Langhalou konten

Langhalou menu sekunder

Langhalou daftar isi

Saksi-Saksi Yehuwa

Alor Abui

Abeti Mayak Hetatangar 10 Wohawai

 HETATANGAR 8

Ama Nohapuna Ba Tafui Taka Mipaneng Ne Lateiur Hadanatea?

Ama Nohapuna Ba Tafui Taka Mipaneng Ne Lateiur Hadanatea?

NALAWUHE HEIOPI PENTING

Tung kopang, ama jutaan ama hei perkosa namati ama pelecehkan seksual paneng mihadasam. Korban ahola mu abeti mayak.

NALA HE KO E MIPANENG?

Ama hei serang mia, Annette langfarot ama hasuong ba hayei. Nal hedi midalek mu abeta. Dewofang, ”Ne mifik ba natea. . . . Ne ir, haba namau wal tau tatuk na. Ne hasuong, ne sepak, ne bol, ya ne hiyeng hamini mi kafiy. Ne wal hiyeng na, de lui puna nei tapei. Tamuol no iti diy.”

Nal hedi e hadatareu, nala he e mipaneng?

AI WOTANUT!

Ong e aleling, hedosama akuni mati ong wal lol na, haba nal beka de midalek kang. ”Tareng takiy wal abeta heina,” Surah Rieling dewofang ”ya homi hoyai bay wala faring hiyeng heina wuhe leng ya nalba wal hiyeng na daleki mihadasama nahani.”Pengkhotbah 9:11.

Abeti mayak kabei, hedosama Annette wuda, ama ba dewal hiyeng na he hedi serang diy. Afena ama ba de hiyeng namati he lik he tofa homi mia wei he hei serang. Natalie dar yal te tung karnuku wil neng ba he tofa hamina mia de pelecehan paneng mihadasama. Dewofang, ”La ahola, ne kul funa ya maniyeng. Hare ne wal ama afena wohadabesar na.”

 HEDI WAL E HASALAH NA

Nal ba daleki hedi wai wodamunang, Annette de isi dewoheihasalah. ”Nala he akuni hedi daleki dar wonamunang iti,” de heiur wofang. ”Ne minomahia ne kul mifik ba hadanatea te. Haba herofi mu, de nei tapei wosiki, ne kul funa hare ne waka womoling. Nong nal nuku mipaneng beka, haba ne minomahia ne kul nal nuku mipaneng te.”

Natalie bay de isi dewoheihasalah. ”Herofi mu doma ne latanai ama worumai nate,” de heiur wofang. ”Ne fi kang dewofang petang mi aluong ne nani he buokal na. Haba, ne wal hei haluol na. Ne minomahia ne leng miy ne tetangga her ba de beka paneng minadasama. Nal ba daleki opi de paneng ne tofa homi mia wei homi wosei. Ne minomahia dotafuda ne hasalah. Hedi he tukai tihai ba mi nadasama.”

E miomahia e Annette namati Natalie wuda, woamunang ama riy perkosa, hedi mu wala riy rumaha na. Mani ama wotanut pemerkosaan mu wal dowuda na dewofang nahani neng wei he heiwuda namati mol wei he paneng ba ama beka paneng mihadasama. Haba, he alasan nala bay, pemerkosaan mu kul hasalah. Paneng pak ba biadab hedi ama paneng miadasama, hedi wal e hasalah na!

Ama heiur wofang mani ong ko mahiy, haba e wal te worumai na. Mani ama ba nal hedi hadatareu dokaleng ama afena wohadabesar na. He akibat, de isi woheihasalah ya dewal kang hamol homi mia na. Haba, e la rama ama ba beka paneng miadasama homi mikang. E kul besar te. Heimu hekang miadasama.

AMA AFENA WOHADABESAR

Surah Rieling de he falaka wofang ba Ayub de pernah kesulitan hadatareu. Homi kul hofalar, dewofang ”Ne bekatafiela homi mia ne besar!” (Ayub 10:1) E Ayub hei woreya kang. E masalah e ama ba hei worumai wohadabesar, nala he daleki e hepaniy kang ya omi bay de mikang mihamol.

Nala ba omi mia e la bineng e wal rumai na. Ama afena wohadabesar ba de omong!

Annette dong hiyeni diy. Dewofang, ”Ne ne mokeni wohadabesar. De wonokafang ba ne penetua sidang jemaat mia wohadabesar te. Ne kang wobesari. De siye ba wofang ne wal hasalah na. Nala he dewofang kul rofi.”

Natalie pelecehan ba de hadatareu de defi kang wohadabesar. ”De nomong,” dewofang. ”De paneng nomaha wohadabesar. Nomi ngwal wofalar na, nal ba daleki ne hepaniy.”

Natalie bay de berdoa wosiki homi mikang mihamol. Dewofang, ”Berdoa mu nomi mikang mihamol, apalagi nala ba ne tanut mia ne ama afena wohadabesar beka. Doa mia, dotafuda ne wobesar kang. Ne minomahia kul-kul rama amoni.”

Leng dowat tung dolal ne tanut wai kang. (Pengkhotbah 3:3) E kesehatan fisik ya emosi mu e wofikang te. Istirahat mu e kul mipaneng te. Ya tukai penting mu, Yehuwa, Allah segala penghiburan mu e kul hei worumai te.2 Korintus 1:3, 4.

 ONG KO DEWASA BA TAPATING KANG

Ama ohapuna ba tafui taka mipaneng funa na ba wofang, ”Doma heiur na!” namati, ”Doma nopupuna na!” Ama ba e hapating de nawi he hare e la rama, doma heiur paneng na. Nal hedi he dewohasik, hedi wala tapating hiyeng rofi na! Ama ba de e isi heluk ya e keputusan heluk mu e layak ba hiyeng.

KUIS

”SMP mia, abeti wei de suka ne konda mibeber ya de loring beka wofang—hedosama nukari tafui taka mipaneng mu ko kang.”—Coretta.

E wotanut, na wil hedi wei mu

  1. De la aaluong?

  2. Tomi hol?

  3. Hei lecehkan?

”Oto taha mia, wil neng kabei de loring beka wofang minadasama ya de nopupuna. Ne hatang mibol ya ne habot ya ruwo miwe. De ne halal ne liyera wuda”—Candice.

E wotanut, nala he wil hedi de paneng miy Candice mihadasama?

  1. De la aaluong?

  2. Tomi hol?

  3. Hei lecehkan?

”Heleng yeng tung, abeti nuku dekul-kul miwofang iti ba donomaha ya domaha nilia nipating, haba nokaleng. Mani de natang namet. Ne kilkil haba dewal nei womahia na. Hewohaluol, ne luk ba ne sepatu tila wokor de niak mibol.”—Bethany.

E wotanut, wil neng hedi mu

  1. De la aaluong?

  2. Tomi hol?

  3. Hei lecehkan?

Hetatangar hedi wei hewohawai ba rofi mu C.

Melecehkan mu la aaluong ya tomi hol he tara mu teimia?

Pelecehan seksual mu pihak nuku wala he hekang hiyeng. Hei de mipaneng iti, he korban dong wotap bay de mipaneng.

Pelecehan hedi mu serius. Heimu de ya kekerasan seksual wotikeli.