Langhalou konten

Langhalou daftar isi

Saksi-Saksi Yehuwa

Select language Alor Abui

 PASAL 18

Na Ne Kul Ne Isi ya Ne Birang Miy Allah Her ba Nei Baptis?

Na Ne Kul Ne Isi ya Ne Birang Miy Allah Her ba Nei Baptis?

1. Buku opi ong wosakolah wosiki nala he ko e wotanut?

ONG buku opi wosakolah diy, nal hiyeng rofi ba Surah Rieling hei ong ko faring hiyeng, hedosama pakang ba birang mihalor, ama mona hamo teiwuda, ya worumai ba mitabirang diy. (Pengkhotbah 9:5; Lukas 23:43; Yohanes 5:28, 29; Penyingkapan 21:3, 4) Saksi-Saksi Yehuwa he teitoluol bay ong ko siye haluol ya e hehalal dedi wei he de agama hiyeng rofi mipaneng nahani. (Yohanes 13:35) Yehuwa rilia rinaisena bay ngko hadoa, ya ong ko woheinuk miy ba omaha hei milak minatea. Hare e ko  wotanut, ’Nala he yala ne mipaneng te ne Allah hei milak minatea kang?’

2. Nalawuhe ama neng Etiopia mu domaha ba hei baptis?

2 Hei opi he ama neng Etiopia dewotanut dedi mu de Yesus he masa mibirang. Leng kabei mitawi ba Yesus mihabirang diy he murid nuku hana he Filipus de ama neng hedi maring kang wohadabesar. Filipus de wohiyeng diy ba Yesus mu Mesias. Etiopia he ama hedi nala he dewosakolah homi mihasuong diy ba dewofang, ”Halal! Iya ruwo; nala he paneng ba wal nei baptis na?”Kisah 8:26-36.

3. (a) Parentah nala he Yesus de miy dehui defatil wei her? (b) Lateiur ama nuku hei baptis?

3 Surah Rieling de he falaka wopidasakolah ba pomaha Yehuwa hei milak minatea mati pidi baptis te. Yesus de demurid wei wohokafang, ”Ama ba ya bangsa tei-tei mia paneng ba do murid her ya hei baptis.” (Matius 28:19) Yesus bay hei baptis diy heimu hedosama ba mipidasama. Wal iya miy he kaiy mitok na, haba he isi miy iya wal mi arini. (Matius 3:16) Yala bay ama Kristen nuku hei baptis, dedi bay he isi dolea miy iya mi aring.

4. Edi baptis mu nala he e ama afena wohiyeng diy?

4 Edi baptis mia e ama afena wohiyeng diy ba, e kul-kul omaha Allah hemokeni kang ba e hei milak minatea. (Mazmur 40:7, 8) Hare e miatangar nala he ne mipaneng te nei baptis kang?’

PENGETAHUAN YA WORUMAI

5. (a) Dar edi baptis na la ahola nala he e kul mipaneng te? (b) Nalawuhe teitoluol kopang mu penting?

5 Dar edi baptis na, Yehuwa ya Yesus mu e kul hiyeng te. E Surah Rieling wosakolah hedi opi mu ong mipaneng. (Mihalal Yohanes 17:3.) Haba hedi mani dar beka.  Surah Rieling dewofang ba e kul ”pengetahuan rofi hei de opa ba womidi” ba Yehuwa hedomaha hei. (Kolose 1:9) Saksi-Saksi Yehuwa dei toluol kopang de omong ba e Yehuwa mihadap kang. Heiwuhe he alasan penting nuku ba teitoluol kopang mu e siye te.Ibrani 10:24, 25.

Dara edi baptis na, e kul Surah Rieling wosakolah te

6. Surah Rieling homi mia mu na e tafuda hiyeng te edi baptis kang?

6 Rofi, haba Yehuwa dewal wofang ba nal ba Surah Rieling homi mia dotafuda e hiyeng te edi baptis na. Yehuwa dewal wofang ba Etiopia he ama mu nal hiyeng rofi dotafuda de hiyeng te hei baptis na. (Kisah 8:30, 31) Ya pidi pi kul Allah hei wosakolah mihalor iti. (Pengkhotbah 3:11) Haba edi baptis mu, Surah Rieling hewotadasakolah ba heiyeri mu e hiyeng ya e hepaniy te.Ibrani 5:12.

