Langhalou konten

Langhalou menu sekunder

Langhalou daftar isi

Saksi-Saksi Yehuwa

Alor Abui

Maring Kang ba Allah Hei!

 PELAJARAN 8

Tahupang ya, Bekatafiela Nala Wuhete, Allah Dela Womahia?

Tahupang ya, Bekatafiela Nala Wuhete, Allah Dela Womahia?

1. Lateiur te, tahupang kadia hadoa?

Amakang he parentah Allah dela womahia, bekatafiela ba amakang dehadatareu de woheikang beka

Setang la ahola de ayeri wuhe tahupang kadia hadoa. La ahola, Setang mu malaikat ba kulrofi. Haba, ”nalhiyengrofi dewal rumai hopuna na”. (Yohanes 8:44) Allah he holuk te, haba Setang dewofang nei he noluk te. Setang de mol ahola hana he Hawa, de homi hol ba holuk, wala Allah na. Adam bay de mol hei haluoli, wal Allah heluk na. Nala he Adam demiahiy wuhe, bekatafiela ya mong tanitang he dedopi iti.Mihalal Kejadian 3:1-6, 19.

Allah he Kedaulatan ba midaliela, Setang de Hawa homi hol ba holuk na. Amakang faring de Allah he parentah dohoaiy, ama Setang hei haluoli hare yala Setang he ”ruli opi woparentah”.Mihalal Yohanes 14:30; 1 Yohanes 5:19.

2. Nala ba Allah de paneni na dokaleba?

Allah hatang pakang mu kulrofi. Amakang ya malaikat ba Allah depaneni, de kulrofi Allah holuk kang. (Ulangan 32:4, 5) Allah de pidi paneni, kang ya beka pipong ahiy. Hedi opi deleng mipir, pi kang miy Allah mihadasama.Mihalal Yakobus 1:13-15; 1 Yohanes 5:3.

3. Beketafiela ba yala midalek, nala wuhe Allah delawomahia?

Yehuwa de dar leng mi ama ba, bekatafiela mi he Kedaulatan mihadasama her. Nalawuhe? Dewohiyeng diy wal Yehuwa na, amakang he parentah dewal kang hamol mi amakang mihadasama na. (Pengkhotbah 7:29; 8:9) Tung 6.000  hewohaluol amakang hepak hepaneng, yala kul midalek.  Yenang, tahupang kadia, walrofi hapuna na ya tarik tamor heiwei amakang he parentah de hanau beka.Mihalal Yeremia 10:23; Roma 9:17.

Parentah ba Allah hei de kang miy amakang ba, homi rofi heluk her. (Yesaya 48:17, 18) Wai lang kaber, bekatafiela ba amakang de hadatareu Allah de hanau. Ama ba Allah he parentah miahiy hedi he, buku opi tau birang.—Yesaya 11:9; Mihalal Daniel 2:44.

4. Allah deihoaring heimu, hekang nala he mi pidi?

Setang de wofang amakang ba, Yehuwa hei milak minatea wal domi rofi puna na. E herofi wofang rena? E paneng kang! Allah deihoaring de leng miy pidi, amakang he parentah re Allah he parentah pipong ahiy. Nala he ping ahiy, pibirang do iy te.Mihalal Ayub 1:8-12; Amsal 27:11.

5. Nala he dewotiyeng diy ba, Allah mu Woaduwo ba midaliela?

Nala he pingahiy dewotiyeng diy ba, Allah he Kuasa midaliela

Pi Allah miahiy ba, de Woaduwo pi wai tahai, ibadat hiyeng rofi heiyeri Allah hamau buka ba, Surah Rieling homi mia. (Yohanes 4:23) Pi Yesus wuda, Setang ya he woaduwo, politik, ya yenang pohoaiy.Mihalal Yohanes 17:14.

Setang de tafuitaka puna, ama homi hol afena he, nala hatana sei. Tafuitaka piwal mipaneng na, pi mokeni wei ya pitofa homi mia ama mipo sesei. (1 Petrus 4:3, 4) Hare pipong ahiy. Ama ba, Allah mihiyena pipiy mi wohau rena? Hewong, hetanut daliela ya hekang pi heluk rena? Heihe pimipaneng, hedi dewotiyeng diy ba, pi bekatafiela hadatareu piwal Allah heluk na. Haba hedi Setang de ayeri.Mihalal 1 Korintus 6:9, 10; 15:33.

Allah homi amakang hedatoka, tahupang ya bekatafiela de hanau. Ama ba, hedi worumai birang mihalor buku taha mia de hiyeng.Mihalal Yohanes 3:16.