Pel aghị epẹ ogọ bọ raraạr phọ

Abugbaanaạn AJihova

Select language Abua

ABaibul Phọ Ranme Ghan Ni Sighuḍum Awe

Iikpiạ Dị Enhighẹ Epelheghiom Siẹn Aghuḍum Mọ Amhị

Iikpiạ Dị Enhighẹ Epelheghiom Siẹn Aghuḍum Mọ Amhị
  • UMẠR LHẠ PHỌ: 1967

  • EELHE PHỌ: FINLAND

  • IPHIRIGBA ODỊ: OPHELHEGBE OYE EPHEGH ATENỊS

IPHIRIGBA PHỌ AMỊ

Mị urọl epẹ eekuna egbogh emhạ phọ aTampere ekpisi dị emhaạr ephọ, epẹ Finland kụ amhanhạm. Otọ ayoor u/kạr ghan u/legheri Enaạn, kuolọ umaghamị ni maạr askul r’igey araagharạ. Onhiin amhị olọ aZaminị, kụ mem mọ mị aghom bọ, mị ugbor ghan ni aghị Wẹst Zaminị epẹ k’ogbogh onhiin amhị.

Areephegh iḅeraạn ghan imị k’amem dị mị aghom. Mem mọ mị aghom bọ, mị uphegh ghan ni oomo idokirokirọ areephegh, kuolọ mị romhạn 14 asiạ, bịn mị asopha ogbon atenịs. Kụ mị romhạn 16 asiạ, bịn mị amhiigh otuughạ ghan iyạl obobọ iraạr amem ḍio phọ​—akos amhị utughemhị ghan imhị iyạl amem ḍio phọ, kụ mị rogheel dulhe kụ mị aḅilhẹ atuughạ elọ amhị. Idokirokirọ asioghọ ephegh phọ kụ iberaạn imị agey, kụ iḍighi kụ, mị ulhọgh ni oomo inyaạm r’iitughiạn amhị omhiịn mọ mị apegh ni atenịs phọ. Ghalamọ r’iduọn mị aghelọm ghan bọ ni ooḍikuan r’arighirị amhị ophughọl amiim eeni amem, mị u/pughọl utenom okụ ḅilhẹ u/ḍighinhom igbagarạ asirooghọ. Adọl aghuḍum amhị irọl ghan esi atenịs phọ bịn​—iḍighi ḍiigbu amhị.

Mị romhạn 17 asiạ, bịn mị amhiigh ophegh aani r’ATP. * Mị rowinogh ibadị amem bịn mị aalheghaan oomo eelhe phọ. Kụ mị romhạn 22 asiạ, bịn mị aḍighom aani igbo 50 awe dị okạr omhaạr atenis siẹn oomo aḅirini phọ.

Esi ibadị asiạ, mị ughị ghan ni rikpisi kirokirọ idiphọ ophelegbe oye atenịs. Mị umhiinọgh ghan ni imạ arikpisi kirokirọ, kuolọ mị umiịn ghan kẹn ni iiḅaghamị kirokirọ, idiphọ, osoroghu iilhogh, ophugholhọgh igbagarạ asirooghọ, r’iiḅaghamhị amarugh. Esi omaạm, mem dị mị arọl Yunaitẹd Stet, imhoọgh ni iniin arokool dị oḅẹm mọ yoor ku/kị ghan loor esi osoroghu iilhogh. Iphẹn phọ ikạr kụ iiḅaghamị ghan imhị. Ghalamọ r’iduọn mị aḍighi ghan bọ iyaạr dị iḅeraạn imị, eekuna aḍio phọ mị u/moọgh ghan ogbaanyạn.

IPẸ ABAIBUL PHỌ ANME BỌ GHUḌUM MỌ AMHỊ

Oyugạ amhị aSanna, amhiigh ni otuughạ aBaibul phọ r’Abugbaanaạn AZihova. Iḍigh ni reẹgh esi amhị omhiịn dị ratuughạ ilọ Enaạn, kuolọ mị u/kikima nyodị. Yoor aalhạn lhạ phọ 1990, bịn lhạ phọ aḍiphẹ etum bọ siphẹ odị aḍiiny muụm idiphọ oniin onyọ Ogbaanaạn AZihova. Elọ amhị, mị u/moọgh ghan maạr oḍighinhom ekụ iiḅereghị, kuolọ mị umheeraam ni mọ Enaạn edi ghan ni. Mị uutughiạn ni ogbogh onhiin amhị epẹ Zamini dị agbor ghan aạl Baibul phọ, ḅilhẹ utughemị imhị ilọ ooḅereghị.

