Pel aghị epẹ ogọ bọ raraạr phọ

Pel aghị epẹ ogọ bọ raraạr phọ

Abugbaanaạn AJihova

Select language Abua

 EKPỊGH PH’ONIIN

“Mị Kawạ ni Nyopọ Maphe Bọ”

“Mị Kawạ ni Nyopọ Maphe Bọ”

Iyool phọ i/legheri mun ilọ oḍighi. Eeni, iduọn odị rakạm bọ tugbiịr arooghọ phọ odi bọ siphẹ bidị reḅạl bọ, bịn agbatanaạn siphẹ adịta iyool phọ. Nyiidiphọ, dị o/miịn mun ḍita ipherị phọ iyool phọ obobọ okoriom mọ. Kụ aḍughul rekul. Iduọn dị maphe bọ epẹ eḍiiny phọ inhọn inhạm dị ketue ni ebạ nyodị retelhe yogh bọ, bịn oghoph o/lhoonaan mụn iyool phọ. Ekureriom mọ, bịn odị anaghạn eḍọgh dị odị alhegheri ni—eḍọgh okoriom mọ, opọ aghiil bọ aghị epẹ iyool ogạ phọ edi bọ, aḅeton, aphurughi siphẹ olhoghi asuomạ phọ odị, kụ aphạm anyeeniom ologhi otu.

AJIHOVA atoomaạm loor odị ibadị amem mọ onọ atuụgh idiphọ okoriom mọ opọ phọ bịn kụ atu. Siphẹ Ekpo-onhụ phọ odị, odị ungọ ni iyira okuphom owol mọ: “Mị raloor amị kawạ ni iyool phọ amị, kụ mị kamaạr ri apogh bidị.”—Ezekiel 34:11, 12.

“Iyool Phọ Ipẹ Mị Rapogh Ghan Bọ”

Abuọ anhiạn kụ iyool phọ aJihova? Oghaạph eten dị edugh, iyool phọ aJihova pọ awe phọ abuphẹ ophomoghiạn bọ nyodị oḅilẹ ghan bọ rooseeny nyodị. ABaibul phọ aḅẹm mọ: ‘Uguạ ooseeny oḅilẹ ozuman ongọ; uguạ okpuḍian ghisigh aJihova Olemiạ phọ ayira. Idị eḍighi bọ odị kụ Enaạn phọ ayira kụ yira kụ awe phọ odị rangọ ghan bọ iḅạl phọ, iyool phọ odị rapogh ghan bọ.’ (Psalm 95:6, 7) Idiphọ okaraghị iyool igạ dị redạph okoriom iyool, abuusenyom mọ aJihova omoọgh ikpukpụ odạph Okoriom mọ abidị. Bidị phọ oḍighi ni we dị ro/piomạn ghan ḍughụm? Eeye. Eeni amem, arebenẹ Enaạn, roḍighi ghan ni ‘iyool dị mewalhalhạ,’ “iyool dị ephe,” ḅilẹ r’idiphọ “iyool dị repe eten.” (Ezekiel 34:12; Matiu 15:24; 1 Pita 2:25) Ghalamọ r’iduọn phọ ni, mem dị oye aḍuraan raḍuạ, aJihova raḍuom ghan ni olhoghi oomo amem mọ odị kaḅilẹ ni aḅula.

 Nạ aloghoma niin niin mọ aJihova kụ Okoriom mọ anạ phọ ni? Ika kụ idị aJihova aḍeenaan mọ onọ Okoriom iyool rodon? Ooḅeghiọn iraạr areten:

Odị rungọ ghan iyira eḍien eten aruwaloor. “Imạ esi atuḍiil arooghọ kụ edị mị kasighẹ bidị akị iḅạl,” Iduọn kụ idị aJihova aḅẹm. “Bidị keminạ ni siphẹ ade phọ arooghọ oraạl phọ amuza bọ, kụ abidị eeselhạ ghan rooghọ kụ etaạl.” (Ezekiel 34:14) AJihova ko/piọm ghan r’amem ongọ ayira odokirokirọ ediẹn aruwaloor dị kiimanamị iyira dị etuụgh mem mọ kụ eru. Nạ katue ni aatuughiạn emụ-oghaạph dị nạ aạl siphẹ arinyạ phọ ayira, oghaạph dị ongọ, obobọ avidio dị aphagharanaạn iịbereghị anạ ilọ olhoghonaạn aḍighaạgh? Ipẹ phọ i/ḍighi idị nạ ameeraam mọ aJihova raphogh ghan ni nyinạ r’aloor ḍughụm?

