Li-setting tsa ho kena

Fetela ho main menu

Fetela ho secondary menu

Fetela ho lethathamo la tse ka hare

Fetela boitsebisong

Lipaki Tsa Jehova

MOLULA-QHOOA (O ITHUTOANG) MARCH 2013

E HLAHILE HO

Kaha ‘Joale re Tseba Molimo’ re Lokela ho Etsa’ng?

“Joale le tseba Molimo.”—BAGAL. 4:9.

1. Ke hobane’ng ha ho e-na le lethathamo leo mofofisi oa sefofane a lokelang ho le hlahloba pele sefofane se tloha?

BAFOFISI ba lifofane ba na le lethathamo la lintho tse fetang 30 tseo ba lokelang ho li hlahloba pele sefofane se tloha. Haeba ba sa latele lethathamo leo ka hloko pele sefofane se tloha, ba eketsa menyetla ea hore ho hlahe kotsi e mpe haholo. Na ua tseba hore na ke mofofisi oa mofuta ofe ea khothalletsoang hore a hlahlobe lethathamo leo ka linako tsohle? Ke ea nang le boiphihlelo ka ho fetisisa! Ho ka ba bonolo hore mofofisi ea nang le boiphihlelo a qetelle a se a sa tsotelle ebe o hlōleha ho hlahloba sefofane ka botlalo pele se tloha.

2. Ke lethathamo lefe leo Bakreste ba khothalletsoang hore ba le hlahlobe?

2 Joaloka mofofisi ea amehileng ka polokeho ea bapalami, u ka sebelisa lethathamo le tla u thusa ho tiisa hore tumelo ea hao ha e fokole nakong eo u e hlokang haholo. Ho sa tsotellehe hore na u sa tsoa kolobetsoa kapa u se u sebelelitse Molimo ka lilemo tse ngata, ke habohlokoa hore u lule u hlahloba hore na tumelo ea hao le boinehelo ba hao ho Jehova Molimo li tiile hakae. Haeba u hlōleha ho hlahloba lintho tseo ka hloko nako le nako, u ka oa moeeng. Bibele e fana ka temoso ena: “Ea nahanang hore o eme a ke a hlokomele hore a se ke a oa.”—1 Bakor. 10:12.

3. Bakreste ba Galatia ba ne ba lokela ho etsa’ng?

3 Ho ne ho hlokahala hore Bakreste ba Galatia ba hlahlobe hore na tumelo ea bona e tiile hakae le hore ba ananele tokoloho ea bona ea moea. Ka sehlabelo sa hae sa thekollo, Jesu o buletse batho ba bontšang tumelo ho eena monyetla oa ho tseba Molimo ka tsela ikhethang ka fetisisa—’me e ka ba bara ba Molimo! (Bagal. 4:9) E le hore Bagalata ba lule ba e-na le kamano eo e ntle le Molimo, ba ne ba lokela ho lahla lithuto tsa Batšehetsi ba Bolumeli ba Sejuda ba neng ba tsitlella hore ba boloke Molao oa Moshe. Taba ke hore Balichaba ba sa bollang ba neng ba le ka phuthehong, ba ne ba e-s’o ka ba e-ba tlas’a Molao  oo! Bajuda le Balichaba ka tsela e tšoanang ba ne ba lokela ho tsoela pele moeeng. Seo se ne se akarelletsa hore ba hlokomele hore Molao oa Moshe o ne o ke ke oa etsa hore e be batho ba lokileng.

MEHATO EA PELE EA HO TSEBA MOLIMO

4, 5. Pauluse o ile a fa Bagalata keletso efe, hona e re tsoela molemo joang?

4 Keletso ea moapostola Pauluse e neng e ea ho Bagalata e tlalehiloe ka morero: e leng ho thibela Bakreste ba ’nete ba phelang nakong efe kapa efe ho furalla maruo a ’nete ea Bibele ebe ba khutlela linthong tse ka morao. Jehova o ile a bululela moapostola Pauluse hore a se ke a khothatsa batho ba liphuthehong tse Galatia feela empa a khothatse le barapeli ba Hae kaofela.

