Pel aghị epẹ ogọ bọ raraạr phọ

Pel aghi epẹ edeọm mo etum bọ pạ

Pel aghị epẹ ogọ bọ raraạr phọ

Abugbaanaạn AJihova

Abua

Ḅula esi aJihova

 EKPỊGH PH’IRAẠR

Eephina Iyaạr Dị Oye Aḍighi Nyinạ​—Mem Lọ Yira Omoọgh “Iyaạr Oghaạph Lọ Uḍighi Iyira Kụ Iyira I/ḅeeraạn”

Eephina Iyaạr Dị Oye Aḍighi Nyinạ​—Mem Lọ Yira Omoọgh “Iyaạr Oghaạph Lọ Uḍighi Iyira Kụ Iyira I/ḅeeraạn”

“Onyọ umarani olọ ookpomoghan amị ugbaanaạn ni imị mọ mị ami ikpoki odị. Abunhọn awe isiphẹ ookpomoghan phọ oru onhaghạn kụ oḍighan nyodị. Keekuna phọ, onyọ umarani phọ uḅenị imị mọ onọ mamoọgh inhon iinaghạn dị emạ emiteom mọ mị ku/mi bọ ikpoki phọ. Obọ odị uuḅereghiạn ni imị, mị ulhoghoma siẹn ekpom mọ amị mọ mị ka/tue asạr abilenaạn nyodị loor esi eephina phọ epẹ mị amiinhọm bọ.”—Linda.

IPHẸN emitenaan bọ Linda memitenaan aani ghan ni nyinạ, opọ alhoghoma bọ eboom eephina loor eḍighinom iyaạr dị oye dị r’odị oḅọph omeeraam aḍighi nyodị? Eḍighi ni yaạr okururu, mọ abuniin momeera mọ eḍighinom iyaạr abunhọn eeḅaghamị bidị iboom esi esi dị ketir rukumuan aKristẹn phọ abidị. Idọ phọ iphẹn phọ kụ imitenaan nyinạ ḍughụm?

Oye Katue ni “Ugbariọn Iyira Siphẹ Ephomoghiạn Phọ Enaạn Iphomoghiạn Bọ Iyira”?

Agey ni, kekpạr ri agey osạr owilenaạn onyọ oḅaramạ omeeraam ayira dị uḍighi iyira yaạr dị ephin esi ayira. Erị obọ, ewạ esi aKristẹn dị oniin kapomoghiạn nyoorị phọ. (Jọn 13:34, 35) Eḍighi iyaạr dị onyọ oḅaramạ omeeraam mọ ayira kụ upiomạn iyira, amabi phọ r’eephina phọ retọl ghan bọ rebụgh ghan ni iboom.—Psalm 55:12.

Okạr agey, aBaibul phọ akaạph ni amiteom mọ amem retọl ghan ni dị oniin onyọ aKristẹn raḍighi ghan nyoorị phọ iyaạr dị kamoọgh ‘iyaạr oghaạph dị oḍighi nyodị kụ nyodị i/ḅeeraạn.’ (Kolosị 3:13) Ghalamọ iduọn phọ ni, mem di ipẹ phọ imitenaan iyira r’aloor, yira komiịn ni mọ eḍighi iyaạr ipaanaạn kụ ingọ iyira. Iyaạr edi ni dị ketue ilhoghonaạn iyira ḍighaạgh ḍughụm? Ooḅeghiọn iraạr asinị-iilhogh aBaibul:

Odẹ k’akẹ phọ ayira alegheri ni oomo ipẹ remite bọ. AJihova rapogh ghan ni kamiịn oomo ipẹ remite bọ, epumọn ni torobọ ekeeny ooruẹn dị yira osoman ḅilẹ r’iminimiịn phọ rekọm ghan bọ. (Hibru 4:13) Opumom isiẹn phọ, aJihova runmaanaạn ghan ni iyira ighirigiir mem lọ yira romiinọm. (Isaiah 63:9) Odị ra/meera ghan “iminimiịn obobọ iiḅaghamị” obobọ enhọn odọ iyaạr—ghalamọ kẹn onhọn ebenẹ odị—“igbatạn iyira esighẹ siphẹ ephomoghiạn phọ Enaạn iphomoghiạn bọ iyira.” (Rom 8:35, 38, 39) Pọ yira phọ kẹn ku/meera aani iyaạr obobọ oye igbatạn iyira esighẹ esi aJihova?

