Pel aghị epẹ ogọ bọ raraạr phọ

Abugbaanaạn AJihova

Select language Abua

OLHOGHONAẠN AḌIGHAẠGH OLỌ ARUGHUNOTU

Idị Nạ Katue Aloghonaạn Ḍighaạgh Oọny Anạ Opasị ghan Agey

Idị Nạ Katue Aloghonaạn Ḍighaạgh Oọny Anạ Opasị ghan Agey

Obumoọny anạ raa/ḅaghamiạn ghan loor ilọ oghaạph askul ḅilẹ ongọ asaimẹnt otu askul o/ḍighi, ghalamọ r’aạl aḍinyạ bịn i/ḅọph. Eeghe kụ keḍuạ emite? Ogẹ ezạm o/pasị agey, araagharạ phọ bịn i/ḅọph. Ika kụ idị nạ katue aloghonaạn ḍighaạph obumoọny phọ anạ okuamị opasị aani?

 Iyaạr dị ewạ mọ legheri

Ikpaarioghọm rebughẹ ghan ghụn iiḅaghamị phọ. Mem dị nạ akpaariọm iboom obumoọny anạ, kekọm ghụn ooḅaghamiạn aloor epẹ otu askul phọ r’isiphẹ ologhotu phọ! Esi iduọn phọ, odị katue ni bịn amiigh ogbaaghị okpẹ, aaghị ariisi dị odị u/ḍighi agey, apogh iniin iniin ageeghị siphẹ aripọt kạd phọ odị, obobọ kẹn ni abilẹ askul. Bịn kparipẹ roḍighi idị oọny phọ kaḍighi agey, kalegheri ghụn bịn aloghorị.

Eegharạ ongọ ghan inmo obumoọny anạ mem dị apasị agey ketue ni ekọm ghụn inhọn. Oniin odẹ dị oghol mọ Andrew aḅẹm mọ “oḍighi idị onyanị ayoor kaḍighi agey, yoor unmo ghan ni nyodị inmo torobọ amem dị apasị agey, kuolọ ipẹ phọ iḅilẹ ghụn bịn eḍighi idị odị ogbon ghan iyaạr phọ yoor kongọ bọ nyodị. Mem dị u/pasị agey, odị o/kururu ghan loor esi dị odị o/pasị agey kuolọ akururu ghan loor esi dị iyaạr nyodị yoor k/ongọ.”

I/nighẹ okpalạm ghan otughemiạ phọ. Obumoọny phọ anạ atue ni akureri mọ i/wạ iboom inyaạm opasị agey. Odị atue kẹn ni amiigh owạ awe okpalạm loor esi iduọn odị ra/ḍighi bọ agey, bịn amiigh owạ ghan awe dị kogeanaạn ghan nyodị. Esi iduọn phọ, odị kapiọm ni otuughạ iyaạr dị mitue ni eloghonaạn nyodị ḍighaạgh ghisigh​—bịn ekọm iiḅaghamị engọ nyodị.

 Idị nạ kaḍighi

Pamaghạn ekpom anạ. Eḍighi maạr dị repin olhoghi anạ iboom, pọ ka/kaạph iyaạr mem mọ amuphẹ phọ. “Imạ reḍuạ ghan ni kemite mem dị yoor oḅoorian kụ oḍeenaan olhoghoma oghị esi obumoọny phọ ayoor,” ipẹ kụ idị odẹ dị oghol bọ Brett aghaạph.

Aḍinị olhogh dị odi siphẹ aBaibul phọ: “ilegheri mọ torobọ oye anuụn ghan ni anaghanạn, aaḅeghiọn ghan ikpo oghaạph kụ aghaạph, iyaạr ologhi odị ki/nuụn ghan ikạgh.”​—Jems 1:​19.

Waaghị amiịn okạr iiḅaghamị phọ. Iniin araraạr dị rekạr ghan bọ kekọm idị obumoọny ra/ḍighi ghan agey pọ iikpoḍị, onmeeghi askul, ooḅaghamiạn aloor mem dị rowạ ogẹ ezạm, iiḅaghamị ologhotu, e”naanị aḍighul, e”moọgh edeọm ituughạ, obobọ e”lher arurụ. Ka/sighẹ mọ obumoọny phọ anạ aḍighi uwo egbogholeẹr.

Aḍinị olhogh dị odi siphẹ aBaibul phọ: “Oye dị aḍeenaan orọph omiịn aghị esi iyaạr kamoọgh ni ekol.”​—Proverbs 16:20.

Ḍighi idị otu phọ anạ kaḍighi esi dị emaạr ephọ orọl aạl aḍinyạ. Miteomnaan obumoọny phọ anạ edeọm oḍighi ghan oḍighi dị ongọ nyodị otu askul r’aạl ghan aḍinyạ. Kookolobianaan kẹn esi dị emaạr ephọ dị katọl ghan aḍighi hom wọk (dị aTv r’asifon kee/ḅaghamị). Iḍighi ghan sihom wọk phọ enụm enụm obọ obumoọny phọ anạ alher rurụ. Oniin odẹ epẹ Germany dị oghol mọ Hector, aḅẹm mọ, “Eḍighi maạr dị reteẹny mem dị k’ogẹ tẹst, yoor rooḅula ghan torobọ aḍio ipẹ bidị otuughạ bọ kparipẹ rokori amem dị mekạr ekpụl.”

Aḍinị olhogh dị odi siphẹ aBaibul phọ: “Amem muọ iyaạr r’iyaạr.”​—Ecclesiastes 3:1.

Kparamị ghan obumoọny phọ anạ otuughạ aḍinyạ. Mem dị obumoọny phọ anạ alegheri suọ dị odi ghan otuughạ aḍinyạ nyiidiphọ, pọ kụ amem dị kenyu nyodị otuughạ ghan aḍinyạ. Esi omaạm, amatimatis katue ni aloghonaạn nyodị ḍighaạgh omhaạr ophạm ikpoki odị.

Aḍinị olhogh dị odi siphẹ aBaibul phọ: “Moọgh osụ ologhi, moọgh onaghanạn aḍughụm. . . . Maghamị ni maạr iboom.”​—Proverbs 4:​5, 8.

Oroma: Loghonaạn ghan ḍighaạgh obumoọny anạ oḍighi ahom wọk odị. Oye dị oghol mọ Andrew aḅẹm mọ, “Onynị ayoor abeḍenọm ghan olegheri iyaạr ayoor bịn epul elọ odị o/sighẹ ghan oḍighinom.” Kụ iḍighi kụ tughemị ghan nmụny phọ anạ ilọ oḍighi ghan ahom wọk ḍiọ abidị.