Eniin aḍio, dị aSanna r’amhị r’abunhọn olom r’anhịr dị oḍighi Bugbaanaạn rokị ophogh oye, olom mọ Kari uḍeenhaan imhị imiịn aBaibul phọ idị egbolomaam siḍio “aruukuna phọ.” (2 Timoti 3:​1-5) Iphẹn phọ ikạr kụ itir imhị, bịn mị aru alhegheri iyaạr phọ eḍighi bọ kụ aḅirini phọ eeph bọ iduọn. Ḍio phọ aḍiphẹ phọ yoor u/kạr ukaạph iboom ilọ Enaạn. Emhiigh mem mọ amuphẹ phọ kụ rekị, bịn aKari r’amhị omhiigh oghaạph ghan ilọ Enaạn, oomo ipẹ odị utughemị bọ imị imhoọgh ni maạr oḍighinhom. I/tue ghan idugh dị yoor ogbor ghan otuughạ loor esi iduọn ephegh phọ isighẹ ghan bọ imhị eghị rikpisi kirokirọ, kuolọ aKari o/dugh. Odị agẹ ghan ḍinyạ kụ aphagharanaạn sipuru lọ mị apuru mem lọ yoor otuughạ. Opanyanaạn ni oomo igbogh asipuru aghuḍum mọ siphẹ aBaibul phọ, kụ enụm enụm bịn mị amiigh omhiịn Ekpanạ emhuoghaạph aBaibul phọ​—mọ Omhạr phọ Enaạn kụ kamuneni igbiom mọ Enaạn. Otuughạ ilọ aḍien phọ Enaạn Zihova, kụ oḅilhẹ omhiịn ipẹ odị muḍighinhaan bọ iyira, iḅeraạn imhị iboom. (Psalm 83:18) Edị ekạr itir imhị pọ iikolobian ekiạ etagharạn phọ​—i/ḍighi oopho iikolobian osụ olhoghi obobọ idị edaphạn olhogh bịn, kuolọ eḍeenhaan ephomoghiạn phọ Enaạn. (Jọn 3:​16) Mị uḅilhẹ kẹn alhegheri mọ mị amoọgh ni eepoogh oḍigh arighirị r’Enaạn kụ orọl k’agee-pọ de dị eḍighi paradaịs. (Jems 4:8) Kụ mị amhiigh opuruan aloor mọ: Ika kụ idị mị kaḍeenhaan osereghiạn?”

Kụ mị akiton aphogh dọl aghuḍum mọ amhị. Mi utuughạ ni siphẹ aBaibul phọ mọ ogbogh oḅaạl olhoghi r’aḅuạ ghan k’aru esi ongọ aani ghan abunhọn, bịn inyu imhị oḅenị aani abunhọn ilọ omheeraam mọ amhị. (Iiḍighi 20:35) Idiphọ ophelegbe oye areephegh, mị uḍuạ ghan otu 200 asiḍughul otu lhạ phọ, oghị ophegh areephegh. Oomo ikuph otọ k’ayoor pọ oḍighi idị mị​—kaḍighi ophelegbe oye ephegh atenịs phọ. Mị uru ni amhiịn mọ ewạ ni dị mị k’anmia.

Mị ulegheri ni mọ owilhẹ ephegh dị kengọ ni oye iboom ikpoki oghị ooḅereghị Enaạn, eḍighi osopha dị ibadị ko/tue onaghanạn. Kuolọ eepoogh okuamị olhegheri aZihova kụ omhoọgh aghuḍum k’agee-pọ kụ imhạn maạr epu torobọ iyaạr dị mị kamoọgh epẹ ephegh atenịs phọ, kụ iḍighi kụ idughanaan ni imị osopha. Mị usopha mọ mị ra/naghạn torobọ idị oye aghaạph​—osopha phọ olọ amị. Esi aBaibul dị ekạr iloghonaạn imhị ḍighaạgh pọ aPsalm 118:6: eḅẹm bọ mọ “AZihova odị agạ amị; Mị ka/kiilaan. Oye kuḍighi imị eeghe?”

