Pel aghị epẹ ogọ bọ raraạr phọ

Abugbaanaạn AJihova

Select language Abua

ABAIBUL PHỌ RANME GHAN NI SIGHUḌUM AWE

“Mị Umoọgh Ghan Ofughughuuny”

“Mị Umoọgh Ghan Ofughughuuny”
  • Alhạ phọ Omhạr Bọ: 1975

  • Eelhe phọ: Mexico

  • Iphirigba odị: Oye Ofughughuuny; dị olhọgh ikoli

IPHIRIGBA PHỌ AMỊ

Umhạr imị epẹ San Juan Chancalaito, ebạm emhạ dị erọl ghan egbogh emhạ aChiapas, Mexico. Eghunotu phọ amị uḍighi aani we aChol phọ, buọ emhạ dị oḍuạ okuruḅakạ oye dị oghol mọ Maya kụ omite. Odẹ r’onhiin ayoor omhạr bọ 12 anmụny, kụ mị uḍighi omuneniom oogh phọ. Eghoroghọr amị, abumor amị r’amị utuughạ ghan ni Baibul phọ r’Bugbaanaạn AZihova. R’okururu ni, mị u/sighẹ uḍighinom oroma aBaibul phọ mem iḍoọgh phọ amị.

Mị romhạn 13 asiạ, bịn mị amiigh ophugholọgh igbagarạ asirooghọ r’omiighi araraạr abunhọn. Mem dị mị odi ni 13 asiạ, mị uḅuạ ni otu aghị rikpisi kirokirọ. Kụ mị romhạn 16 asiạ, mị amiigh okumuan ghan ozo dị ozụph rinyạ agee. M urọl siphẹ phọ dị remạn ni lhạ, kụ ḍiniin aḍughul yoor osaạny iboom iphurugha agee oghuugh umuụm rokị aal, kụ abunhọn awe dị robool aani ghan gee ophạm igbogh asilaagbạ oru uzuoghom iyoor. Mị ukpetaan ḍighaạgh abidị esi opel osuma olhoghi ophiịny phọ bịn ophun onhọn agạ. Ipẹ reten, kụ mị asuma aghị Yunaitẹd Stet.

Epẹ phọ mị uḅilẹ ghun bịn amiigh aal igbagarạ asirooghọ, bịn aḍigh ghụn esi iboom iiḅaghamị. Ukasaghiọm ni imị mem dị mị amhạn 19 asiạ, mọ mị amiighi aḅilẹ awạ oghiigh oye. Epẹ otu ikoli phọ, mị ughị ni aḍighan okarạph otul bịn aḍighiyogh ghan raraạr iigamaniạn. Esi iduọn phọ, abuọ itooghị phọ usighẹ ni imị oghimọm ekpisi dị kuphoghom imị egbagarạ ekpeḍien epẹ Lewisburg, Pennsylvania.

Siphẹ otu ikoli phọ aLewisburg, aroozọ phọ amị iḅilẹ ghụn bịn eloghorị. Loor esi araraạr okarạph otul phọ mị ageeghị bọ loor amị epẹ oḅẹl otu ikoli phọ, idughanaan ni imị oḅilẹ oḍighan oniin phọ okarạph otul phọ ephẹn phọ. Mị alegheri bịn agạm ghan, aḍuạ ghan esi elebiri agbạ elebiri. Eniin amem, otul ayoor r’onhọn otul ubeeghi ni siphẹ otu ikoli phọ. Elebiri phọ igbagarạ ni iboom dị tutụ yoor osighẹ ikula ireeny dị ropeghom ghan baseball r’arukuron phọ ipẹ ropoophe ghan bọ kụ obeom. Oogbariọn ayoor, abukoriom ikoli phọ urạph ni tear gas kụ yoor ogbi nuụn osophe. Kụ iḍighi kụ, abugbogh abupoghom otu ikoli phọ usighẹ imị olọgh osoph dị arookọm enu kụ odi ghan. Mị umoọgh ghan ofughughuuny ḅilẹ aḅaaghị ghan igbagarạ ikpo onhụ. Mị ukuphogh ghan we agey. Iḍighi eḍien esi amị. Mị u/loghoma ghan saị esi aroozọ phọ amị.

