Langhalou konten

Langhalou menu sekunder

Langhalou daftar isi

Saksi-Saksi Yehuwa

Alor Abui

Abeti Mayak Hetatangar 10 Wohawai

 HETATANGAR 2

Ne Penampilan Mu Nalawuhe Ne Kira He Lawotanut?

Ne Penampilan Mu Nalawuhe Ne Kira He Lawotanut?

NALAWUHE HEIOPI PENTING

Nal penting faring hadoa ba pi penampilan mihapieti.

NALA HE KO E MIPANENG?

Ai wotanut: Julia de cermin hehalal mia, de hehalal mu tamada. Dewotanut, ’Ne kira he la kona.’ Herofi mu, he fi kang ya hemokeni wei dewofang he waka wal kona na.

Julia dong wotanut ba lateiur te he waka de ”kilo ayoki wai” sei. He cara kul beka. Heimu ko leng kabei mitawi dewal siyeng ma ne na . . .

E miomahia e Julia wuda, nala he ko e mipaneng?

AI WOTANUT!

E isi hei ba e wobayangkan mu ko hedosama e cermin beka mi ehalal wuda

E penampilan e wotanut mu ko la kang-kang nahani. Ama kabei he penampilan Surah Rieling de hekang wofang, hedosama, Sara, Rakhel, Yusuf, Daud, ya Abigail. Surah Rieling bay de hadou wofang ba Abisyag mu ”mol ba kul masena”.1 Raja 1:4.

Haba, abeti mayak faring de penampilan mu de kira he la wokuatir. Opi he beka bay hadoa. Ai wotanut:

  • Survei nuku dewofang, mayak persen 58 de midomahia de kona. Herofi mu, 17 persen he kul-kul kona.

  • Wai survei afena, ama mol persen 45 dewotanut de kira he kona. Haba herofi mu, de tepai nahani!

  • De mifik ba hewaka wosei wuhe, abeti mayak kabei de korban anoreksia diy. Heiopi mu kelainan pola makan ba kul berbahaya, hedosama fiyal bay de lahofaling.

 E miomahia ko anoreksia de opa, namati e kelainan pola makan afena hadoa mati, bantuan tahai. Ama dewasa ba e hei worumai e wohadabesar. Surah Rieling dewofang, ”Mokeni ba kulkang leng kopang dekang mi nidasama, ya ne beka homi mia bay de nomong.”Amsal 17:17.

CARA KANG BA PENAMPILAN WOHEIKANG

Herofi mu, ama nuku he kepribadian mu he pak he paneng ba kang re walkang na. Hodosama, Absalom, Lei Daud hewil hei ai wotanut. Surah Rieling dewofang:

”Absalom hei do iy ama afena wal masena ba hei wuda na. . . . He waka woupi.”2 Samuel 14:25.

Haba, Absalom mu kul midatokang, nal he bebeka, ya pengkhianat. Hare Surah Rieling hei haluol, Absalom mu wal neng ba kang na. Dekul wal tadakor na, ya maniyeng dewal hiyeng na. Dedi bay nal domi mi iy ya tei fafaheng.

Hare, Surah Rieling de pi wong wofang ba:

”Kepribadian tifa puna.”Kolose 3:10.

”E sui e meng mu doma e takala e hada nuku ayoki na ya perhiasan emas ya konda luar, haba mikang ti heimu sifat-sifat kang ba wal woreya na”—1 Petrus 3:3, 4.

Rofi, pomaha kabei masena mu wal hasalah na. Haba, e kepribadian he kul penting. Miti mie, de paneng ba e masena mu wal e isi ba lea namati mesena na, haba heimu sifat-sifat ba kang. Mayak nuku hana he Phylicia dewofang, ”E masena, ama langsung o halek. Haba, e kepribadian ya e sifat he ama wodamunang.”

AI E PENAMPILAN WOTANUT

Na e miomahia mani e penampilan e wal ohomaha na?

Na e pernah omaha operasi plastik namati diet beka ba e penampilan de tukai masena?

Ko kang mati, e penampilan teihe omaha amohawai? (Hewohawai e miahiy.)

  • TINGGI BADAN

  • BERAT BADAN

  • TAKALA

  • BENTUK TUBUH

  • IYENG APONG

  • WARNA KULIT

Hetatangar ayoki ahola e herofi wofang namati hetatangar miahiy e sua namati mihapieti miahiy mati, woamunang: E penampilan mu ko e wal wopuas na, haba ko, ama afena dewal tanut beka heiwuda miadasama na.1 Samuel 16:7.