yohanes 3:10-12; 4:20, 21.

10 Pi leng, pi rumai pi baharing ya nal ba popa pi puna ba mitapieta mitomong ya mitarumai diy. (Ibrani 10:24, 25) Pidi ”kang pi mipaneng ba mi amakang faring mihadasama”.Galatia 6:10.

11. Nalawuhe pi Yesus miahiy ba de lela nuku wuda ba Allah wotikeli?

11 Pi kul Yesus heluk te mbeimu he dedi lela ba Allah wotikeli. Surah Rieling dewofang, ”Hewohaluol ama afena mia birang walna mbeimu dedi mani, heimu adiy hiyeta mia hana afena walna ba mi amakang hanaisena mihedi, ya he dedi wuhe pi birang kang.” (Kisah 4:12) Pasal 5 ba buku opi mia, pong wosakolah ba Yehuwa de Yesus habot ba de birang de tebusan heri ba miy amakang ba heluk heri. (Matius 20:28) Yehuwa de Yesus miahiy ba de tapong puna ya de Lei ba ruli dolea woparentah. Heiwuhe nalawuhe Surah Rieling dewofang ba pomaha birang mihalor temati pi Yesus heluk te.Mihalal Yohanes 3:36.

12. Nalawuhe pi wal politik hohau na?

12 Pi wal politik hohau na. Yesus dewal politik haluol na. Pilatus ba Romawi he penguasa hapomareng mia hehasalah tahai dewofang, ”Ne Kerajaan mu wal ruli opi heina.” (Mihalal Yohanes 18:36.) Hedosama Yesus wuda Kerajaan Allah ba surga mia he pi hei haluol, ya alasan opi wuhe pi ya tei mia bay pi wal politik hohau na. Haba Surah Rieling de pohapuna ba ”wewenang ba daliela” heluk, heimu amakang he parentah. (Roma 13:1) Negara ba pi mia he hukum pi heluk. Haba, hukum ba amakang hei ya hukum ba Allah hei dil wal dosama na, rasul wei hei pi  woreya, dewofang, ”Pi kul Allah heluk ba de wokuasa wal amakang na.”Kisah 5:29; Markus 12:17.

13. Kerajaan Allah hei nala he pi wobesar lol?

13 Pi worumai ba Kerajaan Allah he donakala lela ba bekatafiela ruli taha mia woheikang. Yesus dewofang ”maring kang ba Kerajaan hei” ruli dolea mi amakang dotafuda wohadabesar. (Mihalal Matius 24:14.) Nala he Karajaan Allah de mipaneng miy pidasama amakang he parentah de paneng beka. (Mazmur 146:3) Yesus dewotadasakolah ba Kerajaan Allah mu pi wo doa te, hedimia dewofang, ”Mahofaling ba Kerajaan do siye. Mahofaling ba hedomaha de midalek, buku taha bay, de mara surga mia wuda.” (Matius 6:10) Surah Rieling dewobileni ba Kerajaan Allah de amakang he parentah dotafuda hamul ya ”Kerajaan hedi de natea mihalor”.Daniel 2:44.

14. E wotanut mahe Allah hiyeng rofi holuk?

14 Hare nal-nal ba mar arah hei pong wosakolah, pi pi isi mihatangar, ’Mahe nal ba Surah Rieling homi mia he de puna wotadasakolah? Allah hana mahe ama afena wohadasakolah? Mahe kang hiyeng rofi midapieta wodiyeng diy ya de worumai ba Allah de Yesus puna ba tadoa hiring amoni? Mahe wal dei miy politik hohau na? Mahe wotadasakolah ba kerajaan Allah mani he de bekatafiela ba pi hadatareu wei woheikang?’ Hewohawai mu, Saksi-Saksi Yehuwa mani.Yesaya 43:10-12.

NALA HE RI MIPANENG TE?

