Pel aghị epẹ ogọ bọ raraạr phọ

Pel aghị epẹ ogọ bọ raraạr phọ

Abugbaanaạn AJihova

Select language Abua

 ORỌL GHAN ADỌL ONYỌ AKRISTẸN

Oḅophoghạn Oghaạph Oghaạph phọ Ekool dị Roḅạ Ibadị Arunhụ

Oḅophoghạn Oghaạph Oghaạph phọ Ekool dị Roḅạ Ibadị Arunhụ

Awe rogbor ghan konaghạn dom ilọ Omhạr phọ mem lọ onaghạn dị rokaạph onhụ emạ abidị. Eeni epẹ kụ iyaạr phọ siphẹ Pentikọs 33 C.E., aJihova aakolobian bọ dị aJu dị oḍighi “weye aruukuan dị oḍuạ eelhe kirokirọ siẹn aḅirini phọ kụ oru” konaghạn iiḅi iinaghạn phọ “onhụ emạ phọ” abidị, ghalamọ r’iduọn bidị omoọgh bọ ni oniin onhụ dị bidị roḅạ ghan, iduọn aHibru obobọ aGrik. (Iiḍ 2:5, 8) Rokool dị roḅạ ghan ibadị arunhụ siḍio phọ arodon, arookpomoghan dị repạm ghan ituughạ runhụ kirokirọ ketue ni emoọgh ekool oḍighi eniin phọ ekpisi phọ. Ika kụ edị abukaaphọm lọ odi odọ arookpomoghan phọ iphẹn k’oḅophoghạn ongọ ogbaanaạn torobọ oye, dị k/oḅilẹ mun ooḅula ruutu lọ moḍighi eten dị abuọ otu phọ ko/kaghạm bidị ologhi?

  • Iipuruan (Pr 15:22): Abuẹn ropogh bọ rukumuan epẹ erugh arookpomoghan phọ iphẹn phọ oopuruan kụ omiteom iikolobian dị kenighẹ oghaaphọm iiḅi iinaghạn phọ. Eḍighi maạr lọ ekool phọ abidị eghom, keḅeraạn ni rookpomoghan phọ ipẹ regbeelom bọ inhọn arunhụ phọ dị nyina kebilẹ ruutu phọ ipẹ edi bọ ekool phọ ro/ḅạ bọ onhụ phọ anyina. Toroboiperolbọ, eḍighi maạr lọ bidị ro/tue ghan kogbor omadạn ekool phọ loor iduọn ebụgh bọ, pọ keḅeraạn bidị dị nyina ke/pel ghan ruutu phọ ipẹ phọ kuolọ keḅenị ghan bidị oye lọ aḍeenaan ḍiḅeraạn. (od 93 ¶37) Obobọ bidị kolọm ookpomoghan phọ anyina ologhonaạn abidị ḍighaạgh owạ awe dị roḅạ onhụ ookpomoghan phọ abidị ḅilẹ r’oḍighi idị ariisi amarugh phọ abidị kosighẹ olọgh epẹ ekool phọ abidị. (km 7/12 5, igbe) Legheri mọ iniin ariisi, kotue ni omiịn we dị roḅạ ibadị arunhụ oniin phọ ologhi otu phọ. Iikolobian oḍighi arokool phọ iphẹn edaphạn ni r’iilhogh eelhe phọ.

  • Iḅophoghạn (Efẹ 4:16): Imaạr edaphạn iiḅakiọm dị opọ rapogh bọ rukumuan epẹ erugh phọ angọ. Nạ amoọgh ni oye dị nạ ratughemị ghan Baibul dị ra/ḅạ ghan onhụ phọ opọ nyina reḅạ ghan bọ epẹ ookpomoghan phọ anyina ḍughụm? Eeni etue ni eḍighi idị opọ nạ ratughemị bọ kaḍighi agey mem lọ nạ aḅọgh angọ onhọn oye dị raḅạ onhụ phọ odị.

  • Kookolobian (Pr 15:28; 16:1): Eḍighi maạr dị siphẹ ekool phọ anyina kụ opọ amite bọ raḅạ onhọn onhụ, kparaghạ ni aḅenị nyodị iiḅi iinaghạn phọ. Nạ katue ni aakolobian esi ogbiom ologhi we lọ nạ kaazuanaan, r’oḅilẹ odownload aBaibul r’asividio akirokirọ arunhụ olọgh afon anạ kụ egbi oteẹny. Nạ katue kẹn ni asighẹ aḍighinom JW Language app otuughaạm aḍimạgh iniin arunhụ.