Langhalou konten

Langhalou menu sekunder

Langhalou daftar isi

Saksi-Saksi Yehuwa

Alor Abui

Nala he Surah Rieling Dewopidasakolah?

 PASAL 3

Nala He Allah Domaha Ba Mi Amakang Mihadasama?

Nala He Allah Domaha Ba Mi Amakang Mihadasama?

1. Nala he Allah domaha ba mi amakang mihadasama?

ALLAH he domaha ba kulkang miy amakang mihadasama. De ama neng ya ama mol ahola paneni hana he Adam ya Hawa ba de pining masena nuku mihatani diy. Allah domaha dilia wil hadoa ba buku opi paneng Firdaus wuda, ya binatang karikarnuku wofikang.Kejadian 1:28; 2:8, 9, 15; hehalal Catatan Hewosik 6.

2. (a) Nalawuhe pi worumai ba Allah he domaha mu dekul mipaneng? (b) Birang mihalor hei Surah Rieling de lateiur wofang?

2 Ri wotanut birang mihalor ba Firdaus mia pi hiyeng kang rena? Yehuwa dewofang, ”Nala he ne wofani ne kul mipaneng.” (Yesaya 46:9-11; 55:11) Rofi, nala he domaha mipaneng afena de hotap beka. Yehuwa dewofang buku opi de paneni he alasan hadoa wuhe. De ”paneni ba wal hei dowuda na”. (Yesaya 45:18) Hedomaha amakang de buku opi womir. Amakang hamo teiwuda he Allah domaha de ya hei mibirang, ya helunga mu yeng? Surah Rieling dewofang, ”Ama ba rofi hapuna [ya, heluk] de buku taha mia, ya de heimia ba birang mihalor.”Mazmur 37:29; Penyingkapan 21:3, 4.

3. Amakang de harik hafiy ba mong nala he ko e mi atangar?

3 Haba yala amakang dar harik hafiy ba mong. Ya tei-tei mia bay, ama deibol ya deifaheng. Heiopi kul wal Allah he domaha na. Hare herofi mu nala he daleki, ya lateiwuda? Hewohawai hadoa ba Surah Rieling mia.

 ALLAH HETAKEL NUKU

4, 5. (a) Taman Eden mia mahe ko moni puna ba Hawa hadabesar? (b) Ama ba homi rofi lateiur te de takau?

4 Surah Rieling dewofang ba Allah hetakel nuku hadoa ”hana he Iblis namati Setan”. Setan de moni nuku puna ba taman Eden mia Hawa hadabesar. (Penyingkapan 12:9; Kejadian 3:1) Setan de besar mu hedosama kul moni hedi he besar wuda.—Hehalal Catatan Hewosik 7.

5 Hare Setan si Iblis na Allah he paneni? Walna! Leng ba Allah de Adam ya Hawa paneni, Malaikat nuku ba de mara Surga mia de midamohawai ba dei Iblis heri. (Ayub 38:4, 7) Haba delateiur midaleki? Hedosama, ama ba homi rofi haba de mi damohawai ba tatakau? Wal hamani ba de tatakau na. Haba nal ba wal heina he domaha. Dekul wotanut iti hare he tanut hasalah hedi larumai diy. Ya heleng hadoa dong takau. Hedonakala dei paneng ba tatakau.Mihalal Yakobus 1:13-15; hehalal Catatan Hewosik 8.

6. Lateiur te Malaikat nuku de Allah hetakel diy?

6 Heiopi he malaikat hedi de hadatareu diy. Hare Yehuwa de Adam ya Hawa paneni wosiki de wohokafang riwil hadoa ba ”buku opi hadomir”. (Kejadian 1:27, 28) Malaikat ba eyala dewotanut, ’Amakang weimu nedi he noluk te wal Yehuwa na!’ Ya hedi he dewotanut iti, hedomaha hedi ngklul rumai diy domaha de Yehuwa wuda. Malaikat hedi domaha ama holuk. Hare de Hawa hei ayeri ya hewali diy. (Mihalal Kejadian 3:1-5.) De heiur paneng de Setan si Iblis, ba Allah hetakel.

