Ихадоу аматериалқәа рахь аиасра

Иацу амениу ахь аиасра

Аҵакахьы аиасра

Иегова Ишаҳаҭцәа

аԥсуа

Аҿар ирызцәырҵуа 10 зҵаарак рҭак

 АЗҴААРА 3

Ҳашԥеилибакаари сҭаацәеи сареи?

Ҳашԥеилибакаари сҭаацәеи сареи?

УИ АДЫРРА ЗХАДОУ

Уҭаацәеи уареи шәеилибакаауазар, уара имаҷымкәа ауадаҩрақәа уҽырцәухьчоит.

УХЫ ШԤАМҨАԤУГО УАРА?

Ухаҿы иааг абри аҩыза аҭагылазаашьа. Ахаша. Хәылбыҽхоуп. 17 шықәса зхыҵуа Џьефф идыз аҩнтәи иусқәа наигӡеит. Уажәшьҭа иԥсгьы ишьар ауеит. Иара ателевизор аҿакны бзиа иибо иҭыԥ аҿы ишизыманшәалоу дтәоит.

Аха абар иаб ашә даалагылеит, иара игәалаҟазаара шҽеим убарҭоуп.

— Џьеффри! Ателевизор узадтәалоузеи? Уашьа идҵақәа рыҟаҵара ицхраауада? Уара иуарҳәо ахаан иҟауҵаӡом!

— Далагеит,— дыгәрымуеит Џьефф, аха аб зегь иаҳауеит. Иара ԥхьаҟа днаскьоит:

— Изакәызеи иуҳәаз?

— Мап, акгьы,— даақәыԥсычҳауеит Џьефф, илақәа нарҳәы-аарҳәуа. Аб иԥсахы еибакуеит:

— Убас усмацәажәалан ҳәа уасҳәеит!

Иҟауҵарызи уара Џьефф иҭыԥ аҿы уҟазҭгьы, абри аҩыза аҭагылазаашьа ҟамларц азы?

УААҬГЫЛАНЫ УХӘЫЦ!

Уҭаацәеи уареи шәеиҿцәажәара, амашьына аныҟәцара иаҿурԥшыр улшоит. Амҩа шарку убозар, даҽа мҩак уԥшаар ауеит.

 АҾЫРԤШТӘЫ:

«Саб иацәажәара сцәыцәгьоуп,— лҳәоит Лиа зыхьӡу ӡӷабк.— Зны–зынла сара ак анизеиҭасҳәо, иара иаалырҟьаны дсазҵаауеит: „Саҭамыз, акыр бҳәазма?“»

ЛИА Х-ВАРИАНТК ЛЫМОУП.

  1. А. Лаб иқәыҳәҳәара.

    Лиа агәынамӡара аалырԥшуеит: «Саб, узысзымӡырҩуазеи? Ари даара ихадоуп!»

  2. Б. Ари атема уаҳа аламцәажәара.

    Лиа лыуадаҩра лаб уаҳа иалымҳәарц лыӡбоит.

  3. В. Еиҳа ианаало аамҭа алхра.

    Лиа ԥыҭрак ашьҭахь аиҿцәажәарахь деиҭахынҳәуеит, мамзаргьы илымоу ауадаҩра лаб асаламшәҟәаҿы изанылҵоит.

Угәы ишԥаанаго, иарбан варианту Лиа иалылхыр лыхәҭоу?

ҲАЗХӘЫЦЫП. Лиа лаб ихәыцра дҭанагалеит, насгьы лара лгәы шкаҳаз ибаӡом. Убри аҟынтә лара авариант А алылхыр, лаб диқәыҳәҳәо ацәажәара далагар, иара илҭаху изеилымкаар ҟалоит, насгьы еиҳа азҿлымҳара аарԥшра далагаӡом. Иара убас, уи ала иара иахь апатуқәҵара аалырԥшуам (Ефесаа рахь 6:2). Еилкаауп ари авариант алҵшәа бзиақәа шаанамго.

Уҭаацәа рыҿцәажәара аганахь ала иумоу ауадаҩрақәа ԥсыхәа рымамкәа иҟам. Уара иулшоит даҽа знеишьак аԥшаара!

Авариант Б зегь раҵкыс имариоуп, аха зегьы иреиӷьӡам. Избан? Избанзар илымоу ауадаҩра лыӡбарц азы, Лиа лаб диацәажәар ауп. Иҟалаз идыруазар, иара длыцхраар илшоит. Убри аҟынтә аҿымҭра аҭагылазаашьа еиӷьнатәуам.

Лиа авариант В алылхыр, ари аҭагылазаашьа ӡбашьа амамкәа инхарц аллыршом. Лара лҽазылшәоит даҽазны лаб иацәажәара. Иалшоит асаламшәҟәы изыҩра лыӡбар, иҟалап усҟан лара еиҳа илзымариахар.

Асаламшәҟәы Лиа лхәыцрақәа еиҳа еиӷьны раарԥшра илыцхраауеит. Лаб уи данаԥхьалак, иалҳәарц илҭахыз еиҳа еиӷьны еиликаауеит, насгьы леилкаара изымариахоит. Убас ала авариант В Лиа лаби лареи рзы зегь раҵкыс еиӷьуп. Лиа лаб диацәажәар ма асаламшәҟәы изылҩыр, лара абиблиатә ааԥхьара «ҳамч-ҳалшара зегьы хирла, ҭынчрала аҟазаареи аҳәатәеиқәшәареи ирызкыз» инақәыршәаны лхы мҩаԥылгоит (Римаа рахь 14:19).

Иҟалҵар лылшозеи еиҭа Лиа?

Еиқәыршәа ухатә вариант, насгьы уазхәыц уи иалҵшәахар алшо.

 УХӘЫЦРАҚӘА ЕИҲА ИНҬКААНЫ ИҲӘАЛА

Иухаумыршҭлан: зны–зынла уҭаацәа зынӡаск иуҳәарц иуҭаху акәӡам ираҳауа.

АҾЫРԤШТӘЫ:

Уҭаацәа угәалаҟазаара зҽеимзеи ҳәа иуазҵаауеит. Уара аҭак ҟауҵоит: «Сара уи алацәажәара сҭахӡам».

Аха уҭаацәа ираҳауеит: «Сара шәыгәра сгаӡом. Сыуадаҩрақәа сҩызцәеи сареи иҳаӡбоит».

Ухаҿы иааг абри аҩыза аҭагылазаашьа: уара ауадаҩра узцәырҵит, насгьы уҭаацәа ацхыраара удыргалоит. Уара иуҳәоит: «Хьаас ишәымкын, сымацара исыӡбоит».

  • Ишԥеилыркаар алшо уи уҭаацәа?

  • Ишԥауҳәарыз даҽакала, ииашаны уеилыркаарц азы?