IPẸ ABAIBUL PHỌ ANME BỌ GHUḌUM MỌ AMỊ

Epẹ osoph phọ useere bọ imị, imị u/gbor ghan umiteom erugh, kụ iḍighi kụ mị ugbor ghan aạl Baibul phọ eḍighi bọ edị mị u/moọgh ghan bọ iyaạr oḍighi. Onyebel roten, kụ oniin opoghon ikoli phọ ungọ imị ḍinyạ phọ You Can Live Forever in Paradise on Earth. * Mem dị mị aạl bọ ḍinyạ phọ, mị uutughiạn ni ibadị araraạr dị Abugbaanhaạn phọ oru ghan utughemị imị eghoroghọr. Pọ kụ amem dị mị aphogha loor amị kụ amiịn odọ idị aroozọ iigamaniạn phọ amị miḍighi imị. Mị aḅilẹ aatughiạn buọ eghunotu phọ amị. Eḍighi bọ edị iyạl abumarani amị oḍighi Bugbaanhaạn AZihova, mị uutughiạn ghan ni mọ, ‘Iduọn phọ bidị kotọl k’agee-pọ.’ Kụ mị apuruan loor mọ, ‘Uḍighi ika kụ mị katue bọ atọl aani k’agee-pọ?’ Opọ kụ amem dị mị asopha onmia.

Toroboiperolbọ, mị ulegheri ni mọ mị awạ ni ologhonaạn aḍighaạgh orue onmia. Kụ iḍighi kụ, mị uphụr aaḅereghị aZihova Enaạn kụ alọm ologhonaạn amị ḍighaạgh. Mị rooḅereghị, kụ mị agẹ aghiọm olhạ agadạ aBugbaanhaạn phọ epẹ Yunaitẹd Stet oru otughemị amị Baibul. Olhạ agadạ phọ uukolobian ni ookpomoghan dị atuman oru oteẹny amị. Mem mọ amuphẹ phọ, u/meera ghan mọ awe ḍi u/ḍighi siya amị oru uphogh imị, kụ iḍighi kụ oniin onyọ Ogbaanhaạn siphẹ ookpomoghan phọ agẹ ghan rinyạ okparamiọm amị kụ aḅarạm ghan rinyạ ookpomoghan phọ uruom imị, kụ ipẹ phọ ikparamị ni eephuạ phọ amị onmia.

Mị uḅilẹ ni agbatạn enhọn eboom edạ mem dị mị asopha owilẹ okarạph otul phọ mị aḍigh bọ esi ibadị asiạ. Oḍiemiom okarạph otul phọ arọl aani ghan pakirị ephẹn arookọm enu phọ orọl ghan bọ, kụ iḍighi kụ mị aghị ateẹny nyodị eniin amem dị yoor roozaghamiạn loor aḅenị mọ mị rawạ oḍighi aani oniin onyọ Ogbaanhaạn AZihova. Iḍighi ni iikia esi amị mem dị odị uḅenị imị mọ: “Eḍighi maạr dị ekạr ri edi ologhi anạ, pọ nạ atue ni akị. Mị ka/tue akikima Enaạn. Kuolọ eḍighi maạr dị nạ ragbạ egberi obọ nạ awilẹ otul phọ, pọ nạ alegheri ni idị kemitenaan nyinạ.”

Mem dị iyạl asiạ meten, opoghom otu ikoli phọ amiịn ni oboom onmia siẹn aroozọ phọ amị. Esi iduọn phọ, bidị imị u/kạr ghan mun uzoọm egbagarạ eten. Esi omaạm, abupoghom ikoli phọ imị u/lọgh ghan mun aḅạr-akpasị mem dị usighẹ imị rokị mọ mị ubura muụm. Oniin opoghom otu ikoli phọ aru ni ukparamị imị kụ aḅẹm mọ mị ukiọm ni ghisigh imạ phọ onmia phọ. Okạr oghaạph, abuọ itooghị otu ikoli phọ usighẹ ni imị oghimọm pakirị dị i/kạr mun igbagarạ idiphọ ephẹn mị arọl bọ, dị mị kaḅilẹ atọl ḍiniin alhạ. Reteẹny lhạ phọ 2004, mem dị mị marọl li otu ikoli ḍioph asiạ, useere ni imị kụ usaạny amị moto abuọ ikoli phọ osiemi Mexico.

