Pel aghị epẹ ogọ bọ raraạr phọ

Pel aghi epẹ edeọm mo etum bọ pạ

Pel aghị epẹ ogọ bọ raraạr phọ

Abugbaanaạn AJihova

Abua

Ḅula esi aJihova

 EKPỊGH PH’INYA

Olhoghoma apum​—“Ugbuurogh Imị Aḅaalamị Esi Ikarạph Phọ Amị”

Olhoghoma apum​—“Ugbuurogh Imị Aḅaalamị Esi Ikarạph Phọ Amị”

“Omoom oḍighi phọ amị aḍighi ni idị adọl eghunotu phọ ayoor ephoor eboghoghọ, kuolọ iḅilẹ ni irorori imị elhọgh esi oomo odọ iḍighinom araraạr dị i/nighẹ. Mị amiigh olheeghi arayaạl, r’ophinom aani abin righiil imirighan itooghị, ḅilẹ ghalamọ r’asiosị bịn mị ughị ni. Mị urọl dọl onyọ ogbaanaạn aJihova dị maaphoọm esi 40 asiạ. Iduọn amem mọ rekị bọ rebụgh bọ, iduọn kụ idị mị aghiọm ghan ghisigh bịn aatughiạn ghan iboom mọ aJihova ka/tue mun ni bịn asạr uwilenaạn imị. Mị ulhoghoma mudị mị ka/tue asạr abilenaạn loor phọ amị. Kụ erị iduọn rokaạph bọ, mị malhegheri ni igey phọ kụ mị agbi bọ onyeenhe oghị osuma okarạph okol phọ.”—Martha.

OLHOGHOMA apum katue ni aḍighi dool dị ketue ni eegbị oye. Uw-emạ phọ Devid agẹ mọ: “Asipiomạn phọ amị kụ irọl ghan anyụ emụ phọ amị idiphọ adool dị eemọr, dị mị ka/tue atool.” (Psalm 38:4) Abuniin aKristẹn moḍigh dọl dị eboom e/ḅaạl olhoghi kụ meminoghọm, idị eḍighi bọ bidị momeeraam okuphom owol mọ aJihova ka/tue mun asạr abilenaạn bidị bịn emineen. (2 Korịnt 2:7) Okureri phọ opọ phọ atu ni inẹ ḍughụm? Ghalamọ nạ maḍighi yogh ni igbagarạ odokirokirọ ikarạph, bịn nạ makelhạn iboom aJihova dị odị ka/tue mun ni asạr awilenaạn nyinạ bịn emineen ḍughụm? Eeye, nạ o/kelạn!

“Uguạ oolemi Raraạr Igbo Ayira”

AJihova ra/gunhọm ghan buḍighinom ikarạph dị mokiton. Okạr rokaạph, odị agbutọn ni ḍighaạgh angọ mọ bidị okpạph! Siphẹ aḍidogh oọny uruur phọ, aJizọs asighẹ aJihova atomaạn odẹ dị amoọgh ephomoghiạn dị oọny odị awilẹ eghunotu phọ odị aḍuạ kụ aghị aḍigh dọl ipughọl r’ipesi. Amem emạn mem, oọny phọ asopha ni oḅula olhoghi-otu. “Kụ [oọny phọ] odi ni k’egher, kụ odẹ phọ odị amiịn nyodị, kụ amoọgh igbiririph esi odị, kụ aghiil aghị aghurughi nyodị kụ akpụn okpo odị.” (Luk 15:11-20) Nạ rawạ ni oḍuraan otuman aJihova kuolọ na aloghoma mọ nạ “odi ni k’egher” esi odị ḍughụm? Idiphọ odẹ phọ siẹn aḍidogh phọ aJizọs, aJihova amoọgh ni ghusạn r’igbiririph atu esi anạ. Odị amoọgh ni eephuạ oḅilẹ osighẹ anạ.

Kuolọ kokaạph ika eḍighi yaạr lọ nạ ameeraam mọ asikoọl ikarạph phọ anạ egbagarạ ni iboom obobọ eḍiza epughạn dị aJihova kasạr abilenaạn? Ka/lẹ miịn ḍimạgh phọ aJihova ogẹ bọ siphẹ Isaiah 1:18: “‘Itu, nyiidiphọ,’ obọ yira oolemi raraạr igbo ayira. ‘Ghalamọ ikarạph phọ anyina irọl idiphọ oodor, kogbuurogh ni oḅaalamị idiphọ ibikpo.’” Ii, ghalomọ asikoọl ikarạph kirokirọ dị eghịgh mudị ko/tue ogbuurogh idiphọ ototọgh agbạ dị ogbul ophalabạạl asuomạ bininịn i/pel dị aJihova ka/tue asạr abilenaạn.

AJihova ra/wạ mọ tolhọm dọl iminimiịn ooruẹn olhoghi dị kagurọgh ghan nyinạ. Ika, nuụn, kụ edị nạ katue bọ aloghoma oseere ekpom mọ opọ ratọl ghan bọ mem dị Enaạn esạr ewilenaạn oye phọ ḅilẹ r’ooruẹn olhoghi dị aḅaạl? Ooḅeghiọn iyạl aradạ dị Uw-emạ phọ aDevid agbariọn. Eḅẹl phọ, odị aḅẹm mọ: “Mị kakaạph ni amiteom sipiomạn phọ amị aḅenị aJihova.” (Psalm 32:5) Legheri mọ, aJihova maphụr ri amạgh nyinạ mọ ḅaanaạn nyinọ esi iiḅereghị ḅilẹ “r’oolemi araraạr r’odị.” Naghanạn ni ḍimạgh phọ aḍiphẹ phọ. Gbạ amiteom ikarạph phọ anạ aḅenị aJihova, kụ aghaạph ipẹ etir bọ nyinạ aḅenị nyodị. Esi idị emitenaan nyodị r’aloor, aDevid arue ni aaḅereghị r’akpọ-oḅio mọ: “Ugbuurogh imị aḅaalamị esi ikarạph phọ amị. . . . Ekpom dị meḅomoghian eḅilẹ eegbiạn, sey Enaạn, nạ ka/kel.”—Psalm 51:2, 17.