Siẹn amem mọ amuẹn phọ, abuọ ephegh atenịs phọ, uru ni umạgh imị oghị ophegh aani, kụ mọ kukpẹ imị iboom ikpoki esi ibadị asiạ. Kuolọ mị m’asopha okumu aZihova, kụ iḍighi kụ mị u/meera ukị upegh, bịn ekureriom mọ mị awilẹ ophegh areephegh ATP phọ. Mị ughiọm ni ghisigh atuughạ ghan Baibul phọ, reteẹny umwanyụ aJuly 2, 1994, bịn mị aḍiiny aani muụm idiphọ oniin onyọ Ogbaanhaạn AZihova.

ASUỌ DỊ MỊ M’AMHOỌGH

Pakirị ephẹn amị, ekarạph iyaạr kụ imị i/mitenaan kụ mị agbi bọ ootughiạn ilọ Enaạn. Anhinhiạn kẹn mọ mị uḍighi oye dị awạ olegheri igey phọ. Idị eḍighi bọ mị uutughiạn ghan mọ adọl aghuḍum mọ amị enighẹ ni ḅilẹ i/moghi mun enhọn iyaạr. Kuolọ imite ekperenom bịn, mudị igey aBaibul phọ ikori ghan imhị, kụ mị aru amhiịn mọ aghuḍum akạr ri amoọgh emhụ, kụ aghuḍum amhị m’anighẹ apu ipẹ mị aatughiạn ghan bọ! Eghunotu phọ amhị m’ekpạr ḅilhẹ amuḅọph odi apu ipẹ erọl ghan bọ. Kụ olhoghi amhị akạr kụ aḅaạl iduọn iraạr phọ ibạm anmụny phọ amhị modaphạn aani bọ igbaranọm aruwol phọ amhị​—ki/diphọ awe ephegh, kuolọ idiphọ aKristẹn.

Mị rakelọm ghan ni ophegh atenịs. Kụ emhiigh k’asiạ phọ, mị ramoọgh ghan ni iyaạr ophamạm eghunotu phọ amhị dị eego esi inhọn iiḍighi dị egbolomaạm ephegh atenịs phọ, esi omaạm, idiphọ otughemiạ ephegh phọ, r’idiphọ oye dị rapogh ghan esi ephegh phọ. Kuolọ aghuḍum mọ amhị o/beḍenọm mun reephegh phọ. Mem dị eten, mị ulhọgh ghan ni muboom amem torobọ awiki otuughạ ephegh atenịs phọ obọ mị aḍighi ophelegbe. Kuolọ nyiidiphọ idiphọ oye arukumuan oomo amem mọ, reḅaạl ghan olhoghi amhị osighẹ amem amhị oḍighinhom ologhonaạn aḍighaạgh bunhọn dị kotuughạ oḅilhẹ osighẹ oḍighinhom sinị iilhogh aBaibul phọ enme bọ ghuḍum mọ amhị. Nyiidiphọ, mị ramoọgh ghan ogey phọ oḅaạl olhoghi esi osighẹ asiya phọ amị r’aZihova Enaạn oḍighi eḅẹl, ḅilẹ roḅenị aani ghan abunhọn ilọ oḍuomologhi imạ aghisigh dị ratu.​—1 Timoti 6:​19.

^ par. 10 ATP phọ pọ Ookpomoghan Awe dị Okạr Olhegheri ilọ aTenịs. Odị kụ aloor phọ repogh bọ eghir alhephiri anmụny phọ okạr bọ olhegheri ilọ atenịs. ATP phọ iḅaramaạm ghan reephegh iipikian kirokirọ dị okpẹ ghan igbogh ikpoki oye lọ awin. Onhụ ipẹ oye phọ aphegh bọ, kụ rekaạph ghan esi phọ m’aphegh bọ asiemi siẹn aḅirini phọ.