7. E Surah Rieling wosakolah hekang nala he e hiyeng?

7 Surah Rieling dewofang, ”Hare worumai walna, ama Allah homi hado kang beka.” (Ibrani 11:6) Hare dar edi baptis na e worumai mu de kul hadoa te. Surah Rieling dewofang ba Korintus he ama ba asing mia wei nala he Yesus hehui hefatil wei dewofang de womahia ya hekang mu ”deworumai nahani ya hei baptis yoti”. (Kisah 18:8) Edi bay hei wuda, e Surah Rieling wosakolah mia de omong ba e Allah he pakang ya Yesus he korban tebusan ba de pi hasalah ya mong tanitang hei tadoa hiring amoni worumai.Yosua 23:14; Kisah 4:12; 2 Timotius 3:16, 17.

NAL HIYENG ROFI BA SURAH RIELING HEI MIY AMA AFENA WOHADABESAR

8. Pengetahuan ba opa nala he omi mihasuong ba mi ama afena wohadabesar?

8 Surah Rieling hei e faring wosakolah ba e hehalal e birang homi mia de mi omong, e worumai de kul rumai  diy. Nala ba ong wosakolah diy de omi mihasuong ba omaha e ama afena wohadabesar. (Yeremia 20:9; 2 Korintus 4:13) Haba, mahe e wohadabesar?

E worumai de miasuong ba nala he e wosakolah e miy ama afena wohadabesar

9, 10. (a) Nala ba e wosakolah diy e miy mahe wohadabesar kang? (b) Omaha sidang rokari maring kang wobesar nala he e mipaneng te?

9 Nala he e wosakolah e omaha e mi ama ba e tofa homi mia, e mokeni, e tetangga namati e mokeni ba awang mia, wohadabesar nahani. Heimu kang, haba e paneng mu sadafalasing ya kang hamol te. Miti mie ama ba sidang mia wei rokari maring kang wobesar lol kang. Ong heiopi paneng kang Saksi Yehuwa ba Surah Rieling puna woadasakolah e wohadabesar ba omaha sidang rokari maring kang wobesar. Hare Saksi Yehuwa ba de Surah Rieling woadasakolah de e hahalal ong omaha ya e birang ong Surah Rieling do iy ama ba woadasakolah rillia penatua ayoki hada tohayei kang.

10 Riy mi ridi tohayei nala he ri wobesar? Penatua de adabesar ba de e hehalal nala he Surah Rieling homi mia ba woadasakolah diy heiyeri ong hiyeng ya e worumai rena, ya nala he Surah Rieling dewofang leng kopang e birang homi mia e haluol, ya e kul-kul omaha ba e Saksi Yehuwa diy. Woamunang penatua mu de anggota sidang wei homi hedatoka ya de hei milak minatea hanaisena mia edi bay hadou, hare besar mati funa na. (Kisah 20:28; 1 Petrus 5:2, 3) Pertemuan hedi wosiki, penatua dong wo okafang ba e syarat mihayei ba sidang mia wei rokari maring kang wobesar.

11. Nalawuhe kul penting ba dar sidang rokari maring kang wobesar na e miamohawai te?

11 E birang homi mia penatua wei de hehalal e pak e paneng, e besar e lasar, e woheikang, maice sidang mia  wei rokari maring kang wobesar lol kang. Nalawuhe mi amohawai hedi mu kul penting? Mbeimu Allah hei pi ama afena wohadabesar mu pi he wakil wuda, ya pi birang homi mia mu pi Allah hana hado kang te.1 Korintus 6:9, 10; Galatia 5:19-21.

