Langhalou konten

Langhalou menu sekunder

Langhalou daftar isi

Saksi-Saksi Yehuwa

Alor Abui

Abeti Mayak Hetatangar 10 Wohawai

 HETATANGAR 4

Hasalah Ba Ne Mipaneni Mu Na Ne Kul Wofang Te?

Hasalah Ba Ne Mipaneni Mu Na Ne Kul Wofang Te?

NALAWUHE HEIOPI PENTING

Hasalah ba e mipaneni e miwofang ama eiy worumai kang ya e bertanggung jawab.

NALA HE KO E MIPANENG?

Ai wotanut: E mokeni wei rokari bola woalung, Tim dewal dokol na de bola huor we he tetangga he jendela kaca mihayei ba poki.

Ko e Tim, nala he ko e mipaneng?

AI WOTANUT!

E PILIHAN SUA HADOA:

  1. O takiy.

  2. Ama afena woheihasalah.

  3. He rofi e tetangga e wohokafang ya e wofang nal ba beka e wai hemanau.

Ko o maha pilihan ahola miahiy. Haba, hasalah nala he e mipaneni, e herofi wofang mu hekang hadoa.

 NALAWUHE E HASALAH E KUL; WOFANG TE

  1. Heimu tindakan ba kang.

    Surah Rieling dewofang, ”Numaha nal karikarnuku homi mia ni rofi hapuna.”Ibrani 13:18.

  2. Pi rofi hapuna ama domaha pi hasalah abeta wodafang.

    Surah Rieling dewofang, ”Ama ba de hasalah wosiyer hekang wal hadoa na, haba, de hasalah wofang ya dong wal mipaneng na tomi tetatoka de hiyeng kang.”Amsal 28:13.

  3. Kul penting mu, hedi Allah homi hado kang.

    Surah Rieling dewofang, ”Ama ba wal rofi hapuna na Yehuwa hiyeng hobeka, haba ama homi rofi de hopa hamina.”Amsal 3:32.

Karina, he tung 20, de surah tilang de habuni ba hema dewal hiyeng na. Haba, mie dei areu. Karina dewofang, ”Ko tung nuku waha, Ne ma de hiyeng ama nei tilang diy. Masalah lea daleki diy!”

He pelajaran? Karina dewofang, ”Masalah pi la hosisiyer, he akibat mu lea. Hewosik, he beka pi pidi hiyeng!”

HASALAH BA PI MIPANENG HE CARA BA PI WOSAKOLAH

Surah Rieling dewofang, ”Mani potafuda pi hasalah mipaneng.” (Yakobus 3:2, Bahasa Indonesia Masa Kini) Pi hasalah pi wofang heimu pi wotiyeng diy ba pomi damasing ya pong dewasa.

Wai afena, hasalah ba e mipaneng e wosakolah. Mayak nuku hana he Vera dewofang, ”Ne mifik ba hasalah ba ne mipaneni hei mia ne wosakolah. Ne hasalah mipaneng, he hikmah ne miy ba ne isi woheikang ya woheinuk hiyeng rofi ne miy kang.” Na e hei wuda? Hetatangar ayoki opi ai wohawai.

E ma he sepeda e pinjam diy ya wal okol na sepeda hedi beka diy. Nala he ko e mipaneng?

  • E la rama ya e worumai e ma dewal hiyeng na.

  • Nala he daleki he falaka e wobesar.

  • He falaka e wobesar haba e ama afena woheihasalah.

E wal belajar na ujian mia e wal lulus na. Nala he ko e mipaneng?

  • E wofang he soal mu susah.

  • E he rofi wofang ba e wal te belajar na.

  • E guru mihopung ba kang miahiy.

Masalah ba lunga e mipaneni, e woaamunang iti, heimu hedosama e oto bang haba e kaca spion mihalal iti.

 Yala, ai wotanut (1) e ma ya (2) e guru. E hasalah e wofang homi mu lateiwuda? E hasalah wei e la wosier homi mu lateiwuda?

Tung opi homi mia hasalah nala e mipaneng ai wotanut, ya hetatangar ayoki opi ai wohawai.

E hasalah mu nala? E herofi wofang rena?

  • Walna, ne la wosisier.

  • Ne ama afena woheihasalah.

  • Rofi, ne he rofi wofang.

E wal he rofi wofang na, omi mu lateiwuda?

  • Kang hamol—Ama wal hiyeng na!

  • Ne minomahia hasalah—Herofi mu ne rofi besar te.

Herofi mu nala he e mipaneng te?

Hasalah ba e mipaneni mu nala he e wosakolah kang?

MANI DE HASALAH DEWAL WOFANG NA?

E hasalah e wal wofang na ama he tanut ba miadasama mu lateiwuda?

E hasalah e miwofang ama he tanut ba miadasama mu nala?Lukas 16:10.