7. (a) Nalawuhe Adam ya Hawa de mong? (b) Nalawuhe pi fing keta diy ba mong?

7 Adam ya Hawa dewal Allah heluk na ba de bata upi nei diy. (Kejadian 2:17; 3:6) De hasalah mipaneng  ba Yehuwa mihadasama, ya hewosik de mong nahani ba Yehuwa dewofang wuda. (Kejadian 3:17-19) Adam ya Hawa hewil heratawala wei bay hasalah, hare de mong nahani. (Mihalal Roma 5:12.) Pomong ba pi hiyeng nalawuhe Adam ya Hawa hewil heratawala bay hasalah homi mia, hedosama nuku woreya. Roti heyera ba kalepang. Pi adonan mir kolmai roti hedi bay kalepang ba eyala heyera wuda. Hare Adam dewal Allah heluk na dong hasalah. Pidi Adam hewil heratawala wei bay potafuda hasalah ”kalepang” ba Adam wuda. Ya potafuda hasalah mipaneng wuhe pi fing keta diy ba mong.Roma 3:23; hehalal Catatan Hewosik 9.

8, 9. (a) Setan domaha Adam ya Hawa nala he de worumai? (b) Nalawuhe ama ba hasalah mipaneng Allah dewal hamong na?

8 Setan de Adam ya Hawa hapong puna ba Allah heluk na, heimia dong wal Allah heluk na. Setan domaha Adam ya Hawa de hei worumai ba Allah mu ayer ya woaduwo ba beka, waldomaha ba pi kang na. Herofi mu Setan dewofang ba amakang mu Allah de homong na bay kang, ya nala he kang ya nala he beka bay Adam ya Hawa donakala miahiy kang. Hare nala he Yehuwa de mipaneng? Ama ba wal heluk na de faheng ya de hanau te. Haba de heiur paneng na wotiyeng diy ba Setan mu de ayer? Walna.

9 Hare ama ba hasalah Yehuwa dewal faheni na. Haba de leng miy amakang her ba de isi woparentah. Opi de herofi wofang ba Setan mu de ayer, ya nala he kang ba miy amakang mihadasama Yehuwa de hiyeng. He faring Pasal 11 mia te pi wai wosakolah. Haba Adam ya Hawa de woheinuk miy ri lateiur wotanut? De Setan hei worumai ya wal Allah heluk na, heiopi rofi rena? Yehuwa nala he hopa de miy Adam ya Hawa heri. Birang ba  kulrofi de heri, heyera ba masena, ya awang kang ba dekul paneng bay Yehuwa de heri. Haba Setan mu nal ba kang dekul wal paneng ba mihadasama na. Hare, ri ya heimia nala he ri mipaneng?

10. Ama nunuku pi pongahiy ba nal kulkang nala he pi mipaneng te?

10 Yala opi bay potafuda ama nunuku pi pongahiy ba  woheinuk ngmiy kang, ya pi birang homi mia woheinuk ba pi miy dil dotilaka. Pingahiy ba Yehuwa mu de pipong puna ya wohiyeng diy ba Setan mu de ayeri. Namati pi Setan miahiy ba de pipong puna. (Mazmur 73:28; Mihalal Amsal 27:11.) Buku opi mia la ama kabei wala he Allah heluk. Herofi mu Allah dewal buku opi woaduwo na. Haba wal Allah namati ko ma?

MAHE RULI OPI WOADUWO?

Kerajaan dotafuda ba ruli taha mia wal Setan heina ko dewai Yesus wohalang?

11, 12. (a) Setan de Yesus wohokafang hei pi lateur wosakolah? (b) Wobileni teihe wotieng diy ba Setan de ruli opi woaduwo?