WOARANG YA MI AMOHAWAI

12. Nalawuhe amakang dotafuda hasalah ba de mipaneng mu dewodarang te?

12 Dar edi baptis na, nal afena e hadou mipaneng te. Rasul Petrus dewofang, ”Hei wuhe woarang, ya mi amohawai ba e hasalah wei wolut.” (Kisah 3:19) Woarang mbeimu he arti nala? Heimu he arti hasalah ba e paneni e kul mi oding te. Hedosama, tafui taka he e mi papaneng, heiopi e woarang te. Ya, ko e birang homi mia ong mifik ba kang he e mipaneng, haba woarang mu e dar kul mipaneng iti te mbeimu potafuda wal ama rofi na, ya pi Allah hafang ba pi hasalah dewodafang.Roma 3:23; 5:12.

13. ”Mi amohawai” mu he arti nala?

13 Nala he pi mipaneng, mitoding mani na ngkang? Walna. Petrus dewofang ba edi bay kul ”mi amohawai” te. Heiopi mu he arti nal beka ba e mipaneng wei dotafuda e dowat ya yala nalkang he e mipaneng te. Hedosama, wotanut la ahola e lela nuku haluol ba afeng nuku miya. Ong lunga helak e miomahia e lela hasalah haluoli diy. Nala he e mipaneng? E falai-falai lak, e mi o aheli, e miawai ya lela hiyeng rofi he e haluol. Hedosama, e Surah Rieling wosakolah e hiyeng ba e birang homi mia nal ba e mi papaneng ba beka e kul mi amohawai te. Omaha ba ”mi amohawai”—he arti mu mi amohawai tifa paneng—ya nalkang hamol he e mipaneng.

 E ISI YA E BIRANG E MIY ALLAH HER

Ong Yehuwa hadapakang diy ba e hei milak minatea?

14. E lateiur e isi ya e birang miy Allah her?

14 Nal penting afena ba dar edi baptis na e mipaneng te mu e isi ya e birang e miy Yehuwa her. Leng ba e isi ya e birang e miy Yehuwa her, e doa puna wohokafang. Doa hedi homi mia e hadapakang ba he dedi he e holuk ya e birang homi mia hedomaha hei he e deicura milak minatea.Ulangan 6:15.

15, 16. Nala he ama homi hasuong ba de isi ya de birang de miy Allah her?

15 Pakang ba Yehuwa hei mani he pi milak minatea mu hedosama ama ba e mihiyena e hadapakang, e birang homi mia mu hei he e mihadasama. Wotanut, neng nuku mol nuku dilia dapating wuda. Neng hedi de hiyeng ba mol hedi mu kang, de mihiyena ya domaha de kul hei miy te. Opi mu heminuku ba wal woaaluong na, haba neng hedi nal ba wohabang tau iy mu domaha paneng mbeimu de mol hedi mihiyena wuhe.

16 Hedosama e Yehuwa hei wosakolah wuda, e mihiyena ya omaha e kul-kul hei milak minatea. Opi de miasuong ba doa mia e hadapakang ba hei he e milak minatea. Surah Rieling dewofang ba mahe domaha Yesus haluol ”de de isi hei ayeri” te. (Markus 8:34) He arti mu nala? Heimu e birang homi mia Yehuwa heluk mu e deicura te. Yehuwa domaha mu kul penting ba e omaha ya e cita-cita mitaha.Mihalal 1 Petrus 4:2.

DOMA FUNA BA WOHEINUK MIY NA

17. Nalawuhe mani ama dokaleng de isi ya de birang miy Yehuwa her?

17 Mani ama doaiy ba de isi ya de birang miy Yehuwa her, heimu de funa de pakang de wal mipaneng iti na.  De wal domaha Yehuwa homi hado harik na, namati de wotanut nahani ba de isi ya de birang de wal miy Yehuwa her na nala he de mipaneng Yehuwa de wal hei hukum na.

18. E funa ba Yehuwa homi hado harik nala he de omong ba woheikang?

18 Kang ba e miy Yehuwa mihadasama de omong ba e wal funa Yehuwa homi hado harik na. E Yehuwa mihiyena wuhe nal karikarnuku e paneng ba nala he e wohadapakang e paneng kang. (Pengkhotbah 5:4; Kolose 1:10) Doma e wotanut ba Yehuwa hei milak minatea mu nal tihai nuku wuda na. Rasul Yohanes de bileng ba, ”Opimu hedosama kang ba miy Allah her, heimu pi he parentah wei milak; heiwuda haba he parentah weimu wal tihai na.”1 Yohanes 5:3.