5 E ka ba hantle hore kaofela ha rōna re hopole kamoo re lopolotsoeng bokhobeng ba moea kateng ’me ra ba Lipaki Tsa Jehova. E le hore u ka etsa seo, nahana ka lipotso tsena tse peli: Na u sa hopola hore na ke mehato efe eo u ileng ua lokela ho e nka e le hore u ka tšoanelehela ho kolobetsoa? Na u sa hopola hore na ho tlile joang hore u tsebe Molimo u be u tsejoe ke eena ’me u thabele ho ba le tokoloho ea moea ea sebele?

6. Ke lethathamo lefe leo re tla le hlahloba?

6 Ha e le hantle, kaofela ha rōna re ile ra latela mehato e robong. Mehato eo e tšoanang le lethathamo leo motho a lokelang ho le hlahloba ho bona hore na o ntse a tsoela pele hantle moeeng, e thathamisitsoe lebokoseng le nang le sehlooho se reng,  “Mehato e Lebisang Kolobetsong le ho Tsoela Pele Khōlong ea Moea.” Ha re lula re ikhopotsa mehato eo e robong, seo se tla re matlafatsa e le hore re ka hlōla takatso ea ho khutlela linthong tsa lefatše. Joalokaha mofofisi oa sefofane ea nang le boiphihlelo ea bileng a leng hlokolosi a tsoela pele ho fofisa sefofane ka mokhoa o sireletsehileng ka hore a hlahlobe lethathamo la lintho tseo a lokelang ho li hlokomela pele sefofane se tloha, le uena ntho e tla u thusa hore u tsoele pele u tšepahala tšebeletsong ea hao, ke hore u hlahlobe lethathamo la hao la moea.

BATHO BA TSEJOANG KE MOLIMO BA TSOELA PELE HO HŌLA MOEENG

7. Re lokela ho latela tsela efe, hona hobane’ng?

7 Lethathamo leo mofofisi oa sefofane a le hlahlobang, le mo hopotsa hore ho na le mehato eo a lokelang ho e latela ka hloko nako le nako pele sefofane se tloha. Le rōna re ka lula re itlhahloba le ho hlahloba kemiso eo esale re e latela ho tloha ha re ne re kolobetsoa. Ha Pauluse a ne a ngolla Timothea, o ile a re: “U ’ne u tšoare mohlala oa mantsoe a phelisang hantle ao u a utloileng ho ’na ka tumelo le lerato le mabapi le Kreste Jesu.” (2 Tim. 1:13) “Mantsoe [ao] a phelisang” a fumanoa ka Lentsoeng la Molimo. (1 Tim. 6:3) Feela joalokaha sampole ea baetsi ba litšoantšo e fana ka leseli la hore na setšoantšo se tla ba joang, ‘mohlala oa ’nete’ le oona o re thusa hore re utloisise ka mokhoa o pharaletseng hore na re lokela ho etsa’ng e le hore re phethe seo Jehova a hlokang hore re se etse. Kahoo, a re ke re shebeng mehato eo re ileng ra e nka e le hore re kolobetsoe ’me re boneng hore na re tsamaisana le ’nete hakae.

8, 9. (a) Ke hobane’ng ha re lokela ho tsoela pela re hōla tsebong le tumelong? (b) Etsa mohlala oa kamoo re tsoelang pele ho hōla moeeng kateng le hore na ke hobane’ng ha re lokela ho tsoela pele re hōla.

8 Ntho ea pele e hlahang lethathamong la rōna ke ho rua tsebo. Ka mor’a moo, re ka ba le tumelo. Empa re lokela ho tsoela pele ho hōla tsebong le ho matlafatsa tumelo ea rōna. (2 Bathes. 1:3) Ho hōla moeeng ho akarelletsa ho tsoela pele re etsa liphetoho. “Ho hōla” ho bolela ho eketsa kapa ho hōlisa. Kahoo, ka mor’a hore re kolobetsoe re lokela ho tsoela pele re hōla moeeng e le hore khōlo ea rōna e se ke ea ema nģa e le ’ngoe.