11 Yesus de hiyeng mahe kul ruli opi woaduwo. Leng nuku Setan de ”Kerajaan dotafuda ba ruli taha mia ya nal-nal kang ba homi mia miy Yesus wohiyeng diy”. Hewohaluol Setan de Yesus hada pakang, ” Heiopi dotafuda ne miy er, haba e noluk [ya, luk] ya awata e ne wohafou te.” (Matius 4:8, 9; Lukas 4:5, 6) E wotanut, ’Kerajaan opi wala Setan heina ko dewai Yesus wohalang?’ Walna. Pemerintahan dotafuda Setan hei.

12 E ko woheran: ’Lateiur Setan de ruli opi woaduwo? Haba ko ’Yehuwa ba Kuasa Midaliela dedi he nal karikarnuku paneni?’ (Penyingkapan 4:11) Rofi, haba Yesus de he falaka wofang ba Setan he ”ruli opi woaduwo”. (Yohanes 12:31; 14:30; 16:11) Rasul Paulus bay dewofang Setan si Iblis he ”ruli opi he allah”. (2 Korintus 4:3, 4) Ya Rasul Yohanes de bileni ba ”ruli dolea si jahat he uwa mia”.1 Yohanes 5:19.

RULI BA SETAN HEI LATEIUR HANAU?

13. Nalawuhe ruli tifa pohomaha?

13 Ruli opi beka he langler. Yenang, nal beka ba dalek, teiayer, ya tahupang kadiya heihe pimina mia ba pi hiyeng. Masalah dotafuda amakang dewoheikang beka, de  lateiur paneng bay hekang mu walna. Haba langkaber beka ba miler opi Allah de yenang Armagedon mi hanau, ya ruli tifa ba rofi hapuna de puna ba hemanau.Penyingkapan 16:14-16; hehalal Catatan Hewosik 10.

14. Mahe Allah de miahiy ba Kerajaan he Lei? Ayat- ayat teihe de Yesus hei wobesar?

14 Parentah ba mara surga mia Yehuwa de Yesus Kristus miahiy ba de he Lei. Eyal he tung ribi mia mihapieti, Surah Rieling dewofang ba Yesus de parentah hopuna ba ”Lei Rama amoni hei” ya he parentah dewal wosik na. (Yesaya 9:6, 7) Yesus de demurid wei wohadasakolah ba Kerajaan hei wo doa te, dewofang, ”Mahofaling ba e Kerajaan do siye. Mahofaling ba e omaha de midalek, buku taha bay, de mara surga mia wuda.” (Matius 6:10) Pasal 8 mia te, pi wosakolah lateiur Kerajaan Allah de parentah ba ruli hei hemanau. (Mihalal Daniel 2:44.) Hewohaluol Kerajaan Allah de ruli opi paneng ba firdaus masena.—Hehalal Catatan Hewosik 11.

RULI TIFA MU NGKUL MANA!

15. ”Ruli tifa” mu nala?

15 Surah Rieling dewotapakang ba, ”Adiy tifa ya buku tifa ba pi woharosa de siye,” ya ”rofi hapuna de ya heimia.” (2 Petrus 3:13; Yesaya 65:17) Minunuk Surah Rieling de ”buku”, hei wobesar mu ama ba buku taha mi birang hei he dowobesar. (Kejadian 11:1) Hare ”buku tifa” ba rofi hapuna dewotiyeng diy ba heimu amakang dotafuda ba Allah heluk ya de Allah he oweni kang hiyeng.

16. Ama ba Allah he ruli tifa mibirang he worumai kang nala he Allah de miher ya Nala he pi mipaneng te nalkang hedi pi hiyeng?

16 Yesus dewopakang ama ba Allah he ruli tifa mibirang de ”birang mihalor”. (Markus 10:30) Nala he pi mipaneng  te nal kang opi mu pi hiyeng? E Mihalal Yohanes 3:16 ya 17:3 ba he wohawai e hiyeng kang. Birang ba Firdaus buku taha mia mu hamo lateiwuda, yala mie pi hehalal nala he Surah Rieling dewofang.