19. Nalawuhe e wal funa ba e isi ya e birang miy Yehuwa her na?

19 E isi ya e birang e miy Yehuwa her mu kul wal wofang ba e ama rofi te. Nala he pi mipaneng beka de wal pi fang ba pi mipaneng na. (Mazmur 103:14) De romong ba nal rofi paneng kang. (Yesaya 41:10) Omi rofi puna ba Yehuwa worumai, ya ”lela ba e haluol de woharof”.Amsal 3:5, 6.

E ISI YA E BIRANG E AMAKANG FARING HAPOMARENG MIWOFANG

20. E isi ya e birang e miy Yehuwa her hewohaluol nala he e mipaneng te?

20 Na ngomaha ba e isi ya e birang e miy Yehuwa her? Ong e isi ya e birang miy Yehuwa heri ong omaha nal afena paneng ba hei milak minatea. Kul edi baptis te.

21, 22. Lateiur ”amakang faring hapomareng mia” e worumai wobesar?

21 Koordinator badan penatua ba e sidang mia wohokafang ba ong e isi ya e birang miy Yehuwa heri ba  omaha edi baptis. Hewohaluol de ko woatur ba penatua kabei rokari Surah Rieling hewotadasakolah ba heiyeri ba ong wosakolah diy rokari wai kabei wobesar. Ngdomaha nahani ba edi baptis kang de wo okafang ba ya kebaktian Saksi-Saksi Yehuwa hewohaluol te edi baptis. Kebaktian mia khotbah baptisan hadoa, heimu baptisan he arti dewobesar. Ama ba khotbah puna,  khotbah hedi dong wosik peya de ama ba hei baptis wei hetatangar ayoki puna ba he hatangar. Hetatangar ayoki ba eyala e wohawai heimu wotiyeng diy ba ”e isi ya e birang e amakang faring hapomareng miwofang” ya heiopi mu e worumai hei.Roma 10:10.

 22 Hewohaluol edi baptis. E isi dotafuda miy iya wal miaring. Edi baptis mu de amakang faring wohiyeng diy ba e isi ya e birang e miy Yehuwa her ba yala ong Saksi-Saksi Yehuwa.

EDI BAPTIS HE ARTI

23. Tei baptis ba ”Nema hana, wil neng hana ya simoi rieling hana puna” mu he arti nala?

23 Yesus de demurid wei wohokafang ba hei baptis mu ”Nema hana, wil neng hana ya simoi rieling hana puna”. (Mihalal Matius 28:19.) He arti mu nala? Heimu he arti Yehuwa he wewenang o homaha, Yesus he peran ba Yehuwa hedomaha mipaneng, ya lateiur Allah de simoi rieling puna ba hedomaha mipaneng.Mazmur 83:18; Matius 28:18; Galatia 5:22, 23; 2 Petrus 1:21.

Edi baptis mia, e wotiyeng diy ba omaha Allah hei milak minatea

24, 25. (a) Baptisan mu he arti nala? (b) Pasal hewosik nala he pi wai wosakolah?

24 Baptisan mu wal teimiy iya wal mi aring mani na. Edi miy iya miy aring mia, heimu hedosama ong moni namati e pak e paneng ba namana wei do iti. Ong iya wal mia naseiy, heimu ong e birang tifa puna ba Allah hedomaha milak minatea. Hei dewotiyeng diy ba yala ahapa we ong Yehuwa hei milak minatea iti. Woamunang ba e wal e isi ya e birang miy amakang her na, organisasi nuku, namati awang nuku. E isi ya e birang e puna miy Yehuwa her.

25 E isi ya e birang e miy Yehuwa her mu de paneng e hemokeni kang diy. (Mazmur 25:14) Heiopi wal wofang ba ama nuku hei baptis mu dong birang mbei na. Rasul Paulus dewofang, ”E mifik iti ya birang mu e niyena funa ya nareng fuhur.” (Filipi 2:12) Baptisan mu lela ba dara ahola. Haba lateiur e Yehuwa hopa hamina iti? Pasal hewosik buku opi hetatangar opi dewohawai.