Odị rakoph ghan ni kaḅilẹ ulhoghonaạn iyira ḍighaạgh. AJihova aguanaan mọ: “Opọ rape bọ eten phọ mị kasighẹ ni aḅulemi, opọ aḍighima bọ iyaạr phọ mị kakoroghị ni esi phọ ḅilẹ r’opọ adugh bọ mị kangọ ni inyaạm.” (Ezekiel 34:16) AJihova rangọ ghan ni inyaạm buphẹ ooḅaghamiạn aloor kụ madughe bọ obobọ maminoghọm bọ. Odị rakoroghị ghan ni esi dị iyool phọ odị eḍighima iyaạr, kalhoghonaạn bidị ḍighaạgh oḍum eḍighi yaạr lọ bidị meḍighima iyaạr—eeni ghalamọ onyọ abuẹn r’abidị oḅọph bọ omeeraam mọ kụ aḍighi bidị. Ḅilẹ odị rasighẹ ghan ni kaḅulemi buphẹ mophe bọ eten phọ kụ eeni odi bọ dọl dị olhoghi phọ ragurọgh.

Odị raloghoma ghan mọ onọ kụ Arool dool ophogh ayira. “Mị katanyạn ni bidị esi oomo arikpisi phọ bidị owalhalhạ bọ oghị,” iduọn kụ idị aJihova aḅẹm. “Mị kawạ ni nyopọ maphe bọ.” (Ezekiel 34:12, 16) Esi aJihova, iyool dị mephe pọ i/ḍighi iyool dị ke/tue mun eḅula. Odị ralegheri ghan ni mem dị iyool phọ ephe, odị rawạ ghan ni iyool phọ ipẹ phọ, kụ odị rabo ghan ni ibo mem dị odị awạ amiịn. (Matiu 18:12-14) Erị okạr rokaạph, odị ramạgh ghan bugey abuusenyom mọ odị mọ “iyool amị, iyool phọ ipẹ mị rapogh ghan bọ.” (Ezekiel 34:31) Nạ oniin iyool phọ ipẹ phọ.

Esi aJihova, iyool dị mephe pọ i/ḍighi iyool dị ke/tue mun eḅula. Odị rabo ghan ni ibo mem dị odị amiịn iyool phọ ipẹ phọ

“Saasạ Siḍio phọ Ayoor Idiphọ Amem Igbaany Phọ”

Eeghe kụ iḍighi kụ aJihova rawạ bọ nyinạ kụ aḅilẹ bọ ramạgh nyinạ mọ ḅula esi odị? Loor esi dị odị rawạ mọ moọgh oḅaạl olhoghi. Odị aguanaan nị mọ “aḍisẹph kirokirọ kụ kelophọm idiphọ olophiạ” iyool phọ odị. (Ezekiel 34:26) Opọ phọ kee/pua oguanaan. Nạ mamiịn ni eḍeenaan iphẹn phọ raloor anạ.

Tuutughiạn aḅula omạn raraạr dị emiteghunaan nyinạ mem mọ nạ aru bọ alhegheri aJihova. Esi omaạm, nạ ulhoghoma ika eḅẹl amem mọ nạ aru bọ alhegheri iikiạ igey kirokirọ ilọ aḍien phọ Enaạn r’ogbi phọ odị ilọ omạr awe? Nạ aatughiạn ni oomanami phọ arọl ghan bọ mem mọ nạ aaḅughonaan ghan bọ r’abuerị phọ aKristẹn phọ mem asisẹm-bli r’amem ookpomoghan eephugh? Mem mọ nạ arue ghan bọ aghaạph oghaạph iiḅi iinaghạn phọ aḅenị onhọn oye dị aḍeenaan ḍigey phọ aḍiḅeeraạn, nạ o/ḅula ghan olhoghi otu r’oḅaạl ologhi ḅilẹ r’ogbaanyạn k’epẹ ekpom mọ anạ?

Nạ katue ni aḅilẹ amoọgh ibo phọ ipẹ phọ. “Usighẹ iyoor aḅulemi esi anạ, sey Jihova, bịn kidughanaan ni iyoor oḅula esi anạ. Saasạ siḍio phọ ayoor idiphọ amem igbaany phọ.” Iduọn kụ idị arebenẹ Enaạn iḍiodi ooḅereghi. (Lamentations 5:21) AJihova aphagharanaạn ni iiḅereghị phọ ipẹ phọ, kụ awe phọ odị uḅilẹ ni oḅula okumu nyodị r’ibọ dị moḅilẹ oosạ. (Nehemiah 8:17) AJihova kaḍighinaan ni nyinạ igina phọ.

Ghalamọ r’iduọn phọ, oḅula esi aJihova phọ edugh oḅẹm epu oḍighi omiteom. Ḅeeḅeghiọn iniin ipaanaạn dị edị ghan oḅilẹ oḅula r’ipẹ nạ kaḍighi bọ kụ akpạr apu.