17, 18. Nalawuhe pi worumai ba ya tei-tei mia kang hamol hadoa, ya pi mipomahia pong rama amoni homi mia?

17 Bekatafiela, yenang, tahupang kadiya, ya tokul tomarua dong wosik. Buku taha mia ama tahupang nuku bay wal hadoa na. (Mazmur 37:10, 11) ”Yenang ba buku taha mia” Allah de hanau. (Mazmur 46:9; Yesaya 2:4) Ama ba Allah mihiyena ya heluk he buku taha mia ba womir. Rama amoni dekul dalek mihalor.Mazmur 72:7.

18 Ama ba Yehuwa mihiyena de midomahia de rama amoni birang. Surah Rieling he masa mia ama Israel wei de Allah heluk de birang rama amoni mbeimu Allah de hofikang nahani. (Imamat 25:18, 19) Firdaus mia pong wal nal karikanuku ya amakang wofuna na. Pi ya heimia pi birang rama amoni!Mihalal Yesaya 32:18; Mikha 4:4.

19. Nalawuhe pi worumai ba Allah he ruli tifa mia siyeng de faring hadoa?

19 Heimia siyeng tukai faring. ”Heimia bata buka bay faring, ya buku daliela taha mia bay nal faring mitoka.” (Mazmur 72:16) Yehuwa, ”pi Allah de oweni kang miy pir”, ya ”buku taha mia nal karikanuku dong midalek”.Mazmur 67:6.

20. Pi lateiur hiyeng ba buku opi de firdaus wuda?

20 Ruli dolea dong Firdaus. Amakang wei he tofa ya he pining ba masena dong hadoa. (Mihalal Yesaya 65:21-24; Penyingkapan 11:18.) Ruli dolea dong masena ba Taman Eden asing mia wuda. Nala he pomaha  dotafuda Yehuwa de mipir. Surah Rieling de Allah hei wofang, ”E atang haber ba nala he ruli taha mibirang dotafuda hedomaha e mi her.”Mazmur 145:16.

21. Pi lateiur hiyeng ba amakang ya binatang dong dobirang ba rama amoni?

21 Amakang ya binatang wei dong dobirang ba rama amoni. Binatang dong wala tei take maret na. Binatang ba yala tahupang bay kano fila wei dong wal funa na haba dong la dobirang.Mihalal Yesaya 11:6-9; 65:25.

22. Ama hafiy wei nala he Yesus de mipaneng mihadasama?

22 Ama nuku bay wal harik hafiy na. Yesus de buku taha mia de amakang faring mihakang diy. (Matius 9:35; Markus 1:40-42; Yohanes 5:5-9) Haba de Lei ba Kerajaan Allah hei, amakang dotafuda Yesus de mihakang diy. Ama nuku bay dewal wofang ba, ”Opi nafiy.”Yesaya 33:24; 35:5, 6.

23. Ama mona nala he Allah de mipaneng mihadasama?

23 Ama mona dewai midabirang diy. Allah dewopakang ama jutaan ba moni wei dewai mihabirang diy. ”Ama rofi hapuna ya wal rofi hapuna na dotafuda de mihabirang diy.”Mihalal Yohanes 5:28, 29; Kisah 24:15.

24. Na omaha ba Firdaus mibirang?

24 Potafuda pi pongahiy kang. Pi miahiy ba pi Yehuwa hei wosakolah ya hei milak natea re, nala he pomaha pi mipaneng hei he pi miahiy ba mipaneng. Hare Yehuwa hei milak minatea he pimiahiy, pi worumai ba kulkang ariy falaka hei pi hiyeng kang. Ama neng nuku de Yesus he hafang dong moni mati de hei wodamudang te, Yesus de hadapakang, ”Pilia ya Firdaus mibirang.” (Lukas 23:43) Mie Yesus hei pi faring wosakolah ya de lateiur paneng ba Allah he pakang ba kulkang de midalek.