Sefate se tsoela pele ho hōla. Bakreste le bona ba lokela ho tsoela pele ho hōla moeeng

9 Re ka bapisa khōlo ea rōna ea moea le ho hōla ha sefate. Sefate se ka hōla ho fihlela se e-ba seholohali, haholo-holo haeba metso ea sona e tebile kapa e pharaletse. Ka mohlala, likedare tse ling tse khōlōhali tsa Lebanone li ka lekana le mohaho o mekato e 12 ’me li na le metso e matla e phunyeletsang, kutu ea tsona e ka ba bophara ba limithara tse 12. (Sefela 5:15) Qalong sefate  se hōla ka sekhahla empa ha se se se le seholo, se ntse se tsoela pele ho hōla empa khōlo ea sona ha e sa bonahala. Selemo le selemo, kutu ea sona e ba sephara le metso ea sona ea teba le ho pharalla, e le hore sefate se ka tsitsa. Ho etsahala se tšoanang le khōlong ea Mokreste ea moea. Re ka ’na ra hōla kapele moeeng ha re qala ho ithuta Bibele ra ba ra kolobetsoa. Litho tsa phutheho li thabela ho bona tsoelo-pele eo re e etsang. Mohlomong re ka ra ba ra tšoanelehela ho sebeletsa re le bo-pula-maliboho kapa ra fumana boikarabelo bo bong. Lilemo tse hlahlamang, khōlo ea rōna ea moea e ka ’na ea se ke ea bonahala hakaalo. Leha ho le joalo, re ntse re hloka ho hōla tumelong le tsebong “ho isa ho monna ea hōlileng ka ho feletseng, ho isa tekanyong ea boholo ba botlalo ba Kreste.” (Baef. 4:13) Kahoo, ho ka boleloa hore ha re hōla moeeng re tšoana le thollo e nyenyane e hōlang hore e be sefate se seholohali.

10. Ke hobane’ng ha le Bakreste ba hōlileng tsebong ba lokela ho hōla moeeng?

10 Empa tsoelo-pele ea rōna ha ea lokela ho fella moo. Tsebo ea rōna e lokela ho hōla le tumelo ea rōna e lokela ho teba. Kahoo, re itsetsepela haholoanyane mobung oa Lentsoe la Molimo. (Liprov. 12:3) Ka phuthehong ea Bokreste, ho na le bara le barali babo rōna ba ileng ba etsa joalo. Ka mohlala, mora e mong oabo rōna eo e bileng moholo ka lilemo tse fetang 30, o bontšitse hore o ntse a tsoela pele ho hōla moeeng. O re: “Ke se ke ananela Bibele haholoanyane. Kamehla ke fumana menyetla e mecha ea ho sebelisa melao le melao-motheo ea Bibele ka litsela tse fapa-fapaneng. Ke boetse ke tsoela pele ho ananela mosebetsi oa boboleli.”

MATLAFATSA KAMANO EA HAO LE MOLIMO

11. Ke sefe seo re lokelang ho se etsa e le hore re ka tseba Jehova haholoanyane ha nako e ntse e ea?

11 Khōlo ea rōna e boetse e akarelletsa ho atamela ho Jehova e le Motsoalle le Ntate oa rōna. O batla hore re utloe hore oa re amohela. O batla hore re tsebe hore oa re rata ebile o tla re sireletsa joalokaha ngoana a ikutloa a ratoa a bile a sireletsehile ha a sikiloe ke motsoali oa hae ea mo tsotellang kapa kamoo re ikutloang kateng ha re e-na le motsoalle oa ’nete le ea tšepahalang. Joalokaha u ka utloisisa, ha e re ha motho a tsoha feela a be se a e-na le kamano e haufi-ufi le Jehova. Ho nka nako hore re tsebe Jehova re be re mo rate. E le hore re tsebe Botho ba Jehova hantle, re lokela ho behella ka thōko nako ea ho bala Lentsoe la hae letsatsi le leng le le leng. Hape u bale makasine e ’ngoe le e ’ngoe ea Molula-Qhooa le ea Tsoha! hammoho le lingoliloeng tse ling tse thehiloeng Bibeleng.