Mị asi bọ Mexico, i/bia bịn mị amiịn Kindọm Họl Abughaanhaạn AZihova. Mị ukpologhiạn iinmenian otu ikoli phọ kụ aghimọm iḅẹl ituughạ phọ​—ipẹ bịn kụ iinmenian dị emalaạm dị mị amoọgh mem mọ amuphẹ phọ. Etigheri iinmenian phọ amị, Abugbaanhaạn phọ ughuraam ni imị r’eenyuụm. Mem dị mị amiịn bọ eyoghoyoghọ eten phọ bidị usighẹ bọ imị, mị uloghoma ni mọ mị akạr odi igbo abugey aKristẹn phọ. (Jọn 13:35) Ḍio phọ aḍiphẹ mị aghị bọ ituughạ phọ, ikumor awe phọ uukolobian ni oye dị kutughemị ghan imị Baibul. Alhạ phọ etum bọ siphẹ kụ edị mị aḍiiny muụm idiphọ oniin onyọ Ogbaanhaạn AZihova, September 3, 2005.

Mem dị eteẹny bọ January 2007, bịn mị aḍigh aani rukumuan oomo amem mọ, mị ulhọgh ghan 70 awạ torobọ unwayụ otughemiọm abunhọn Baibul phọ. Mị ughị aani askul phọ, Bible School for Single Brothers (nyiidiphọ oghol bọ mọ, School for Kingdom Evangelizers) lhạ phọ 2011. Askul phọ ophọn phọ akạr kụ uloghonaạn imị ḍighaạgh omuneni iiḍighi phọ amị siphẹ ookpomoghan phọ.

Nyiidiphọ mị rakelọm ghan ni otughemị aani abunhọn dị koḍighi weye eephọ

Lhạ phọ eḍighi bọ 2013, kụ edị mị aphin ooḅi anhịr phọ amị, Pilar. Odị uḅenị imị r’oomo olhoghi mọ rekparanaạn ghan ni nyodị omeeraam oomo araraạr phọ mị aghaạph bọ aḅenị nyodị ilọ adọl aghuḍum mọ amị. R’amem mị ko/ḅula mun ḍigbaany adọl phọ amị. Mị r’anhịr amị omeeraam mọ odọ phọ oye phọ mị aru bọ ḍio arodon ekạr kụ eḍeenaan odọ inyaạm mọ aBaibul phọ amoọgh bọ onme ghan asighuḍum awe.​—Rom 12:2.

ASUỌ DỊ MỊ MAMOỌGH

Mị amiịn mọ ugeanaạn imị ikpo onhụ phọ aZizọs edi bọ siphẹ Luk 19:10. Odị aḅẹm mọ: “[Mị uru] owạ abuphẹ mophe bọ r’ophelọm abidị otene.” Mị u/loghoma mun mudị mị atoph iyaạr siẹn aghuḍum mọ amị. ilẹ mị ra/ḍighiyogh ghan mun we raraạr. Mị akạr kụ rasereghiạn Baibul phọ, ologhi amị akạr kụ aḅaạl omoọgh ogbi dị anighẹ apeleghiom siẹn aghuḍum mọ amị, orọl adọl eephọ r’abunhọn, ḅilẹ edị ekạr emạn maạr epeleghiom, imạ asiya r’Olhemiạ phọ amị, Zihova.

[IGẸ DỊ EDI UDE]

^ par. 13 Abugbaanhaạn AZihova kụ ugẹ ḍinyạ phọ aḍiẹn phọ kuolọ ro/miteom ghan mun. Nyiidiphọ, aḍinyạ dị bidị rosighẹ ghan k’otuughaạm Baibul, pọ aḍiphẹ eḅẹm bọ mọ What Can the Bible Teach Us?