Абиблиа иану

 Мап, апланета Адгьыл ахаан иқәгахом, мцала ибылхом, ма даҽа планетак ала иԥсаххом. Абиблиа иаҳәоит Анцәа Адгьыл зишаз ауаа наӡаӡа иқәынхаларц азы ауп ҳәа.

•   «Ауаа иашақәа адгьыл рҭынхоит, иагьынхалоит уа наӡаӡа» (Аԥсалом 37:29).

•   «[Анцәа] адгьыл ашьаҭа ӷәӷәа аиҭеит, иҵысӡом уи наунагӡа, наӡаӡа» (Аԥсалом 104:5).

•   «Адгьыл наӡаӡа иаанхоит» (Екклезиаст 1:4).

•   «Адгьыл Зшаз уи Ашаҩы, иара шьақәзырӷәӷәаз уи баша имшаӡеит, иара уи ишеит ауаа ықәынхаларц азы» (Исаиа 45:18).

Иқәырхуама ауаа Адгьыл?

 Ауаа аибашьрақәа ишырҿугьы, аԥсабара шырҟьашьуагьы, апланета зегьы аԥырхага шарҭогьы, Анцәа ауаа Адгьыл шьаҭанкыла иқәырхыртә еиԥш рылиршаӡом. Иара «иқәихуеит адгьыл иаӷацәоу» (Аатра 11:18). Ишԥаҟаиҵо уи иара?

 Адгьыл ахьчара злымшо ауаатәыҩсатә напхгара Анцәа иԥсахуеит инаӡоу жәҩантәи Аҳра ала (Даниил 2:44; Матфеи 6:9, 10). Уи Аҳра напхгара азиулоит Анцәа Иԥа, Иисус Христос (Исаиа 9:6, 7). Иисус адгьыл аҿы данынхоз, иара џьашьахәыла аԥша ӷәӷәа еиқәиртәеит (Марк 4:35—41). Анцәа Иаҳра иахагылоу Аҳ Иисус адгьыли аԥсабаратә мчқәеи дырхылаԥшларц азы амч иҭахоит. Иара адгьыл иазирхынҳәуеит Едемтәи абаҳчаҿы иҟаз аҭагылазаашьа (Матфеи 19:28; Лука 23:43).

Иаҳнамырҵаӡои Абиблиа Адгьыл мцала ишықәгахо?

 Мап. Ари аҩыза ииашам агәаанагара лассы-лассы ицәырҵуеит, 2 Пиотр 3:7 иану ажәақәа ииашамкәа иахьеилыркаауа азы. Уа иануп: «Иахьатәи ажәҩани адгьыли... мцала ауп уажәшьҭа ауаа мцурашақәа рҵыхәа ԥҵәахараны ишыҟоу». Ҳахәаԥшып арҭ ажәақәа рҵакы аилкаара иҳацхраауа ихадоу ҩ-ганк.

1.   Ажәақәа «ажәҩан», «адгьыл», «амца» Абиблиаҿы еиуеиԥшым аҵакқәа рымазар алшоит. Иаҳҳәап, Аҟазаара 11:1 аҟны иануп: «Адгьыл зегь аҿы бызшәак акәын иҟаз». Ара иаагоу ажәа «адгьыл» иаанагоит ауаатәыҩсатә еилазаара.

2.   2 Пиотр 3:7 аконтекст иҳаилнаркаауеит ара зыӡбахә ҳәоу ажәҩани, адгьыли, амцеи рҵакы. 5-тәи, 6-тәи ажәеинраалақәа рҿы урҭ Нои ихаан иҟаз Аӡхыҵра иаҿырԥшуп. Усҟан ажәытәтәи адунеи ықәган, аха ҳапланета акгьы амыхьӡеит. Аӡхыҵра Адгьыл ықәнамхӡеит, уи иқәнахыз ицқьам ауаатәыҩсатә еилазаара ауп (Аҟазаара 6:11). Иқәхын ажәҩан ҳәа иԥхьаӡаз — ауаатәыҩсатә еилазаара напхгара рзызуаз ауаа. Убасала, иқәхыз ҳапланета акәӡам, ауаа цәгьақәа роуп. Нои иҭаацәареи иареи усҟантәи адунеи ақәхра иацәынхеит, насгьы Аӡхыҵра ашьҭахь адгьыл ықәдырҭәааит (Аҟазаара 8:15—18).

 Аӡхыҵра иеиԥшу 2 Пиотр 3:7 аҟны зыӡбахә ҳәоу ақәхра, мамзаргьы «амца», ицәгьоу ари адунеи аҵыхәтәа аанагоит. Уи иқәнахуа апланета Адгьыл акәӡам. Анцәа ҳақәиргәыӷуеит «иаша-ҵабыргла иҭәу ажәҩан ҿыц, аԥсҭазаара ҿыц» (2 Пиотр 3:13). «Ажәҩан ҿыц», мамзаргьы анапхгара ҿыц — «Анцәа Иаҳра», напхгара азнаулоит «адгьыл ҿыц», мамзаргьы ауаатәыҩсатә еилазаара. Уи Аҳра анапхгара абзоурала Адгьыл аҭынчра ахьыҟазаало, иссиру џьанаҭны иҟалоит (Аатра 21:1—4).