12. Ho hlokahala’ng e le hore re be le kamano e haufi le Jehova?

12 Metsoalle ea Molimo e hōla moeeng ka ho etsa lithapelo tse tsoang botebong ba  pelo le ka ho ba le metsoalle e molemo. (Bala Malakia 3:16.) Jehova “o sekehela thapeli ea bona tsebe.” (1 Pet. 3:12) Joaloka motsoali ea lerato, Jehova o sekehela mohoo oa rōna o kōpang thuso tsebe. Kahoo, re lokela ho ‘phehella thapelong.’ (Bar. 12:12) Re ke ke ra khona ho ba Bakreste ba hōlileng ka ho feletseng moeeng ntle leha re ka fumana thuso ea Molimo. Likhatello tsa tsamaiso ena li boima haholo hore re ka li hlōla ka borōna. Ha re khaotsa ho phehella thapelong, re etsa hore re se ke ra hlola re fumana matla a sa feleng ao Molimo a ikemiselitseng ho re fa ’ona. Na u khotsofaletse tsela eo u rapelang ka eona, kapa u bona eka ho hlokahala hore u e ntlafatse?—Jer. 16:19.

13. Ke hobane’ng ha ho kopanela le Bakreste-’moho le rōna e le habohlokoa e le hore re ka hōla moeeng?

13 Jehova o khahlisoa ke bohle ba “batlang setšabelo ho eena”; kahoo, esita le ka mor’a hore re tsebe Molimo, re batla hore kamehla re tsoele pele ho kopanela le phutheho ea batho ba mo tsebang. (Nah. 1:7) Lefatšeng lena le tletseng lintho tse nyahamisang, e ka ba hantle hore re lule re le har’a bara le barali babo rōna ba re khothatsang. Re tla fumana melemo efe? Ka phuthehong re tla fumana batho ba tla re susumelletsa “leratong le mesebetsing e metle.” (Baheb. 10:24, 25) Lerato la sebele leo Pauluse a ngotseng ka lona ho Baheberu le khothalletsa hore re be le bonngoe ba bana ba motho, re be sechaba se nang le kelello e le ’ngoe ea borapeli, e leng phutheho. E le hore re bontše lerato la mofuta oo, re lokela ho sebelisana le Bakreste ba bang. Re lokela ho ba teng libokeng kamehla re be re kenye letsoho ho tsona.

14. Pako le ho sokoloha ke lintho tse tsoelang pele ka tsela efe?

14 E le hore re be Bakreste, re ile ra qala ka ho baka eaba re fetola tsela eo re neng re phela ka eona ra ba ra sokoloha kapa ra furalla libe tsa rōna. Leha ho le joalo, pako ke ntho e tsoelang pele. Kaha ha rea phethahala, re ntse re e-na le sebe se ntseng se re nanarela ka hare ho rōna se kang noha e ikharileng e emetseng ho re loma ha monyetla o hlaha. (Bar. 3:9, 10; 6:12-14) A re luleng re falimehile re se ke ra iphapanyetsa liphoso tsa rōna. Ka lehlohonolo, Jehova oa re mamella ha re ntse re leka ka matla ho loantša bofokoli ba rōna re bile re leka ho etsa liphetoho moo ho hlokahalang. (Bafil. 2:12; 2 Pet. 3:9) Ntho e ka re thusang haholo ke ho laola nako ea rōna le tsela eo re sebelisang matlotlo a rōna ka eona re be re khaotse ho phehella mesebetsi ea boithati. Morali e mong oabo rōna o re: “Ke hōliselitsoe ’neteng, empa ke hōtse ke e-na le maikutlo a fapaneng le ao batho ba bangata ba neng ba e-na le ’ona ka Jehova. Ke ne ke utloa a tlameha ho tšajoa ho tlōla ’me ke ne ke bona eka ke ne nke ke ka khona ho mo khahlisa.” Ka mor’a nako, morali eo oabo rōna o ile a iphumana “a fokola moeeng” ka lebaka la litšitiso tseo a ileng a thulana le tsona. O tsoela pele ka ho re, “E ne e se hobane ke sa rate Jehova, empa e ne e le hobane ke sa mo tsebe hantle. Leha ho le joalo, ka mor’a hore ke etse lithapelo tse matla, ke ile ka qala ho fetola maikutlo a ka.” O phaella ka ho re: “Ke ile ka hlokomela hore Jehova o ne a ntataisa joaloka ngoana, a nthusa hore ke hlōle bothata bo le bong ka nako ’me a etsa seo ka bonolo a mpontša hore na ke lokela ho etsa’ng.”