15. Pomaha pi ibadah Allah de hepaniy temati nala he pi mipaneng te?

15 Allah la worumai mani mu beka. Heimu loki maheng bay de Allah heiworumai haba dewal heluk na. (Yakobus 2:19) Pomaha ba pi Ibadat Allah de hepaniy temati pi wal hei worumai mani na, haba pi hei milak minatea te.

16. Nalawuhe agama ba wal hiyeng rofi na pohoaiy?

 16 Pomaha ba pi ibadat Allah de hepaniy temati agama ba wal hiyeng rofi na bay pohoaiy te. Nabi Yesaya dewobileni, ”Hanaisena mia wesei, e isi wofikang ba de sani.” (Yesaya 52:11; 2 Korintus 6:17) Heimu he arti nal ba agama ba wal hiyeng rofi na dil dar dotilaka dotafuda pohoaiy.

17, 18. ”Babilon Lea” mu nala, ya nalawuhe kul abeta ba pohoaiy te?

17 Agama ba wal hiyeng rofi na mu nala? Heimu agama ba de wotadasakolah ba pi Allah holuk, haba Allah hamau buka dil wal dosama na. Agama ba wal hiyeng rofi na dotafuda Surah Rieling de hana hadou ba ”Babilon Lea”. (Penyingkapan 17:5) Nalawuhe? Yeu sarang ba Nuh he masa mia wosiki agama ba wal hiyeng rofi na hewotadasakolah la ahola hei kota Babilon mia. Wotadasakolah ba wal rofi na opi ruli dolea mia. Hedosama, ama ba Babilon mia de allah sua holuk. Yala opi bay agama faring dewotadasakolah ba Allah mu hamo sua heiopi mu Tritunggal, haba Surah Rieling de he falaka wotadasakolah ba Allah hiyeng rofi mu la nuku ba hana he Yehuwa, ya Yesus mu Hewil. (Yohanes 17:3) Ama ba Babilon mia bay deworumai ba ama mona he isi aroi dar birang ba ara lefing mi bekatafiela hadatareu. Hedi wal rofi na.—Hehalal Catatan Hewosik 14, 17, ya 18.

18 Allah dewofang agama ba wal hiyeng rofi na dotafuda langkaber dong hanau. (Penyingkapan 18:8) Nalawuhe agama ba wal hiyeng rofi na mu pi kul abeta doiti te? Allah Yehuwa domaha yala leng dara hadoa hedi pi mipaneng te.Penyingkapan 18:4.

Yehuwa hehui hefatil rokari hei milak minatea, ama ba hei milak natea ruli dolea mia e hanaisena mia kang

19. E woheinuk miy ba Yehuwa hei milak minatea nala he ko de paneng ba miadasama kang?

19 E woheinuk miy ba agama ba wal hiyeng rofi na e do  iti ya e Yehuwa hei milak minatea e mokeni faring, e nang e naha woheinuk ba e miy opi dewal hiyeng na, ya de beka paneng miadasama kang. Haba Yehuwa dewal eiy wodafang na. Amakang faring ruli dolea mia ba Yehuwa hehui hefatil ba midapieta midiyena e hanaisena mia, ya e worumai hadoa ba ruli tifa ba Allah hei e birang mihalor kang. (Markus 10:28-30) Tung dowat leng dolal e mokeni ya e nang e naha ba de otap Yehuwa hei milak natea na ko de woheinuk miy ba Surah Reiling wosakolah kang.

20. Nalawuhe penting ba lela hiyeng rofi puna Allah holuk te?

20 Wal lunga na tahupang kadia dotafuda Allah de hanau, ya he Kerajaan ruli dolea dewoparentah. (2 Petrus 3:9, 13) Ruli hedi ariy falaka mu kul kang hamol! Ama nunuku dong Yehuwa he holuk ba Yehuwa domaha wuda. Hare penting ba yala e woheinuk miy ba lela hiyeng rofi puna ba Allah holuk te.