Edị emuneniom iyạl, aDevid aạr ri olhoghonaạn aḍighaạgh esi oye dị ameera enye Enaạn, oyil phọ Netạn. (2 Samuel 12:13) Ḍio phọ arodon, aJihova mamiteom  ikumor awe siphẹ ookpoghan phọ dị motughemị olhoghonaạn aḍighaạgh buḍighinom ikarạph dị mokiton oḅulemi asiya arighirị phọ abidị r’aJihova. Mem dị nạ ateẹny ikumor awe phọ, bidị kosighẹ Igẹ-iigbia phọ oḍighinom kụ ongọ iiḅereghị dị eḅuạ k’epẹ ekpom mọ kụ emite dị kepoomị ekpom anạ, edughe obobọ esighẹ okarạph olhoghoma phọ anạ, kụ elhoghonaạn nyinạ ḍighaạgh oḍum eten aruwaloor.—Jems 5:14-16.

AJihova rawạ ni mọ loghoma oseere ekpom mọ opọ ratọl ghan bọ esi omoọgh ooruẹn olhoghi dị aḅaạl

“Oḅaạl Olhoghi Kụ Odianaan Oye Dị Osạr Sipiomạn Odị Owilenaạn”

Olegheri ni mọ, nạ katue ni aloghoma mọ ogbạ ikarạph phọ anạ omiteom esi oḅenị aJihova Enaạn phọ ḅilẹ r’oghị oteẹny ikumor awe phọ ketue ni eḍighi eniin esi igbo araraạr phọ ipẹ kekạr bọ ekparanaạn nyinạ iboom oḍighi. Eḍeenaan edi ni mọ aDevid alhoghoma aani ni eniin phọ eten phọ. Odị “aḅoronom ni” ekulha amem ilọ ikarạph phọ odị. (Psalm 32:3) Ipẹ reten, torobọ ipẹ erọl bọ, odị amiịn ni suọ dị odi esi oghaạph ikarạph phọ odị omiteom ḅilẹ r’oolemi okol aghuḍum mọ odị.

Ogbogh asuọ dị arọl bọ pọ iḍighi idị aDevid aḅilẹ amoọgh ibo phọ odị. Odị agẹ mọ: ‘Oḅaạl olhoghi kụ odianaan oye phọ opọ osạr bọ sipiomạn phọ odị owilenaạn, opọ mosạr bọ ikarạph phọ odị owilenaạn.’ (Psalm 32:1) Odị aḅilẹ ni aaḅereghị mọ: “Sey Jihova, tanyạn iidoronhụ phọ amị, pidị onhụ phọ amị aboomiom nyinạ.” (Psalm 51:15) Iduọn ooruẹn ologhi phọ odị u/gurọgh mun bọ nyodị ḅilẹ r’iduọn odị rasereghiạn bọ osạr owilenaạn phọ Enaạn, inyu ni nyodị aDevid phọ oḅenị abunhọn awe ilọ aJihova.

AJihova rawạ ni mọ loghoma oseere ekpom mọ opọ ratọl ghan bọ esi omoọgh ooruẹn olhoghi dị aḅaạl. Ḅilẹ odị rawạ ni mọ ḅenị bunhọn awe ilọ odị r’arigbiom mọ odị, dị nạ ka/sighẹ olhoghi olhoghoma apum kụ akaaphọm, kuolọ r’ogey olhoghi ḅilẹ r’igey ibo. (Psalm 65:1-4) Tuutughiạn ḍimạgh phọ odị ilọ ‘Ogbuurogh ikarạph phọ anyina, pidị amem oosạ yogh aruwaloor eḍuạ ḍighaạgh aJihova r’aloor etu iteẹny inyina.’—Iiḍighi 3:19.

Iphẹn phọ kụ imitenaan bọ Martha. Odị aghaạph mọ: “Oọny amị o/wilẹ ghan osighẹ ghan a Watchtower phọ r’Awake! phọ oruom ghan amị. Enụm enụm, bịn mị aḅilẹ amiigh olhegheri aJihova. Agạ dị akạr akpạr apeleghiom ilọ oḅilẹ oḅula phọ pọ olhọm osạr owilenaạn ilọ oomo ikarạph phọ mị m’aḍighi yogh bọ. Kuolọ ekureriom mọ, mị uḅaanaạn ni Enaạn esi iiḅereghị kụ mị alhọm nyodị osạr owilenaạn amị. Ekpạr ri omeeraam mọ mị aḅuạ bọ 40 asiạ kụ iten kụ mị agbi bọ obilẹ oḅula esi aJihova. Iphẹn imitenaan bọ imị emiteom ni eḍeenaan mọ ghalamọ ibadị asiạ kụ iten ni, bịn oye katue ni aḅilẹ amoọgh enhọn eepoogh okumu Enaạn ḅilẹ r’oḅilẹ oḅula isiphẹ ephomoghiạn phọ odị.”