15. Jesu le Ntate oa hae ba hlokomela eng?

15 “Le ’ne le bolelle sechaba” litaba tse molemo. Lengeloi la Molimo le ile la bolella Petrose le baapostola ba bang mantsoe ao ka mor’a hore ba lokolloe ka mohlolo teronkong. (Lik. 5:19-21) Ka sebele, ho kopanela tšebeletsong ea tšimo beke le beke ke e ’ngoe ea lintho tse teng lethathamong la rōna leo re lokelang ho le hlahloba. Jesu le Ntate oa hae ba hlokomela tumelo ea rōna le tšebeletso eo re e etsang. (Tšen. 2:19) Moholo ea qotsitsoeng lirapeng tse ka holimo o re: “Tšebeletso ea tšimo ke eona ntho e ka sehloohong.”

16. Ke hobane’ng ha e le habohlokoa ho hopola boinehelo ba rōna ho Jehova?

16 Nahanisisa ka boinehelo ba hao. Letlotlo la bohlokoa ka fetisisa leo re nang le lona  ke ho ba le kamano e haufi le Jehova. O tseba bohle bao e leng ba hae. (Bala Esaia 44:5.) Hlahloba hore na u na le kamano e haufi hakae le eena ’me u rapele ka seo. Mabapi le seo, hopola letsatsi la bohlokoa leo u kolobelitsoeng ka lona. Seo le sona se tla u thusa ho hopola hore ho kolobetsoa ha hao ke sesupo sa hore u entse qeto ea bohlokoa ka ho fetisisa.

U HLOKA HO BA LE MAMELLO E LE HORE U KA LULA HAUFI LE JEHOVA

17. Ke hobane’ng ha re hloka ho mamella e le hore re lule haufi le Jehova?

17 Ha Pauluse a ne a ngolla Bagalata, o ile a hatisa bohlokoa ba ho mamella. (Bagal. 6:9) Ke habohlokoa hore Bakreste le bona ba mamelle kajeno. U tla thulana le liteko empa Jehova o tla u thusa ho li hlōla. Lula u rapella moea o halalelang. U tla ikutloa u imolohile ha Jehova a tlosa mesarelo ’me a u tlisetsa thabo, a tlosa ho sithabela ’me a u tlisetsa khotso. (Mat. 7:7-11) Nahana ka sena: Haeba Jehova o hlokomela linonyana, e tlameha ebe uena motho ea mo ratang le ea inehetseng ho eena o u tsotella le ho feta. (Mat. 10:29-31) Ho sa tsotellehe mathata ao u thulanang le ’ona, le ka mohla u se ke ua chechela morao, le ka mohla u se ke ua tela. Ruri re fumana maruo a hlollang hobane feela re tsejoa ke Jehova!

18. Kaha “joale [u] tseba Molimo,” u ikemiselitse ho etsa’ng?

18 Kahoo, haeba u sa tsoa tseba Molimo ’me u sa tsoa kolobetsoa, u lokela ho etsa’ng? Tsoela pele ho tseba Jehova hoholoanyane ’me u hōle moeeng. Joale, haeba u se u e-na le lilemo tse ngata u kolobelitsoe, joale u lokela ho etsa’ng? Le uena u lokela ho tsoela pele ho etsa hore tsebo ea hao ka Jehova e tebe e be e hōle. E se e ka le ka mohla re ke ke ra qhanolla mabapi le kamano ea rōna le eena. Ho e-na le hoo, re lokela ho hlahloba lethathamo la rōna nako le nako ho tiisa hore re tsoela pele ho hōlisa kamano ea rōna le Ntate oa rōna ea lerato, Motsoalle le Molimo oa rōna—e leng Jehova.—Bala 2 Bakorinthe 13:5, 6.