Osạr owilenaạn re/mạ ghan ophogh ogunhọm. Mem lọ yira osạr owilenaạn buphẹ upiomạn bọ iyira, pọ yira phọ ro/kome ghan, ro/ngọ ghan akeel, ro/pogh ghan bịn kosighẹ riḍien obobọ ro/ḅẹm ghan mọ yira opogh ni bịn ogunhọm iḍighinom araraạr phọ abidị. Legheri mọ, aJihova o/meeraam ikarạph, kuolọ odị rasạr ghan ni kawilenaạn eḍighi yaạr lọ ephigh otuạn osạr owilenaạn phọ kụ edi ni. (Psalm 103:12, 13; Habakkuk 1:13) Mem lọ odị uḅenị iyira mọ osạr ghan owilenaạn bunhọn awe, pọ aJihova rulhọm ghan iyira mọ otuughaạny nyodị. Odị “ra/tolhọm ghan r’eghiḍim mem dị oye apiomạn nyodị bịn k’agee-pọ.”—Psalm 103:9; Matiu 6:14.

Mem lọ yira okporiọn raghaạgh owunughi ikalạ, yira komoọgh ni suọ. Eghẹn odọ eten? Ḍighi mudị nạ ramiịn ni iyaạr phọ ephẹn kokaạph bọ siẹn dị remite. Oḅẹm mọ nạ asighẹ egbogh ekpo okute, dị i/kạr iimọr iboom, kụ nạ aselhe ḍighaạgh anạ ophạm ekpo phọ epẹ phọ. Eeni ke/kạr ekạgh ḍighaạgh eḍighi yaạr lọ nạ aphạm ekpo okute phọ oọny ekulha amem. Kuolọ kokaạph ika eḍighi yaạr lọ nạ aphạm ekpo phọ epẹ phọ kụ ebia iboom? Nạ kapạm idị  kedoọny eleeny ika—kemạn esi iyạl ikpo ikalạ? Oniin awạ ḍughụm? Obobọ idị edoọny epu pạ ḍughụm? Iikia i/lo kekạgh ni ḍighaạgh phọ anạ egey phọ edị! Okạr agey, okạr eemor ekpo phọ ke/nmia oo. Kuolọ iduọn nạ aphạm bọ kụ rebia bọ keghị, iduọn kụ idị eemọr phọ kebụgh ghan bịn ekiọm. Iduọn kụ idị owunughi ikalạ arọl aani. Yira olhọgh ghan olhoghi ayira ikarạph lọ oye uḍighi iyira kụ ebia rekiọm ghisigh—ghalamọ r’eẹny iyaạr dị uḍighi iyira—pọ iduọn kụ idị yira okọm ghan iiḅaghamị rongọ loor phọ ayira koghiọm ghisigh. Iikia i/lo, pọ epẹ kụ iyaạr phọ eḍighi bọ kụ aJihova ruḅenị ghan bọ iyira mọ okporiọn raghaạgh owunughi ikalạ. Okạr agey, yira okporiọn raghaạgh owunughi ikalạ phọ pọ ilọ imạ ayira ni.—Proverbs 11:17.

Mem lọ yira okporiọn raghaạgh owunughi ikalạ, yira komoọgh ni suọ

“Mị Ulhoghoma Mudị AJihova Raloor Odị Kụ Ruḅanaạn Ghan Imị”

Eeghe kụ ilhoghonaạn bọ ḍighaạgh Linda dị odị ka/bunughi ikalạ akị esi eten phọ epẹ onyọ oḅaramạ omeeraạm mọ odị aḍighi bọ raraạr aghị esi odị? Igbo inhọn araraạr odị agbirima ni riphigh Igẹ-iigbia phọ ilọ otuạn osạr owilenaạn ikarạph lọ oye uḍighi iyira. (Psalm 130:3, 4) Inyu ni Linda agey esi olhegheri mọ mem lọ yira osạr owilenaạn onhọn oye, aJihova ḍierị phọ aḍighaạgh phọ, kasạr ri uwilenaạn aani iyira. (Efesọs 4:32–5:2) Idị egbolomaam ipẹ iitughiạn phọ ipẹ phọ etir bọ nyodị, odị aḅẹm mọ: “Mị ulhoghoma mudị aJihova r’aloor odị kụ ruḅaanaạn ghan imị.”

Amem, emạn mem, aLinda arue ni awilẹ owunughi ikalạ. Odị asạr ri awilenaạn onyọ umarani phọ oopho, kụ nyiidiphọ phọ onyọ umarani phọ opọ phọ kụ emụ oyaghirị odị. ALinda akumu ni aJihova rakiọm ghisigh. Meeraam akuphom owol mọ aJihova rawạ ni olhoghonaạn anạ ḍighaạgh oḍighi aani iniin phọ.